IND-A vs SA-A 2வது டெஸ்ட் எத்தனை மணிக்கு? எந்த ஸ்ட்ரீமிங்கில் பார்ப்பது? டிவியில் பார்க்க முடியுமா?

பெங்களூரு: இந்தியா ஏ மற்றும் தென்னாப்பிரிக்கா ஏ அணிகளுக்கு இடையேயான இரண்டாவது அதிகாரப்பூர்வமற்ற டெஸ்ட் போட்டி, பெங்களூருவில் உள்ள பிசிசிஐயின் சிறப்புப் பயிற்சி மையத்தில் இன்று (வியாழக்கிழமை, நவம்பர் 6) தொடங்குகிறது. இந்திய அணியின் முன்னணி வீரர்களான ரிஷப் பண்ட், கே.எல். ராகுல், முகமது சிராஜ் ஆகியோர் களமிறங்குவதால், இந்தப் போட்டி மிகுந்த எதிர்பார்ப்பை ஏற்படுத்தியுள்ளது.

இந்தப் போட்டியிலப் பங்கேற்க உள்ள இந்தியா, தென்னாப்பிரிக்கா அணியின் முக்கிய வீரர்கள் யார்? இந்தப் போட்டி எத்தனை மணிக்கு துவங்கும்? எந்த ஸ்ட்ரீமிங் தளத்தில் பார்ப்பது? தொலைக்காட்சியில் ஒளிபரப்பப்படும? என்பது குறித்து காணலாம்.

முக்கிய வீரர்களுக்கு இது ஒரு சோதனைக்களம்:

முதல் போட்டியில் அபாரமாக விளையாடிய இந்தியா ஏ அணி கேப்டன் ரிஷப் பண்ட், அடுத்து நடைபெற இருக்கும் தென்னாப்பிரிக்காவுக்கு எதிரான டெஸ்ட் தொடருக்குத் தயாராகும் விதமாக, இந்தப் போட்டியிலும் தனது சிறப்பான ஆட்டத்தைத் தொடர முனைப்பு காட்டுவார். அதேபோல், கே.எல். ராகுல், முகமது சிராஜ் மற்றும் குல்தீப் யாதவ் ஆகியோரும் நீண்ட நாட்களுக்குப் பிறகு டெஸ்ட் கிரிக்கெட்டில் தங்களை மீண்டும் நிரூபிக்க இந்தக் களம் உதவும்.

தென்னாப்பிரிக்க அணியைப் பொறுத்தவரை, காயம் காரணமாக பாகிஸ்தான் தொடரைத் தவறவிட்ட அந்த அணியின் முக்கிய வீரர் டெம்பா பவுமா, இந்தப் போட்டியின் மூலம் மீண்டும் களத்திற்குத் திரும்புகிறார். இது அந்த அணிக்குக் கூடுதல் பலத்தைச் சேர்க்கும்.

இந்திய அணியில், காயத்திலிருந்து மீண்டு வந்துள்ள வேகப்பந்து வீச்சாளர் ஆகாஷ் தீப், தென்னாப்பிரிக்காவுக்கு எதிரான முக்கியத் தொடருக்குத் தேர்வாகியுள்ள நிலையில், இந்தப் போட்டியின் மூலம் தனது பந்துவீச்சு ஃபார்மை மீட்டெடுக்க முயற்சிப்பார்.

முதல் போட்டியில் அடைந்த தோல்விக்கு பதிலடி கொடுத்து, தொடரைச் சமன் செய்யும் முனைப்புடன் தென்னாப்பிரிக்கா ஏ அணி களமிறங்கும் என்பதால், இந்திய அணியின் நட்சத்திர வீரர்களுக்கு இது ஒரு கடுமையான சோதனையாக இருக்கும்.

இந்தியா ஏ vs தென்னாப்பிரிக்கா ஏ 2வது டெஸ்ட்: அணிகள் விவரம்

இந்தியா ஏ அணி:

ரிஷப் பண்ட் (கேப்டன், விக்கெட் கீப்பர்), கே.எல். ராகுல், துருவ் ஜுரல் (விக்கெட் கீப்பர்), சாய் சுதர்சன் (துணை கேப்டன்), தேவ்தத் படிக்கல், ருதுராஜ் கெய்க்வாட், ஹர்ஷ் துபே, தனுஷ் கோட்டியான், மனவ் சுதர், கலீல் அகமது, குர்னூர் ப்ரார், அபிமன்யு ஈஸ்வரன், பிரசித் கிருஷ்ணா, முகமது சிராஜ், ஆகாஷ் தீப், குல்தீப் யாதவ்.

தென்னாப்பிரிக்கா ஏ அணி:

மார்கஸ் அக்கெர்மேன், டெம்பா பவுமா (கேப்டன்), ஒகுஹ்லே செல, ஜுபைர் ஹம்சா, ஜோர்டான் ஹெர்மன், ரூபின் ஹெர்மன், ரிவால்டோ மூன்சாமி, ஷேபோ மொரேக்கி, மிஹ்லாலி எம்போங்வானா, லெசெகோ செனோக்வானே, பிரெனலன் சுப்ராயன், கைல் சிம்மண்ட்ஸ், ஷேபோ நட்வாண்ட்வா, ஜேசன் ஸ்மித், தியான் வான் வூரன், கோடி யூசுப்.

போட்டி எப்போது, எங்கே, எப்படிப் பார்ப்பது?

போட்டி தொடங்கும் நேரம்: இந்தியா ஏ மற்றும் தென்னாப்பிரிக்கா ஏ அணிகளுக்கு இடையேயான இரண்டாவது அதிகாரப்பூர்வமற்ற டெஸ்ட் போட்டி, இந்திய நேரப்படி இன்று (வியாழக்கிழமை, நவம்பர் 6) காலை 9:30 மணிக்குத் தொடங்குகிறது.

நேரடி ஒளிபரப்பு: இந்தப் போட்டி தொலைக்காட்சியில் நேரடியாக ஒளிபரப்பு செய்யப்படாது. இருப்பினும், கிரிக்கெட் ரசிகர்கள் ஜியோஸ்டார் செயலி மற்றும் இணையதளத்தில் போட்டியை நேரலையில் கண்டு களிக்கலாம்.