2026ஆம் ஆண்டு விளையாட்டு போட்டி அட்டவணை: டி20 உலககோப்பை முதல் FIFA கால்பந்து உலககோப்பை வரை விவரம்

சென்னை: 2026 ஆம் ஆண்டு இந்திய விளையாட்டுத் துறைக்கு ஒரு முக்கியமான ஆண்டாக அமைய உள்ளது. உலக கோப்பைகள், 2028 லாஸ் ஏஞ்சல்ஸ் ஒலிம்பிக்கிற்கான தகுதி, என பெரும் எதிர்பார்ப்புகள் நிறைந்த ஆண்டாக இது திகழும். புதிய மற்றும் அனுபவம் வாய்ந்த இந்திய வீரர், வீராங்கனைகள் தயாராகி வரும் நிலையில், இந்தப் பரபரப்பான காலெண்டரின் முக்கிய அம்சங்களை இங்கு காணலாம்.

ஜனவரி-பிப்ரவரி-மார்ச்: ஆண்டின் முதல் காலாண்டு கிரிக்கெட் மையமாக இருக்கும். 50 ஓவர் அண்டர்-19 உலகக் கோப்பை ஜனவரி 15 முதல் பிப்ரவரி 6 வரை ஜிம்பாப்வே மற்றும் நமீபியாவில் நடக்கிறது. வைபவ் சூர்யவன்ஷி, ஆயுஷ் மகாத்ரே போன்ற இளம் நட்சத்திரங்கள் கவனிக்கப்படுவார்கள்.

இளையோருக்கான போட்டி முடிந்த மறுநாள், மூத்த ஆண்கள் அணி தங்களது டி20 உலகக் கோப்பையைத் தக்கவைக்கக் களமிறங்கும். இப்போட்டி பிப்ரவரி 7 முதல் மார்ச் 8 வரை இலங்கையிலும் சில போட்டிகளுடன் இந்தியாவில் நடைபெறுகிறது. ஆஸ்திரேலியன் ஓபன் டென்னிஸ் (ஜனவரி 12 - பிப்ரவரி 1) தொடர் நடக்கும்.

ஆல் இங்கிலாந்து பேட்மின்டன் சாம்பியன்ஷிப்ஸ் மார்ச் 3 முதல் உன்னிப்பாகக் கவனிக்கப்படும். காயம் குணமடைந்த பி.வி. சிந்துவும் மற்ற இந்திய வீரர்களும் ஏமாற்றமான சீசனுக்குப் பிறகு எழுச்சி பெற முயற்சிப்பார்கள். நீண்ட இடைவெளிக்குப் பிறகு தேசிய அணி தகுதி பெற்ற ஏஎஃப்சி மகளிர் ஆசியக் கோப்பை மார்ச் 1 அன்று ஆஸ்திரேலியாவில் தொடங்குகிறது.

ஏப்ரல்-மே-ஜூன்: மார்ச் இறுதியில் ஐபிஎல் போட்டிகள் தொடங்கி மே இறுதி வரை நடைபெறும். சதுரங்க கேண்டிடேட்ஸ் போட்டி சைப்ரஸில் மார்ச் 28 முதல் ஏப்ரல் 16 வரை நடக்கிறது. உலக சாம்பியன் டி. குகேஷுக்கு சவாலியைத் தீர்மானிக்கும் இப்போட்டியில் ஆர். பிரக்ஞானந்தா, ஆர். வைஷாலி, கோனேரு ஹம்பி, திவ்யா தேஷ்முக் பங்கேற்கின்றனர். ஆசிய குத்துச்சண்டை சாம்பியன்ஷிப் மங்கோலியாவில் மார்ச் 28 முதல் ஏப்ரல் 11 வரை நடைபெற உள்ளது.

ஆசிய பளுதூக்குதல் சாம்பியன்ஷிப் அகமதாபாத்தில் ஏப்ரல் 1 முதல் 10 வரை நடக்க, தொடர்ந்து தாமஸ் மற்றும் உபேர் கோப்பை பேட்மின்டன் போட்டிகள் ஏப்ரல் 24 முதல் மே 3 வரை இடம்பெறுகின்றன. இந்திய அணிகள் தகுதி பெற்ற ஐடிடிஎஃப் உலக அணி டேபிள் டென்னிஸ் சாம்பியன்ஷிப்ஸ் லண்டனில் ஏப்ரல் 28 முதல் மே 10 வரை நடைபெறும்.

ஜூன் மாதத்தில், ஹர்மன்பிரீத் கவுர் தலைமையிலான இந்திய மகளிர் டி20 உலகக் கோப்பை அணிமீது கவனம் திரும்பும். 2025 ஒருநாள் உலகக் கோப்பைப் பட்டத்துடன், டி20 பட்டத்தையும் வெல்ல இலக்கு வைப்பார்கள். மே மாதத்தில் டயமண்ட் லீக் போட்களுடன் தடகள சீசன் தொடங்க, நீரஜ் சோப்ரா காமன்வெல்த், ஆசியப் போட்டிகளுக்குத் தயாராவார்.

சர்வதேச அளவில் பிரெஞ்சு ஓபன் (மே), விம்பிள்டன் (ஜூன்) மற்றும் ஃபிஃபா உலகக் கோப்பை (ஜூன்-ஜூலை, அமெரிக்கா, மெக்ஸிகோ, கனடா) போட்டிகளும் ரசிகர்களை ஈர்க்கும்.

ஜூலை-ஆகஸ்ட்-செப்டம்பர்: ஜூலை 23 முதல் ஆகஸ்ட் 2 வரை நடைபெறும் காமன்வெல்த் விளையாட்டுப் போட்டிகள் இந்தியாவில் தடகளம், குத்துச்சண்டை, பளுதூக்குதல் துறைகளில் கவனம் பெறும் முக்கிய நிகழ்வாகும். குறைவான பட்ஜெட் காரணமாக, துப்பாக்கிச் சுடுதல், மல்யுத்தம் போன்ற பலப் பதக்கம் ஈட்டும் பிரிவுகள் நிகழ்ச்சி நீக்கப்பட்டுள்ளன.

ஆகஸ்ட் 17 முதல் டெல்லியில் உலக பேட்மின்டன் சாம்பியன்ஷிப்ஸ் நடைபெறும். அதற்கு சில நாட்கள் முன், ஆண்கள் மற்றும் பெண்கள் ஹாக்கி உலகக் கோப்பை ஆகஸ்ட் 14 அன்று பெல்ஜியம், நெதர்லாந்தில் தொடங்குகிறது. ஆண்கள் அணி ஆசியக் கோப்பையை வென்று தகுதி பெற்றுவிட்ட நிலையில், பெண்கள் அணி மார்ச் தகுதிச் சுற்றில் போராட வேண்டும்.

அதே நேரத்தில், புவனேஷ்வரில் உலக தடகள கண்ட பயிற்சி சுற்று வெள்ளி நிலை போட்டி ஆகஸ்ட் 22 அன்று தொடங்கி, இந்தியாவின் காலெண்டரில் முக்கியத்துவம் பெறும். செப்டம்பர் மாதம் ஆசிய விளையாட்டுப் போட்டிகள் நடக்கும். ஜப்பானின் ஐச்சி-நகோயாவில் செப்டம்பர் 19 முதல் அக்டோபர் 4 வரை நடைபெறும் இப்போட்டிகள், சில ஆரம்பகால ஒலிம்பிக் இடங்களை உறுதிப்படுத்தும்.

ஆசியப் போட்டிகளில் ஹாக்கியில் தங்கம் வெல்வோர் லாஸ் ஏஞ்சல்ஸ் ஒலிம்பிக்கிற்கு தகுதி பெறுவார்கள். துப்பாக்கி சுடுதலில் ஒதுக்கீடு இடங்களும் உண்டு. இதற்கு முன்னதாக, செப்டம்பர் 4, 5 தேதிகளில் பிரஸ்ஸல்ஸில் டயமண்ட் லீக் இறுதிப் போட்டிகள் (தடகளம்) நடைபெறும்.

2025 ஆம் ஆண்டு ஆண்கள் மற்றும் பெண்கள் பிரிவுகளில் இந்தியா தங்கப் பதக்கம் வென்ற 46வது செஸ் ஒலிம்பியாட், செப்டம்பரில் தாஷ்கண்டில் நடைபெறும். இருப்பினும் அதன் அதிகாரப்பூர்வ தேதிகள் இன்னும் உறுதிப்படுத்தப்படவில்லை.

அக்டோபர்-நவம்பர்-டிசம்பர்: ஆண்டின் கடைசி காலாண்டில், பஹ்ரைனில் உலக மல்யுத்த சாம்பியன்ஷிப் அக்டோபர் 24 முதல். அதைத் தொடர்ந்து, அக்டோபர் 27 முதல் நவம்பர் 8 வரை சீனாவில் உலக பளுதூக்குதல் சாம்பியன்ஷிப் நடக்கிறது.

நவம்பர் 1 முதல், கத்தாரின் தோஹாவில் ISSF உலக சாம்பியன்ஷிப் போட்டிகளில் (ரைபிள்/பிஸ்டல்/ஷாட்கன்) துப்பாக்கி சுடும் வீரர்கள் ஒலிம்பிக் ஒதுக்கீடு இடங்களை நோக்குவார்கள். டிசம்பர் மாதம் உலக சதுரங்க சாம்பியன்ஷிப் போட்டிகள் ஆதிக்கம் செலுத்தும். இதற்கான தேதி மற்றும் இடம் இன்னும் முடிவு செய்யப்படவில்லை.

இன்னும் அறிவிக்கப்படாத திட்டங்கள்: நீரஜ் சோப்ராவின் 'NC கிளாசிக்' நிகழ்வு, கடந்த ஆண்டு பெங்களூருவில் அறிமுகமானது. ஆண்டுதோறும் நடைபெறும் என்பதால், 2026லும் எதிர்பார்க்கப்படுகிறது. இதன் கால அட்டவணை இன்னும் வெளியிடப்படவில்லை. 2026 ஆம் ஆண்டுக்கான உலக குத்துச்சண்டை கோப்பைகளின் அட்டவணையும் உறுதிப்படுத்தப்படவில்லை.