கம்பீர் செய்த மெகா தவறு.. இந்த வீரரை எடுக்காமல் விட்டதே தோல்விக்கு காரணம்.. விளாசிய வருண் ஆரோன்

ஹைதராபாத்: வெஸ்ட் இண்டீஸ் அணிக்கு எதிரான 4-வது டி20 போட்டியில் இந்திய அணி தோல்வியடைந்த நிலையில், தலைமை பயிற்சியாளர் கவுதம் கம்பீர் முக்கிய சுழற்பந்து வீச்சாளரை அணியில் சேர்க்காமல் விட்டதே தோல்விக்கு காரணம் என்று முன்னாள் வேகப்பந்து வீச்சாளர் வருண் ஆரோன் கடுமையாக விமர்சித்து இருக்கிறார்.

ஹைதராபாத்தில் நடைபெற்ற இப்போட்டியில் வெஸ்ட் இண்டீஸ் அணி 247 ரன்கள் குவித்தது. இமாலய இலக்கை நோக்கி ஆடிய இந்திய அணி 223 ரன்கள் மட்டுமே எடுத்து 24 ரன்கள் வித்தியாசத்தில் தோல்வியைத் தழுவியது. இதனால் 5 போட்டிகள் கொண்ட தொடர் தற்போது 2-2 என்ற கணக்கில் சமநிலையை எட்டியுள்ளது.

இந்திய அணியின் தவறான பந்துவீச்சு வியூகம் குறித்துப் பேசிய சன்ரைசர்ஸ் ஹைதராபாத் அணியின் பந்துவீச்சு பயிற்சியாளரான வருண் ஆரோன், "மோசமான பந்துவீச்சு திட்டமிடலும், சரியான புரிதல் இல்லாததுமே இந்திய அணியின் தோல்விக்கு மீண்டும் ஒருமுறை காரணமாக அமைந்தது. ஹைதராபாத் ஆடுகளத்தில் இந்திய அணி நிச்சயம் ஒரு கூடுதல் சுழற்பந்து வீச்சாளருடன் களமிறங்கியிருக்க வேண்டும். குல்தீப் யாதவை இந்த ஆடுகளத்தில் ஆட வைக்காமல் தவிர்த்தது மிகப்பெரிய தவறான முடிவாகும்.

ஹைதராபாத் மைதானத்தில் பனிப்பொழிவு சுத்தமாக இல்லை. ஆடுகளத்தில் பந்து நன்றாகத் திரும்பி நின்றே பேட்டர்களை நோக்கி வந்தது. ஆனால் இந்திய அணியில் அக்‌சர் படேல், நமன் திர் ஆகிய இருவரை மட்டுமே சுழற்பந்துக்கு நம்பியிருந்தனர். வேகப்பந்து வீச்சாளர்களான மயங்க் யாதவ் மற்றும் அர்ஷ்தீப் சிங் இருவரும் தலா 52 ரன்களை வாரி வழங்கினர்.

அதேசமயம் வெஸ்ட் இண்டீஸ் சுழற்பந்து வீச்சாளர்கள் குடகேஷ் மோட்டி மற்றும் ரோஸ்டன் சேஸ் ஆகியோர் தங்களது பந்துவீச்சு வேகத்தை மாற்றி இந்திய பேட்டர்களைத் திணறடித்தனர். மோட்டி ஒரே ஓவரில் அபிஷேக் சர்மா, நமன் திர் விக்கெட்டுகளை வீழ்த்தி ஆட்டத்தைத் திருப்பினார். குல்தீப் யாதவ் களத்தில் இருந்திருந்தால் இந்திய அணிக்கு நிச்சயம் சாதகமான முடிவு கிடைத்திருக்கும்" என்று வருண் ஆரோன் தெரிவித்தார்.

"ஜெயிச்சதை விடுங்க.. இதை எப்படி வீட்டுக்கு எடுத்துப் போவது?".. இந்தியாவை வீழ்த்தியபின் ஹோப் பேச்சு

தொடரைத் தீர்மானிக்கும் 5-வது மற்றும் இறுதி டி20 போட்டி சனிக்கிழமையன்று பெங்களூருவில் நடைபெறவுள்ள நிலையில், இந்திய அணி தனது பந்துவீச்சுத் தேர்வை மாற்றியமைக்குமா என்ற எதிர்பார்ப்பு எழுந்துள்ளது.