சுதந்திர தினத்தில் மாபெரும் வரலாற்றுச் சாதனை செய்த இந்திய அணி.. உலகிலேயே 600 டெஸ்ட் ஆடிய 3வது அணி

காலே: இலங்கை அணிக்கு எதிரான முதலாவது டெஸ்ட் போட்டியில் சுதந்திர தினமான ஆகஸ்ட் 15 அன்று களமிறங்கியதன் மூலம், சர்வதேச டெஸ்ட் கிரிக்கெட் வரலாற்றில் 600 போட்டிகளில் விளையாடிய 3வது அணி என்ற வரலாற்று சாதனையை இந்திய கிரிக்கெட் அணி படைத்துள்ளது. இங்கிலாந்து (1097 போட்டிகள்) மற்றும் ஆஸ்திரேலியா (883 போட்டிகள்) ஆகிய அணிகளுக்கு அடுத்தபடியாக இந்த மாபெரும் மைல்கல்லை எட்டிய பெருமையை இந்தியா பெற்றுள்ளது.

இதுவரை இந்திய அணி விளையாடியுள்ள 599 டெஸ்ட் போட்டிகளில், 186 போட்டிகளில் வெற்றியும், 188 போட்டிகளில் தோல்வியும், 224 போட்டிகளில் டிராவும், 1 டை-யும் பெற்றுள்ளது. டெஸ்ட் கிரிக்கெட்டில் அதிக வெற்றிகளை குவித்த அணிகளின் வரிசையில் ஆஸ்திரேலியா (426 வெற்றிகள்), இங்கிலாந்து (405), தென் ஆப்பிரிக்கா (191) மற்றும் வெஸ்ட் இண்டீஸ் (187) ஆகிய நாடுகளுக்கு அடுத்தபடியாக இந்தியா 5வது இடத்தில் உள்ளது.

கடந்த 1932 ஆம் ஆண்டு சி.கே.நாயுடு தலைமையில் லண்டன் லார்ட்ஸ் மைதானத்தில் இங்கிலாந்துக்கு எதிராக இந்தியா தனது முதல் டெஸ்ட் போட்டியில் விளையாடியது. முதல் போட்டியில் இருந்து 100வது டெஸ்ட் போட்டியை எட்ட இந்தியாவிற்கு 35 ஆண்டுகள் தேவைப்பட்டது. ஆனால், அதன் பிறகு அடுத்தடுத்த 100 போட்டிகளை எட்டுவதற்கான காலம் கணிசமாக குறைந்தது. குறிப்பாக 400வது (2006), 500வது (2016) மற்றும் தற்போது 600வது (2026) டெஸ்ட் என கடந்த மூன்று 100 போட்டிகள் கொண்ட மைல்கல்களை தலா 10 ஆண்டுகளில் இந்திய அணி வேகமாக எட்டியுள்ளது.

IND vs SL முதல் டெஸ்ட் பிளேயிங் 11-இல் ரிஸ்க் எடுத்த இந்திய அணி.. 6வது பவுலர் யாருமே இல்லை!

முன்னதாக, கடந்த 2016 ஆம் ஆண்டு கான்பூரில் நியூசிலாந்துக்கு எதிராக விளையாடிய தனது 500வது டெஸ்ட் போட்டியில் இந்தியா 197 ரன்கள் வித்தியாசத்தில் அபார வெற்றி பெற்றது. கடந்த 1996ல் நடந்த 300வது டெஸ்டில் தென் ஆப்பிரிக்காவையும், 2006ல் நடந்த 400வது டெஸ்டில் வெஸ்ட் இண்டீசையும் இந்தியா வீழ்த்தியிருந்தது. தற்போது சுதந்திர தினமான இன்று சுப்மன் கில் தலைமையில் காலே மைதானத்தில் 600வது டெஸ்ட் போட்டியில் களமிறங்கியுள்ளது. இது இந்திய கிரிக்கெட் வரலாற்றில் மிக முக்கியமான தருணமாக அமைந்தது.