351 ரன்கள் குவித்தும் இந்தியா தோல்வி.. 162 ரன்கள் விளாசி தோற்கடித்த வெஸ்ட் இண்டீஸ் கேப்டன் ஷாய் ஹோப்

சண்டிகர்: வெஸ்ட் இண்டீஸ் அணிக்கு எதிரான 3-வது ஒருநாள் போட்டியில் இந்திய அணி 351 ரன்கள் குவித்தும் 5 விக்கெட் வித்தியாசத்தில் தோல்வியடைந்தது. நியூ சண்டிகரில் நடைபெற்ற இப்போட்டியில் டாஸ் வென்ற இந்திய அணி முதலில் பேட்டிங் செய்தது. தொடக்கத்திலேயே சுப்மன் கில் 1 ரன்னிலும், விராட் கோலி ரன் ஏதுமின்றியும் ஆட்டமிழந்து அதிர்ச்சி அளித்தனர்.

பின்னர் ஜோடி சேர்ந்த ரோஹித் சர்மா 92 ரன்களும், ருதுராஜ் கெய்க்வாட் 57 ரன்களும் சேர்த்து அணியை மீட்டனர். இறுதிக்கட்டத்தில் அதிரடி காட்டிய கே.எல். ராகுல் 87 பந்துகளில் 10 பவுண்டரிகள், 6 சிக்சர்களுடன் ஆட்டமிழக்காமல் 129 ரன்கள் விளாசினார். இதனால் இந்திய அணி 50 ஓவர்களில் 7 விக்கெட்டுகளை இழந்து 351 ரன்கள் குவித்தது.

அடுத்து 352 ரன்கள் என்ற கடின இலக்கை துரத்திய வெஸ்ட் இண்டீஸ் அணியில், தொடக்க வீரர் ஜான் கேம்ப்பெல் 10 ரன்களில் அவுட்டானார். ஆனால் மறுமுனையில் நங்கூரமாக நின்ற கேப்டன் ஷாய் ஹோப், இந்திய பந்துவீச்சை நாலாபுறமும் சிதறடித்தார். அவருக்கு ஒத்துழைப்பு தந்த அமீர் ஜாங்கூ 67 ரன்களும், கீமோ பால் 44 ரன்களும் எடுத்தனர்.

இந்திய அணியின் பந்துவீச்சு இந்த ஆட்டத்தில் படுமோசமாக அமைந்தது. குறிப்பாக இளம் வேகப்பந்து வீச்சாளர் அன்ஷுல் கம்போஜ் 9 ஓவர்கள் வீசி விக்கெட் ஏதுமின்றி 82 ரன்களை வாரி வழங்கினார். இவரது மோசமான பந்துவீச்சை எதிரணி பேட்டர்கள் முழுமையாகப் பயன்படுத்திக் கொண்டனர்.

IND vs PAK: நக்வி-யை நோஸ் கட் செய்த ஜெய் ஷா.. இந்திய அணிக்கு தங்கப்பதக்கம் வழங்க நேரில் வந்தார்

பொறுப்புடன் ஆடிய கேப்டன் ஷாய் ஹோப் 143 பந்துகளில் 17 பவுண்டரிகள், 3 சிக்சர்களுடன் 162 ரன்கள் குவித்து கடைசி வரை ஆட்டமிழக்காமல் களத்தில் இருந்தார். வெஸ்ட் இண்டீஸ் அணி 48.2 ஓவர்களில் 5 விக்கெட்டுகளை மட்டும் இழந்து 352 ரன்கள் எடுத்து அபார வெற்றி பெற்றது. இந்த ஆட்டத்தில் இந்திய அணி தோல்வியைத் தழுவினாலும், 3 போட்டிகள் கொண்ட இந்த ஒருநாள் தொடரை 2-1 என்ற கணக்கில் கைப்பற்றி கோப்பையை வென்றது.