IND vs ZIM: திலக் வர்மா மாபெரும் சாதனை.. ரோகித், கோலி, ரெய்னா பட்டியலில் இணைந்தார்

ஹராரே: இந்திய டி20 கிரிக்கெட் அணியின் துணை கேப்டனான திலக் வர்மா, ஜிம்பாப்வேக்கு எதிரான இரண்டாவது டி20 போட்டியின் போது ஒரு புதிய சாதனையைப் படைத்துள்ளார். ஹைதராபாத்தைச் சேர்ந்த இந்த இடதுகை பேட்டர், வெளிநாட்டு மண்ணில் நடைபெற்ற டி20 போட்டிகளில் 1000 ரன்களைக் கடந்த எட்டாவது இந்திய வீரர் என்ற பெருமையைப் பெற்றுள்ளார்.

2023 ஆம் ஆண்டு வெஸ்ட் இண்டீஸ் அணிக்கு எதிராக சர்வதேச டி20 போட்டிகளில் அறிமுகமான திலக் வர்மாவுக்கு, இந்த மைல்கல்லை எட்ட 4 ரன்கள் மட்டுமே தேவைப்பட்டன. ஹராரேவில் நடைபெற்ற ஜிம்பாப்வேக்கு எதிரான இரண்டாவது டி20 போட்டியின் 11 ஆவது ஓவரின் மூன்றாவது பந்தில், ஜிம்பாப்வே கேப்டன் சிகந்தர் ரசா வீசிய பந்தை பவுண்டரிக்கு விரட்டி திலக் இந்த சாதனையை எட்டினார்.

ஜிம்பாப்வேக்கு எதிரான இரண்டாவது டி20 போட்டியில் ஐந்தாவது வரிசையில் களமிறங்கிய திலக் வர்மா, வெறும் 29 பந்துகளில் ஐந்து பவுண்டரிகள் மற்றும் மூன்று சிக்ஸர்களுடன் 60 ரன்கள் குவித்து ஆட்டமிழக்காமல் இருந்தார். வெறும் 23 பந்துகளில் தனது அரைசதத்தை எட்டிய திலக், இஷான் கிஷனுடன் இணைந்து நான்காவது விக்கெட்டுக்கு 43 பந்துகளில் 94 ரன்கள் பார்ட்னர்ஷிப் அமைத்தார். இந்த ஜோடியில் இஷான் கிஷன் 44 பந்துகளில் 81 ரன்கள் எடுத்தார். இவர்களின் அதிரடி ஆட்டத்தால் இந்திய அணி நிர்ணயிக்கப்பட்ட 20 ஓவர்களில் ஐந்து விக்கெட் இழப்புக்கு 219 ரன்கள் குவித்தது.

IND vs ZIM: இந்திய அணி பேட்டிங்கில் 2 வீரர்கள் ஏமாற்றம்.. கடுப்பான பிசிசிஐ

வெளிநாட்டு மண்ணில் நடைபெற்ற டி20 போட்டிகளில் அதிக ரன்கள் குவித்த இந்திய வீரர்களின் பட்டியலில் முன்னாள் கேப்டன் ரோஹித் சர்மா முதலிடத்தில் உள்ளார். அவர் தனது சர்வதேச டி20 கிரிக்கெட் வாழ்க்கையில் 101 போட்டிகளில் விளையாடி 2699 ரன்களை எடுத்துள்ளார். விராட் கோலி 79 போட்டிகளில் 2611 ரன்களுடன் இரண்டாவது இடத்தில் உள்ளார். சூர்யகுமார் யாதவ் 62 போட்டிகளில் 3 சதங்கள் மற்றும் 12 அரைசதங்களுடன் 1742 ரன்கள் குவித்து மூன்றாவது இடத்தில் உள்ளார்.

அவர்களைத் தொடர்ந்து கேஎல் ராகுல் 41 போட்டிகளில் 2 சதங்கள் மற்றும் 10 அரைசதங்களுடன் 1247 ரன்களும், சுரேஷ் ரெய்னா 56 போட்டிகளில் ஒரு சதம் மற்றும் 4 அரைசதங்களுடன் 1187 ரன்களும் எடுத்துள்ளனர். ஹர்திக் பாண்டியா 73 போட்டிகளில் 3 அரைசதங்களுடன் 1076 ரன்கள் குவித்துள்ளார். திலக் வர்மா 37 போட்டிகளில் விளையாடி 2 சதங்கள் மற்றும் 5 அரைசதங்களுடன் 1056 ரன்கள் எடுத்துள்ளார். ஷிகர் தவன் 40 போட்டிகளில் 7 அரைசதங்களுடன் 1053 ரன்கள் குவித்து இந்த பட்டியலில் இடம் பெற்றுள்ளார்.

வெளிநாட்டு மண்ணில் நடைபெற்ற டி20 போட்டிகளில் உலகளவில் அதிக ரன்கள் குவித்து முதலிடத்தில் இருப்பவர் அயர்லாந்தின் பால் ஸ்டிர்லிங் ஆவார். அவர் 125 போட்டிகளில் விளையாடி 3103 ரன்களைக் குவித்துள்ளார். இதன் மூலம் சர்வதேச அளவில் வெளிநாட்டு மண்ணில் 3000 ரன்களைக் கடந்த ஒரே வீரர் என்ற பெருமை பெற்றவராக திகழ்கிறார்.

IND vs ZIM: ஜிம்பாப்வே பவுலிங்கை கொளுத்திய இசான் கிஷன், திலக் வர்மா.. இந்தியா 219 ரன்கள் குவிப்பு

பாகிஸ்தானின் பாபர் அசாம் 95 போட்டிகளில் 2953 ரன்களுடன் இரண்டாவது இடத்திலும், இங்கிலாந்தின் ஜோஸ் பட்லர் 110 போட்டிகளில் 2752 ரன்களுடன் மூன்றாவது இடத்திலும் உள்ளனர். இந்திய வீரர்கள் ரோஹித் சர்மா 2699 ரன்களுடனும், விராட் கோலி 2611 ரன்களுடனும் முறையே அடுத்தடுத்த இடங்களில் நீடிக்கின்றனர்.