மகளிர் டி20 உலகக்கோப்பை: பாகிஸ்தானுக்கு எதிராக அதிரடி காட்டிய இந்தியா... ரிச்சா கோஷ் கொடுத்த ட்விஸ்ட்!

மும்பை: மகளிர் டி20 உலகக் கோப்பை கிரிக்கெட் தொடரின் தங்களது தொடக்க ஆட்டத்தில் பாகிஸ்தான் அணிக்கு எதிராக இந்திய மகளிர் அணி முதலில் பேட்டிங் செய்து, நிர்ணயிக்கப்பட்ட 20 ஓவர்களில் 6 விக்கெட் இழப்பிற்கு 170 ரன்கள் குவித்துள்ளது. இறுதி ஓவர்களில் இந்திய வீராங்கனைகள் காட்டிய அதிரடி ஆட்டத்தின் மூலம் இந்த சவாலான இலக்கை எட்ட முடிந்தது.

முதலில் பேட்டிங் செய்த இந்திய அணிக்கு ஆரம்பம் சாதகமாக அமையவில்லை. தொடக்க வீராங்கனை ஷஃபாலி வர்மா மற்றும் ஜெமிமா ரோட்ரிக்ஸ் ஆகியோர் சொற்ப ரன்களில் ஆட்டமிழந்து ஏமாற்றமளித்தனர். எனினும், துணை கேப்டன் ஸ்மிருதி மந்தனா மற்றும் கேப்டன் ஹர்மன்பிரீத் கவுர் ஜோடி இணைந்து அணியை மீட்டெடுத்தது.

பாகிஸ்தான் பந்துவீச்சை நிதானமாகவும் அதே நேரத்தில் தேவைப்படும்போது அதிரடியாகவும் எதிர்கொண்ட இந்த ஜோடி, மூன்றாவது விக்கெட்டுக்கு 91 ரன்கள் சேர்த்தது. நேர்த்தியான ஆட்டத்தை வெளிப்படுத்திய மந்தனா, 44 பந்துகளில் 9 பவுண்டரிகள் மற்றும் 2 சிக்ஸர்களுடன் 68 ரன்கள் குவித்து ஆஃப் ஸ்பின்னர் ரமீன் ஷமீம் பந்துவீச்சில் ஆட்டமிழந்தார். அவரைத் தொடர்ந்து நிதானமாக விளையாடி வந்த கேப்டன் ஹர்மன்பிரீத் கவுர் 36 ரன்கள் எடுத்திருந்தபோது பாத்திமா சனாவின் பந்துவீச்சில் ஆட்டமிழந்தார்.

மகளிர் டி20 உலககோப்பை: கை குலுக்கினார்களா ஹர்மன்பிரீத் - பாத்திமா சனா?பரபரப்பு பின்னணி!

ஹர்மன்பிரீத் கவுர் அவுட்டான பிறகு, தீப்தி சர்மா மற்றும் ரிச்சா கோஷ் ஆகியோர் ஜோடி சேர்ந்தனர். பாகிஸ்தான் அணி மெதுவான ஓவர் ரேட் காரணமாக அபராதத்தை எதிர்கொண்டது. இதனால் கடைசி 2 ஓவர்களில் உள்வட்டத்திற்கு வெளியே 3 ஃபீல்டர்களை மட்டுமே நிறுத்த அனுமதிக்கப்பட்டது. இதனைச் சரியாகப் பயன்படுத்திய ரிச்சா கோஷ் மைதானத்தின் நாலாபுறமும் பந்துகளைச் சிதறடித்தார். தஸ்மியா ருபாப் வீசிய 19-வது ஓவரில் ஒரு சிக்ஸர், நான்கு பவுண்டரிகளுடன் இந்திய அணி 23 ரன்களைக் குவித்தது.

கடைசி ஓவரை கேப்டன் பாத்திமா சனா வீசினார். அதிரடியாக விளையாடி வந்த ரிச்சா கோஷ் (14 பந்துகளில் 32 ரன்கள்) இவரது பந்துவீச்சில் போல்டானார். கடைசிப் பந்தில் ஸ்ரேயங்கா பாட்டீல் எல்.பி.டபிள்யூ முறையில் அவுட் கேட்கப்பட்டார்.

IND Vs AFG: 148 கிமீ வேகம், 6.5 அடி உயரம்: குர்னூர் பிரார் அசாத்திய திறமையை பாராட்டிய வசீம் ஜாபர்!

ஆனால் ரிவியூவில் பந்து அவரது கிளவுஸில் பட்டது உறுதியானதால் இந்தியாவுக்கு ஒரு ரன் கிடைத்தது. கடைசி ஓவரில் 15 ரன்கள் கிடைக்க, இந்திய அணி 170 ரன்கள் என்ற வலுவான ஸ்கோரை எட்டியது. கடைசி 2 ஓவர்களில் மட்டும் இந்திய அணி 38 ரன்கள் குவித்தது குறிப்பிடத்தக்கது.பாகிஸ்தான் மகளிர் அணி தரப்பில் கேப்டன் பாத்திமா சனா 4 ஓவர்களில் 33 ரன்கள் கொடுத்து 2 விக்கெட்டுகளை வீழ்த்தினார்.