IND vs ZIM: தெறிக்கவிட்ட சஞ்சு சாம்சன்.. சதமே அடிச்சிருக்கலாம்.. இவ்வளவு திறமை இருந்தும் ஏன் இப்படி பண்றாரு?

சென்னை: டி20 உலகக் கோப்பை சூப்பர் 8 போட்டியில், வாழ்வா சாவா என்ற கட்டத்தில் இந்திய அணி, ஜிம்பாப்வே அணியை எதிர்கொண்டது. இந்தப் போட்டியில் சஞ்சு சாம்சனுக்கு வாய்ப்பு வழங்கப்பட்டது. இந்த ஆட்டத்தில் இன்னிங்சை அபாரமாக தொடங்கிய சஞ்சு சாம்சன் 15 பந்துகளில் 24 ரன்கள் எடுத்து ஆட்டமிழந்தார்.

இதனால் இந்திய அணி 48 ரன்களுக்கு முதல் விக்கெட்டை இழக்க, இந்த ஐசிசி தொடரில் மீண்டும் 50 ரன் தொடக்க ஜோடி அமையவில்லை. இந்திய இன்னிங்ஸின் நான்காவது ஓவரில் சாம்சன் ஆட்டமிழந்தார். பிளெஸ்ஸிங் முசரபானி வீசிய மெதுவான ஷார்ட் பந்தை, சாம்சன் டீப் மிட்-விக்கெட் திசையில் அடித்து ரியான் பர்ல் எளிதாகப் பிடித்தார்.

டி20 உலகக் கோப்பையில் தனது அறிமுகப் போட்டியான நமீபியாவுக்கு எதிராக இதேபோல டீப் மிட்-விக்கெட் திசையில் கேட்ச் கொடுத்து சாம்சன் ஆட்டமிழந்தார். இதன் மூலம், சேப்பாக்கம் மைதானத்தில் டி20 வடிவத்தில் அவரது மந்தமான ஃபார்ம் தொடர்ந்தது. டி20 சர்வதேசப் போட்டிகளில் முசரபானி அவரை வீழ்த்துவது இது இரண்டாவது முறையாகும்.

T20 WC: ஜிம்பாப்வே அணிக்கு எதிராக இந்தியா தோற்றாலும், அரையிறுதி வாய்ப்பு இருக்கு.. எப்படி தெரியுமா?

சஞ்சு சாம்சன் 24 ரன்களில் வெளியேறிய பிறகு, அபிஷேக் ஷர்மாவும் இஷான் கிஷனும் இந்திய அணியின் அதிரடி ஆட்டத்தைத் தொடர்ந்தனர். இம்முறை பவர்பிளேவில் ஆறு ஓவர்கள் முடிவில் ஒரு விக்கெட் இழப்பிற்கு இந்திய அணி 80 ரன்கள் எடுத்திருந்தது. அப்போது, அபிஷேக் ஷர்மா 13 பந்துகளில் 33 ரன்களுடனும், இஷான் கிஷன் 9 பந்துகளில் 15 ரன்களுடனும் களத்தில் இருந்தனர்.

சூப்பர் 8 சுற்றின் முதல் போட்டியில் தென்னாப்பிரிக்காவிடம் 76 ரன்கள் வித்தியாசத்தில் தோற்ற நிலையில், சூர்யகுமார் யாதவ் தலைமையிலான இந்திய அணி பிளேயிங் லெவனில் இரண்டு மாற்றங்களைச் செய்திருந்தது. வாஷிங்டன் சுந்தருக்குப் பதிலாக அக்சர் படேலும், ரிங்கு சிங்குக்குப் பதிலாக சஞ்சு சாம்சனும் சேர்க்கப்பட்டனர்.

மறுபுறம், ஜிம்பாப்வே அணி டாஸ் வென்று முதலில் பந்துவீசத் தேர்வு செய்ததுடன், ஒரு மாற்றம் செய்யப்பட்டிருந்தது. வெஸ்ட் இண்டீஸுக்கு எதிரான பெரிய தோல்விக்குப் பிறகு, கிரேம் க்ரீமருக்குப் பதிலாக தினோடெண்டா மாபோசா அணியில் சேர்க்கப்பட்டார்.

T20 WC: ராசியான மைதானமா சென்னை? சேப்பாக்கத்தில் இந்திய அணி எத்தனை டி20 போட்டியில் வென்றது?

இரண்டு அணிகளின் ரன் ரேட் குறைவாக இருப்பதால், 2026 டி20 உலகக் கோப்பை அரையிறுதி வாய்ப்பைத் தக்கவைக்க இப்போட்டியில் கணிசமான வித்தியாசத்தில் வெற்றிபெற வேண்டும். நடப்புச் சாம்பியனான இந்திய அணி, லீக் சுற்றில் ஆஸ்திரேலியா மற்றும் இலங்கையை வீழ்த்திய ஜிம்பாப்வே உடன் எச்சரிக்கையாகவே விளையாடுகிறது.