249 ரன் அடித்தும் படுதோல்வி அடைந்த இந்தியா.. செஞ்சுரி அடித்து சோலியை முடித்த கேப்டன் ஹோப்

ராஞ்சி: வெஸ்ட் இண்டீஸ் அணிக்கு எதிரான 2-வது டி20 போட்டியில் 249 ரன்கள் குவித்தும் இந்திய அணி 6 விக்கெட் வித்தியாசத்தில் தோல்வியடைந்தது. 45 பந்துகளில் சதம் விளாசிய வெஸ்ட் இண்டீஸ் கேப்டன் ஷாய் ஹோப், சேஸிங்கை முடித்து வைத்தார். ராஞ்சியில் நடைபெற்ற இந்தப் போட்டியில் முதலில் பேட்டிங் செய்த இந்திய அணி, சஞ்சு சாம்சனின் அதிரடி 82 ரன்கள், திலக் வர்மாவின் 44 ரன்கள் மற்றும் இஷான் கிஷனின் 43 ரன்கள் உதவியுடன் 20 ஓவர்களில் 249 ரன்கள் என்ற பெரிய ஸ்கோரை எடுத்தது.

தொடர்ந்து 250 ரன்கள் எடுத்தால் வெற்றி என்ற இலக்குடன் ஆடிய வெஸ்ட் இண்டீஸ் அணிக்கு முதல் ஓவரிலேயே அதிர்ச்சி காத்திருந்தது. மயங்க் யாதவ் வீசிய முதல் ஓவரில் கமில் பூரன் 4 ரன்களிலும், ஹெட்மயர் ரன் ஏதுமின்றியும் அடுத்தடுத்து ஆட்டமிழந்தனர். ஆனால் அதன்பின்னர் களம் புகுந்த வெஸ்ட் இண்டீஸ் பேட்டர்கள் இந்தியப் பந்துவீச்சை மைதானத்தின் நாலாபுறமும் சிதறடித்தனர்.

கேப்டன் ஷாய் ஹோப் மற்றும் ஷெர்பேன் ரூதர்போர்ட் ஜோடி இந்திய பந்துவீச்சைத் துவம்சம் செய்தது. அதிரடியின் உச்சத்துக்கே சென்ற ரூதர்போர்ட் வெறும் 37 பந்துகளில் 7 பவுண்டரிகள், 7 சிக்சர்களுடன் 84 ரன்கள் விளாசினார். மறுமுனையில் கேப்டன் ஷாய் ஹோப், 45 பந்துகளில் 6 பவுண்டரிகள், 9 சிக்சர்களுடன் ஆட்டமிழக்காமல் 102 ரன்கள் குவித்து வரலாற்றுச் சதம் அடித்தார். இது அவரது இரண்டாவது சர்வதேச டி20 சதம் ஆகும்.

கடைசி கட்டத்தில் ரொமாரியோ ஷெப்பர்ட் வெறும் 13 பந்துகளில் 34 ரன்கள் அடிக்க, வெஸ்ட் இண்டீஸ் அணி 18.3 ஓவர்களிலேயே 4 விக்கெட் இழப்பிற்கு 252 ரன்கள் எடுத்து இமாலய வெற்றி பெற்றது. பனிப்பொழிவால் பந்துவீச்சில் தடுமாறிய இந்திய அணி பந்துவீச்சாளர்கள் ரன்களை வாரி இறைத்தனர். குறிப்பாக சுழற் பந்துவீச்சாளர்களான அக்‌சர் படேல் 63 ரன்களையும், குல்தீப் யாதவ் 53 ரன்களையும் வாரி வழங்கினர்.

IND vs WI: 25 ஃபோர், 13 சிக்ஸ்.. மிரள வைத்த இந்திய ஆட்டம்.. துவண்டு போன வெஸ்ட் இண்டீஸ்!

இன்னும் 9 பந்துகள் மீதமிருந்த நிலையிலேயே வெற்றி பெற்ற வெஸ்ட் இண்டீஸ் அணி, 5 போட்டிகள் கொண்ட டி20 தொடரில் தற்போது 1-1 என்ற கணக்கில் சமநிலையை எட்டியுள்ளது.