உலகக்கோப்பை அரையிறுதிக்கு முன் இந்திய அணிக்கு அதிர்ச்சி.. முக்கிய வீராங்கனை பிரதிகா ராவல் காயம்

மும்பை: 2025 மகளிர் உலகக் கோப்பை கிரிக்கெட் தொடரில், வங்கதேசத்திற்கு எதிரான லீக் போட்டியின் போது இந்திய அணியின் தொடக்க வீராங்கனை பிரதிகா ராவலுக்கு கணுக்கால் மற்றும் முழங்காலில் எதிர்பாராத விதமாக காயம் ஏற்பட்டது. இது இந்திய அணிக்கு பெரும் பின்னடைவாகக் கருதப்படுகிறது. அவரது காயம் குறித்துக் கேப்டன் ஹர்மன்பிரீத் கவுர் முக்கிய தகவலைப் பகிர்ந்துள்ளார்.

நவி மும்பையில் உள்ள டாக்டர் டி.ஒய் பாட்டீல் மைதானத்தில் ஞாயிற்றுக்கிழமை, அக்டோபர் 26 அன்று, இந்தியா மற்றும் வங்கதேசம் அணிகளுக்கு இடையேயான உலகக் கோப்பையின் கடைசி லீக் போட்டி நடைபெற்றது. இப்போட்டியின் போது பீல்டிங் செய்து கொண்டிருந்த பிரதிகா ராவலுக்கு காயம் ஏற்பட்டது.

காயம் ஏற்பட்டது எப்படி?

வங்கதேச இன்னிங்ஸின் 21வது ஓவரின் போது இந்த துரதிர்ஷ்டவசமான சம்பவம் நிகழ்ந்தது. ஷர்மின் அக்தர் அடித்த பந்தை பவுண்டரி லைன் அருகே தடுக்க பிரதிகா ராவல் வேகமாக ஓடிச்சென்று ஸ்லைட் செய்தார். அப்போது, அவரது வலது கால் தரையில் தவறாக ஊன்றியதால், கணுக்கால் மற்றும் முழங்காலில் காயம் ஏற்பட்டு வலியால் துடித்தார். மைதானம் ஈரப்பதத்துடன் இருந்ததும் காயத்திற்கு ஒரு காரணமாக இருக்கலாம் என கருதப்படுகிறது.

வலியால் அவர் அவதிப்பட்டதைக் கண்ட மருத்துவக் குழுவினர் உடனடியாக மைதானத்திற்கு விரைந்தனர். முன்னெச்சரிக்கையாக ஸ்ட்ரெச்சர் கொண்டு வரப்பட்டாலும், பிரதிகா ராவல் மற்ற வீராங்கனைகளின் உதவியுடன் மெதுவாக நடந்து மைதானத்தை விட்டு வெளியேறினார். அவருக்குப் பதிலாக அருந்ததி ரெட்டி மாற்று ஃபீல்டராக களமிறங்கினார். பின்னர், இந்திய அணி பேட்டிங் செய்தபோது, பிரதிகாவிற்குப் பதிலாக ஸ்மிருதி மந்தனாவுடன் அமன்ஜோத் கவுர் தொடக்க வீராங்கனையாகக் களமிறங்கினார்.

ஹர்மன்பிரீத் மற்றும் பிசிசிஐயின் அறிக்கை

போட்டிக்குப் பிறகுப் பேசிய இந்திய கேப்டன் ஹர்மன்பிரீத் கவுர், பிரதிகாவின் நிலை குறித்து விளக்கம் அளித்தார். "பிரதிகா மருத்துவக் குழுவின் கண்காணிப்பில் இருக்கிறார். அவர்கள் விரைவில் அவரது காயம் குறித்த முழு விவரத்தையும் அளிப்பார்கள் என்று நம்புகிறேன்," என்று அவர் கூறினார். மேலும், ஆஸ்திரேலியாவுக்கு எதிரான அரையிறுதிப் போட்டிக்கு முன் பிரதிகா குணமடைவார் என்ற நம்பிக்கையையும் அவர் வெளிப்படுத்தினார்.

இதனிடையே, பிசிசிஐயும் தனது அதிகாரப்பூர்வ அறிக்கையை வெளியிட்டது. "இந்திய அணியின் ஆல்-ரவுண்டர் பிரதிகா ராவலுக்கு வங்கதேசத்திற்கு எதிரான முதல் இன்னிங்ஸின் போது பீல்டிங் செய்கையில் முழங்கால் மற்றும் கணுக்காலில் காயம் ஏற்பட்டது. பிசிசிஐ மருத்துவக் குழு அவரது நிலையை உன்னிப்பாகக் கண்காணித்து வருகிறது." என்று தெரிவிக்கப்பட்டுள்ளது.

அரையிறுதிப் போட்டியில் பங்கேற்பாரா?

இந்திய அணி ஏற்கனவே அரையிறுதிக்குத் தகுதி பெற்றுவிட்ட நிலையில், வரும் அக்டோபர் 30 ஆம் தேதி, இதே மைதானத்தில் பலம் வாய்ந்த ஆஸ்திரேலிய அணியை எதிர்கொள்ள உள்ளது. இந்த முக்கியமான போட்டிக்கு முன்னர், அணியின் முக்கிய தொடக்க வீராங்கனை காயமடைந்துள்ளது அணிக்கு பெரும் கவலையை ஏற்படுத்தியுள்ளது.

பிரதிகா ராவல் இந்தத் தொடரில் இந்திய அணியின் முக்கியத் தூணாக விளங்கி வருகிறார். இதுவரை 6 இன்னிங்ஸ்களில் 51.33 என்ற சராசரியுடன் 308 ரன்கள் குவித்து, இந்தத் தொடரில் அதிக ரன்கள் எடுத்த வீராங்கனைகள் பட்டியலில் இரண்டாவது இடத்தில் உள்ளார். சமீபத்தில் நியூசிலாந்துக்கு எதிராக அவர் அடித்த 122 ரன்கள், இந்தியாவின் அரையிறுதி வாய்ப்பை உறுதி செய்தது குறிப்பிடத்தக்கது. அவரது அதிரடியான ஆட்டமும், ஸ்மிருதி மந்தனாவுடனான அவரது தொடக்கக் கூட்டணியும் இந்திய அணிக்கு பெரும் பலமாக இருந்து வருகிறது.

ஒருவேளை பிரதிகாவால் அரையிறுதிப் போட்டியில் விளையாட முடியாமல் போனால், அவருக்குப் பதிலாக உமா சேத்ரி, ராதா யாதவ் அல்லது அமன்ஜோத் கவுர் ஆகியோரில் ஒருவர் தொடக்க வீராங்கனையாகக் களமிறக்கப்படலாம் என எதிர்பார்க்கப்படுகிறது.

வங்கதேசத்திற்கு எதிரான இந்தப் போட்டி மழையால் கைவிடப்பட்டது. இந்திய அணி 8.4 ஓவர்களில் விக்கெட் இழப்பின்றி 57 ரன்கள் எடுத்திருந்தபோது, மீண்டும் மழை குறுக்கிட்டதால் போட்டி கைவிடப்பட்டது.