IND vs WI: 260 ரன் அடிக்க வேண்டிய பிட்ச்.. சீட்டுக்கட்டாக சரிந்த இந்திய அணி.. குறைந்து போன ஸ்கோர்

இந்தூர்: வெஸ்ட் இண்டீஸ் அணிக்கு எதிரான 3-வது டி20 போட்டியில் 260 ரன்களைக் குவித்திருக்க வேண்டிய இந்திய அணி, நடுவரிசை பேட்டர்களின் பொறுப்பற்ற ஆட்டத்தால் 223 ரன்களுக்கு அனைத்து விக்கெட்டுகளையும் இழந்து ஏமாற்றம் அளித்துள்ளது.

இந்தூரில் உள்ள பேட்டிங்கிற்கு சாதகமான சிறிய மைதானத்தில் முதலில் ஆடிய இந்திய அணி தொடக்கத்தில் ரன் குவிப்பில் ஈடுபட்டது. சஞ்சு சாம்சன் 3 ரன்களில் ஆட்டமிழந்து அதிர்ச்சி அளித்தாலும், அதன்பின் ஜோடி சேர்ந்த அபிஷேக் சர்மா மற்றும் இஷான் கிஷன் வெஸ்ட் இண்டீஸ் பந்துவீச்சை நாலாபுறமும் துவம்சம் செய்தனர். பவர்பிளேயில் சிக்சர் மழையைப் பொழிந்த இந்த ஜோடி முதல் 6 ஓவர்களிலேயே 87 ரன்களைக் குவித்து மிரட்டியது.

அபிஷேக் சர்மா வெறும் 18 பந்துகளில் அரைசதம் கடந்தார். இஷான் கிஷனுடன் இணைந்து 2-வது விக்கெட்டுக்கு 40 பந்துகளில் 108 ரன்கள் விளாசினார். இந்திய அணி 8 ஓவர்களில் 1 விக்கெட் இழப்பிற்கு 115 ரன்கள் குவித்து அசுர பலத்துடன் நின்றபோது, ஸ்கோர் 260 ரன்களைத் தாண்டும் என்றே எதிர்பார்க்கப்பட்டது.

ஆனால் அடுத்த சில நிமிடங்களிலேயே இந்தியாவின் பேட்டிங் சீட்டுக்கட்டு போல சரிந்தது. இஷான் கிஷன் 37 ரன்களிலும், கேப்டன் ஸ்ரேயாஸ் ஐயர் வெறும் 1 ரன்னிலும் ஆட்டமிழந்தனர். அதிரடி காட்டிய அபிஷேக் சர்மா 30 பந்துகளில் 6 பவுண்டரிகள், 5 சிக்சர்களுடன் 69 ரன்களில் ஆட்டமிழக்க, நமன் திர் 10 ரன்களில் வெளியேறினார். இதனால் இந்தியா 135 ரன்களுக்கு 5 விக்கெட்டுகளை இழந்து நிலைகுலைந்தது.

பின்னர் வந்த நிதீஷ் குமார் ரெட்டி 21 ரன்கள் எடுத்தார். நிதானமாக ஆடிய திலக் வர்மா 28 ரன்களிலும், அக்சர் படேல் 20 ரன்களிலும் கண்மூடித்தனமான ரன் அவுட் ஆகி விக்கெட்டைப் பறிகொடுத்து ஏமாற்றினர். அவர்கள் பந்து எங்கே இருக்கிறது, எதிரில் இருக்கும் பேட்ஸ்மேன் எங்கே இருக்கிறார் என பார்க்காமல் அடுத்தடுத்து ரன் அவுட் ஆனது அதிர்ச்சி அளிப்பதாக இருந்தது.

1024 பந்துகளில் 2000 ரன்கள் அடித்து சூர்யகுமார் யாதவின் உலக சாதனையை உடைத்த அபிஷேக் சர்மா

பிரின்ஸ் யாதவ் கடைசி ஓவரில் 3 ஃபோர் அடித்ததை அடுத்து இந்திய அணி 20 ஓவர்களில் 223 ரன்களுக்கு அனைத்து விக்கெட்டுகளையும் இழந்தது. பேட்டிங்கிற்கு சாதகமான இந்தூர் ஆடுகளத்தில் 250 ரன்களுக்கு மேல் குவித்திருக்க வேண்டிய இந்திய அணி, பேட்டர்களின் அலட்சியத்தால் வெஸ்ட் இண்டீஸ் அணிக்கு 224 ரன்கள் என்ற இலக்கையே நிர்ணயித்தது. 2வது டி20யில் 250 ரன்கள் இலக்கை எட்டிய வெஸ்ட் இண்டீஸ்-க்கு இது எட்டக்கூடிய இலக்கு தான்.