IND vs WI: இந்திய அணியில் கடும் போட்டி இருக்கு.. இவருக்கு வாய்ப்பு கிடைப்பது கடினம்.. ஷிட்டான்சு கோடாக்

மும்பை: இந்திய ஒருநாள் கிரிக்கெட் அணியில் கேப்டன் சுப்மன் கில் மற்றும் அனுபவ வீரர் ரோஹித் சர்மா ஆகியோரே தொடர்ந்து முதன்மை தொடக்க ஆட்டக்காரர்களாக களமிறங்குவார்கள் என்றும், இதனால் யாஷஸ்வி ஜெய்ஸ்வால் தனது வாய்ப்புக்காக காத்திருக்க வேண்டும் என்றும் இந்திய அணி நிர்வாகம் தரப்பில் தெரிவிக்கப்பட்டுள்ளது.

ஒருநாள் போட்டிகளில் கிடைத்த குறைந்த வாய்ப்புகளிலும் ஜெய்ஸ்வால் சிறப்பாக செயல்பட்டிருந்தாலும், தற்போதைய சூழலில் அவர் காத்திருக்க வேண்டிய நிலை ஏற்பட்டுள்ளது. திருவனந்தபுரத்தில் ஞாயிற்றுக்கிழமை தொடங்கவுள்ள மேற்கிந்தியத் தீவுகளுக்கு எதிரான மூன்று போட்டிகள் கொண்ட ஒருநாள் தொடருக்கான இந்திய அணியில், ஜெய்ஸ்வால் மூன்றாவது தொடக்க ஆட்டக்காரராக தேர்வு செய்யப்பட்டுள்ளார்.

இதுவரை விளையாடியுள்ள 6 ஒருநாள் போட்டிகளில் 2 சதங்களுடன் 285 ரன்களை ஜெய்ஸ்வால் குவித்துள்ளார். இதன் காரணமாக அவருக்கு ஒருநாள் கிரிக்கெட்டில் தொடர்ந்து வாய்ப்புகள் வழங்கப்பட வேண்டும் என்ற குரல்களும் எழுந்துள்ளன. அதேபோல், லிஸ்ட் ஏ கிரிக்கெட்டில் 41 இன்னிங்ஸ்களில் விளையாடி 53.14 சராசரியுடன் 1860 ரன்களை அவர் குவித்துள்ளார் என்பது குறிப்பிடத்தக்கது.

IND vs WI: சுப்மன் கில்லுக்கு காயம்.. முதல் ஒருநாள் போட்டியில் விளையாடுவாரா?

இது குறித்து செய்தியாளர்களிடம் பேசிய கோடக், "அணியில் இடத்தைப் பிடிக்க கடுமையான போட்டி நிலவுகிறது. பல வீரர்கள் தங்களது சிறப்பான ஆட்டத்தை வெளிப்படுத்தி வருகின்றனர். ஜெய்ஸ்வால் ஒரு சிறந்த பேட்ஸ்மேன் என்பதை நாம் அறிவோம். வாய்ப்பு கிடைக்கும் போதெல்லாம் அவர் சிறப்பாக செயல்படுகிறார். அதனால் அவர் அணியில் ஒரு அங்கமாக உள்ளார்" என்று கூறினார்.

"அணி நிர்வாகமாக நாங்கள் அவருடைய பேட்டிங் திறன், பயிற்சி மற்றும் மனநிலை ஆகியவற்றில் கவனம் செலுத்தி வருகிறோம். கௌதம் கம்பீரும் அவருடன் தொடர்ந்து பேசி வருகிறார். ஆனால் சில நேரங்களில் அணியில் மூன்று சிறந்த விக்கெட் கீப்பர்கள் இருந்தால், ஒருவருக்கு மட்டுமே விளையாட வாய்ப்பு கிடைக்கும். அதைப்போன்ற ஒரு சூழல்தான் இது" என்றார்.

Also Read

IND vs WI: ஜடேஜா இன்னும் 1 விக்கெட் எடுத்தால் போதும், புதிய சாதனை படைக்க வாய்ப்பு

"எனவே, அவருக்கு அநீதி இழைக்கப்படுவதாக கருத முடியாது. அவர் தொடர்ந்து கடினமாக உழைத்து வாய்ப்புக்காக காத்திருக்க வேண்டும். இதுவரை வாய்ப்பு கிடைத்த போதெல்லாம் அவர் தனது திறமையை சிறப்பாக நிரூபித்துள்ளார்" என்றும் கோடக் தெரிவித்துள்ளார்.