IND vs ZIM: ஸ்ரேயாஸ் ஐயருக்கு முதல் வெற்றி.. ஜிம்பாப்வே அணியை ஓடவிட்ட வைபவ் சூர்யவன்ஷி.. இந்தியா 1-0

ஹராரே: ஜிம்பாப்வேக்கு எதிரான முதல் டி20 போட்டியில் இந்திய அணி 7 விக்கெட் வித்தியாசத்தில் அபார வெற்றி பெற்றது. கேப்டனாக ஸ்ரேயாஸ் ஐயருக்கு இதுவே முதல் வெற்றியாகும். இளம் வீரர் வைபவ் சூர்யவன்ஷி வெறும் 18 பந்துகளில் அரை சதம் விளாசி அணியின் வெற்றிக்கு வித்திட்டார்.

ஹராரே மைதானத்தில் நடைபெற்ற இந்தப் போட்டியில் டாஸ் வென்ற இந்திய கேப்டன் ஸ்ரேயாஸ் ஐயர் பந்துவீச்சைத் தேர்வு செய்தார். முதலில் பேட்டிங் செய்த ஜிம்பாப்வே அணிக்குத் தொடக்கமே அதிர்ச்சியாக அமைந்தது. ஆட்டத்தின் முதல் பந்திலேயே பிரையன் பென்னட்டை (0) மயங்க் யாதவ் வெளியேற்றினார்.

தொடர்ந்து சீரான இடைவெளியில் விக்கெட்டுகள் சரிந்ததால், ஜிம்பாப்வே அணி 32 ரன்களுக்கு 4 விக்கெட்டுகளை இழந்து தவித்தது. பின்னர் வெஸ்லி மாதவெரே 39 ரன்கள், ரியான் பர்ல் 26 ரன்கள் மற்றும் தடிவானாஷே மருமணி 27 ரன்கள் ஆகியோரின் ஆட்டத்தால் ஜிம்பாப்வே அணி 20 ஓவர்களில் 7 விக்கெட் இழப்பிற்கு 125 ரன்கள் எடுத்தது. இந்தியா சார்பில் மயங்க் யாதவ் 18 ரன்கள் கொடுத்து 2 விக்கெட்டும், பிரின்ஸ் யாதவ் 19 ரன்கள் கொடுத்து 2 விக்கெட்களும் வீழ்த்தினர். சிவம் துபே, ரவி பிஷ்னோய் தலா 1 விக்கெட் வீழ்த்தினர்.

126 ரன்கள் என்ற எளிய இலக்கை நோக்கி களம் இறங்கிய இந்திய அணியில் அபிஷேக் சர்மா 8 பந்துகளை சந்தித்து 1 ரன் மட்டுமே எடுத்து ஆட்டமிழந்தார். ஆனால், மறுமுனையில் 15 வயதான வைபவ் சூர்யவன்ஷி சிக்சரும் பவுண்டரியுமாகப் பறக்கவிட்டார். வெறும் 18 பந்துகளில் தனது அரை சதத்தைப் பூர்த்தி செய்த அவர், 4 பவுண்டரிகள் மற்றும் 4 சிக்சர்களுடன் 19 பந்துகளில் 50 ரன்கள் எடுத்து ஆட்டமிழந்தார்.

அவரைத் தொடர்ந்து இஷான் கிஷன் 35 ரன்கள் எடுத்தார். பொறுப்பான ஆட்டத்தை வெளிப்படுத்திய கேப்டன் ஸ்ரேயாஸ் ஐயர் 28 ரன்களுடனும், திலக் வர்மா 6 ரன்களுடனும் களத்தில் நின்று அணியை வெற்றிக்கு அழைத்துச் சென்றனர். இந்திய அணி 13.2 ஓவர்களில் 3 விக்கெட் இழப்பிற்கு 126 ரன்கள் எடுத்து 7 விக்கெட் வித்தியாசத்தில் அபார வெற்றி பெற்றது.

IND vs ZIM: மரண அடி அடித்த வைபவ் சூர்யவன்ஷி.. கதறிய ஜிம்பாப்வே.. மின்னல் வேகத்தில் அரைசதம்

அயர்லாந்து மற்றும் இங்கிலாந்து தொடர்களில் வெற்றி பெற முடியாமல் தவித்த ஸ்ரேயாஸ் ஐயருக்கு, கேப்டனாகப் பொறுப்பேற்ற 8 போட்டிகளுக்குப் பிறகு முதல் வெற்றி கிடைத்துள்ளது. இதன் மூலம் 3 போட்டிகள் கொண்ட ஜிம்பாப்வே டி20 தொடரில் இந்தியா 1-0 என முன்னிலை பெற்றுள்ளது.

ஸ்ரேயாஸ் ஐயர் உலக சாதனை.. 88 ஆண்டு எந்த கேப்டனும் தொடாத உச்சம்.. தோனியின் ரெக்கார்டும் காலி