இந்தியா - ஜிம்பாப்வே டி20 அணி அறிவிப்பு.. தூக்கி எறியப்பட்ட சஞ்சு சாம்சன்.. வைபவ் சூர்யவன்ஷி நிலை?

சென்னை: ஜிம்பாப்வே அணிக்கு எதிரான 3 போட்டிகள் கொண்ட டி20 தொடருக்கான இந்திய அணி அறிவிக்கப்பட்டது. டி20 உலகக்கோப்பை தொடருக்கு பின் ஆடிய மூன்று போட்டிகளில் ரன் குவிக்கத் தவறிய விக்கெட் கீப்பர் பேட்ஸ்மேன் சஞ்சு சாம்சன் இந்த அணியிலிருந்து முற்றிலும் தூக்கி எறியப்பட்டுள்ளார்.

வரும் ஜூலை 23 முதல் தொடங்கவுள்ள இந்த டி20 தொடருக்கு இளம் வீரர்களைக் கொண்ட இந்திய அணி அறிவிக்கப்பட்டுள்ளது. இங்கிலாந்துக்கு எதிரான தொடரில் அறிமுகமாகி சாதனை படைத்த 15 வயதே ஆன இளம் அதிரடி ஆட்டக்காரர் வைபவ் சூர்யவன்ஷி அணியில் தனது இடத்தைத் தக்கவைத்துக் கொண்டுள்ளார்.

ஹைதராபாத் அணியின் சுழற்பந்து வீச்சாளர் ஹர்ஷ் துபே, விதர்பா வேகப்பந்து வீச்சாளர் யஷ் தாக்கூர் (26 வயது) மற்றும் குஜராத் டைட்டன்ஸ் அணியின் அசோக் சர்மா ஆகியோருக்கு முதன்முறையாக இந்திய அணியில் விளையாட வாய்ப்பளிக்கப்பட்டுள்ளது. பஞ்சாப் கிங்ஸ் அணியின் விக்கெட் கீப்பர் பேட்ஸ்மேன் பிரப்சிம்ரன் சிங்கும் அணியில் சேர்க்கப்பட்டுள்ளார்.

அதேபோல், கொல்கத்தா நைட் ரைடர்ஸ் அணியின் அதிரடி பேட்ஸ்மேன் ரிங்கு சிங் மற்றும் காயத்தில் இருந்து மீண்டு வந்துள்ள அதிவேக பந்துவீச்சாளர் மயங்க் யாதவ் ஆகியோர் மீண்டும் இந்திய அணிக்கு திரும்ப அழைக்கப்பட்டுள்ளனர். பிசிசிஐ வெளியிட்டுள்ள அறிக்கையில் சஞ்சு சாம்சனுக்கு ஓய்வு அளிக்கப்பட்டதா அல்லது அணியிலிருந்து நீக்கப்பட்டாரா என்பது குறித்து எந்த விளக்கமும் அளிக்கப்படவில்லை.

சஞ்சு சாம்சனைத் தவிர அக்சர் படேல், அர்ஷ்தீப் சிங், ஹர்ஷித் ராணா, வாஷிங்டன் சுந்தர், பிரசித் கிருஷ்ணா மற்றும் ரவி பிஷ்னோய் ஆகியோருக்கும் இந்த அணியில் இடம் கிடைக்கவில்லை. இந்தத் தொடருக்கு ஸ்ரேயாஸ் ஐயர் கேப்டனாகவும், திலக் வர்மா துணை கேப்டனாகவும் நியமிக்கப்பட்டுள்ளனர். இதன் மூலம் இளம் வீரர்களின் திறமையைச் சோதிக்கத் தேர்வுக்குழுவினர் திட்டமிட்டுள்ளனர்.

“வைபவ் சூர்யவன்ஷிக்கு ஓய்வே கொடுக்க வேண்டாம்.. 2027 உலகக்கோப்பையில் ஆடணும்”.. சிவராமகிருஷ்ணன் பேச்சு

ஜிம்பாப்வே தொடருக்கான இந்திய அணி பட்டியல்: ஸ்ரேயாஸ் ஐயர் (கேப்டன்), வைபவ் சூர்யவன்ஷி, அபிஷேக் சர்மா, திலக் வர்மா (துணை கேப்டன்), இஷான் கிஷன், சிவம் துபே, சூர்யான்ஷ் ஷெட்கே, ரிங்கு சிங், ஹர்ஷ் துபே, வருண் சக்கரவர்த்தி, பிரின்ஸ் யாதவ், யஷ் தாக்கூர், அசோக் சர்மா, மயங்க் யாதவ், பிரப்சிம்ரன் சிங்.