IND vs WI: ஜடேஜாவா இது.. தோனி ரெக்கார்டு காலி.. அடுத்து பண்ட், ரோஹித்.. சிக்ஸ் அடிப்பதில் சாதனை

அகமதாபாத்: வெஸ்ட் இண்டீஸுக்கு எதிரான முதல் டெஸ்ட் போட்டியின் இரண்டாவது நாளில், தனது அதிரடியான பேட்டிங்கால் பல சாதனைகளை முறியடித்துள்ளார் ரவீந்திர ஜடேஜா. குறிப்பாக, இந்திய டெஸ்ட் கிரிக்கெட் வரலாற்றில் அதிக சிக்ஸர்கள் அடித்த வீரர்கள் பட்டியலில், முன்னாள் கேப்டன் எம்.எஸ். தோனியைப் பின்னுக்குத் தள்ளி நான்காவது இடத்தைப் பிடித்து, ஒரு புதிய மைல்கல்லை எட்டியுள்ளார்.

இந்த போட்டியின் இரண்டாவது நாள் ஆட்டத்தில், மதிய உணவு இடைவேளைக்குப் பிறகு களமிறங்கிய ஜடேஜா, ஆரம்பம் முதலே அதிரடியாக விளையாடினார். வெறும் 81 பந்துகளில் 3 பவுண்டரிகள் மற்றும் 4 சிக்ஸர்களுடன் 50 ரன்களைக் குவித்த அவர், அணியின் ஸ்கோரை வேகமாக உயர்த்தினார். அவர் அடித்த நான்காவது சிக்ஸரின்போது, தோனியின் சாதனையை முறியடித்தார்.

இதுவரை 90 டெஸ்ட் போட்டிகளில் விளையாடியுள்ள தோனி, 78 சிக்ஸர்களை அடித்ததே சாதனையாக இருந்தது. தற்போது, தனது 86வது டெஸ்ட் போட்டியில் விளையாடி வரும் ரவீந்திர ஜடேஜா, 79* சிக்ஸர்களுடன் அந்தச் சாதனையைத் தகர்த்து, நான்காவது இடத்திற்கு முன்னேறியுள்ளார்.

டெஸ்ட் கிரிக்கெட்டில் அதிக சிக்ஸர்கள் அடித்த இந்திய வீரர்கள் பட்டியல்:

• வீரேந்திர சேவாக்: 103 போட்டிகளில் 90 சிக்ஸர்கள்
• ரிஷப் பண்ட்: 47 போட்டிகளில் 90 சிக்ஸர்கள்
• ரோஹித் சர்மா: 67 போட்டிகளில் 88 சிக்ஸர்கள்
• ரவீந்திர ஜடேஜா: 86* போட்டிகளில் 79* சிக்ஸர்கள்
• எம்.எஸ். தோனி: 90 போட்டிகளில் 78 சிக்ஸர்கள்

இந்தப் பட்டியலில், அதிரடி மன்னன் வீரேந்திர சேவாக் மற்றும் இளம் புயல் ரிஷப் பண்ட் ஆகியோர் தலா 90 சிக்ஸர்களுடன் முதலிடத்திலும், 'ஹிட்மேன்' ரோஹித் சர்மா 88 சிக்ஸர்களுடன் மூன்றாவது இடத்திலும் உள்ளனர். விரைவில் இவர்களின் சாதனைகளையும் ஜடேஜா முறியடிப்பார் என்று எதிர்பார்க்கப்படுகிறது.

மற்றொரு அரிய சாதனை

தோனியின் சாதனையை முறியடித்தது மட்டுமல்லாமல், மற்றொரு அரிய சாதனையையும் ஜடேஜா நிகழ்த்தியுள்ளார். டெஸ்ட் இன்னிங்ஸில் அரைசதம் அடிப்பதற்குள் நான்கு சிக்ஸர்களை அடித்த நான்காவது இந்திய வீரர் என்ற பெருமையையும் அவர் பெற்றுள்ளார். இதற்கு முன்பு, 2007-ல் எம்.எஸ். தோனி, 2021-ல் ரிஷப் பண்ட் மற்றும் 2025-ல் வாஷிங்டன் சுந்தர் ஆகியோர் இந்தச் சாதனையை நிகழ்த்தியுள்ளனர்.

இந்த ஆண்டு டெஸ்ட் கிரிக்கெட்டில் ஜடேஜா தனது அற்புதமான ஃபார்மைத் தொடர்ந்து வெளிப்படுத்தி வருகிறார். 2025-ஆம் ஆண்டில் டெஸ்ட் போட்டிகளில் அதிக முறை 50+ ரன்கள் (7 முறை) குவித்த வீரர்கள் பட்டியலிலும் அவரே முதலிடத்தில் உள்ளார். இதன் மூலம் உலகின் நம்பர் 1 டெஸ்ட் ஆல்-ரவுண்டராக அவர் ஏன் திகழ்கிறார் என்பதை மீண்டும் ஒருமுறை நிரூபித்துள்ளார். துருவ் ஜுரலுடன் இணைந்து ஐந்தாவது விக்கெட்டுக்கு 108 ரன்கள் பார்ட்னர்ஷிப் அமைத்த ஜடேஜாவின் இந்த ஆட்டம், இந்திய அணியை ஒரு வலுவான நிலைக்கு எடுத்துச் சென்றுள்ளது.