IND vs NZ: கம்பீர் வீரர் என்பதால் ஆயுஷ் பதோனி தேர்வா? முட்டாள்தனமான முடிவு- ஸ்ரீகாந்த் தாக்கு

மும்பை: நியூசிலாந்துக்கு எதிரான ஒருநாள் தொடருக்கான இந்திய அணியில் ஆயுஷ் பதோனி சேர்க்கப்பட்டுள்ளது கிரிக்கெட் உலகில் பல விமர்சனங்களை எழுப்பியுள்ளது. பேட்டிங் ஆல்ரவுண்டரும் ஆஃப்-ஸ்பின் பந்துவீச்சாளருமான பதோனி, அண்மையில் விஜய் ஹசாரே டிராபி போட்டிகளில் ஃபார்மில் இல்லை. காயம் காரணமாக விலகிய வாஷிங்டன் சுந்தருக்குப் பதிலாகவே அவர் அணிக்குள் வந்தார்.

இந்தத் தேர்வை முன்னாள் இந்திய கிரிக்கெட் வீரரும் பிசிசிஐ-யின் முன்னாள் தலைமைக் தேர்வாளருமான கிருஷ்ணமாச்சாரி ஸ்ரீகாந்த் "முட்டாள்தனம்" என்று சாடினார். இந்திய அணியின் தலைமைப் பயிற்சியாளர் கவுதம் கம்பீரையும் மறைமுகமாக விமர்சித்தார்.

பதோனியின் தேர்வு குறித்து தனது யூடியூப் சேனலில் பேசிய ஸ்ரீகாந்த், "அக்சர் படேல், பதோனி, நிதீஷ் ரெட்டி மற்றும் ருதுராஜ் கெய்க்வாட் ஆகியோரில் யார் உண்மையில் அணியில் இருக்க வேண்டும்? பதோனி LSG-யில் விளையாடினார், கம்பீர் அங்கு வழிகாட்டியாக இருந்தார். வேறு எந்தக் காரணத்தையும் நான் பார்க்கவில்லை. என்னவாக இருக்க முடியும்? எந்த அடிப்படையில்? தேர்வில் ஒரு சிறிதாவது புத்திசாலித்தனம் வேண்டும்"

"இது என்ன மாதிரியான வாய்ப்பு? இரண்டு மூன்று லாரிகளைக் கொண்டு வாருங்கள், அவற்றை எடுத்துக்கொண்டு போய் கதவை உடைக்கலாம்," என ஸ்ரீகாந்த் ஆவேசமாக விமர்சித்தார். ஐபிஎல் செயல்பாடுகள் ஒருநாள் போட்டித் தேர்வுக்கு அளவுகோலாகக் கூடாது என்று வாதிட்ட அவர், "இந்தச் செயல்திறனுடன் ஆயுஷ் படோனிக்கு வாய்ப்பே இல்லை. ஐபிஎல்-லில் அவரது சாதனைப் பதிவு என்ன? ஐபிஎல் மற்றும் ஒருநாள் கிரிக்கெட் இரண்டும் வேறுபட்டவை. அவர் பெரிய அளவில் எதையும் சாதிக்கவில்லை," என்றார்.

"ஆட்டத்தின் போக்கை மாற்றியமைக்கும் திறன் அவரிடம் இல்லை. ஆறாவது இடத்தில் வந்து அவரால் சிக்ஸர்கள் அடிக்க முடியுமா? எனக்குப் புரியவில்லை," என படோனியின் பேட்டிங் திறன் குறித்து ஸ்ரீகாந்த் சந்தேகம் எழுப்பினார்.

மேலும், படோனியை ஒரு பந்துவீச்சு ஆல்ரவுண்டராகக் கருதுவது குறித்தும் ஸ்ரீகாந்த் கேள்வி எழுப்பினார். "இது என்ன முட்டாள்தனம்? இவர் எப்படி பந்துவீச்சு ஆல்ரவுண்டராகக் கருதப்படுகிறார்? ஒரு ஆல்ரவுண்டர் தேவைப்பட்டால், ஏன் அக்சர் படேலைக் கொண்டுவரக்கூடாது? அவர் அனைத்து வடிவப் போட்டிகளிலும் ஒரு உண்மையான ஆல்ரவுண்டர்" என்று அவர் அழுத்தமாக விளக்கினார்.

ஆயுஷ் பதோனி முதல் தர கிரிக்கெட்டில் கிட்டத்தட்ட 58 சராசரியுடன் செயல்பட்டுள்ளார். ஆனால், லிஸ்ட் ஏ போட்டிகளில் அவரது சராசரி 36.47 ஆகக் குறைந்துள்ளது. இருப்பினும், இந்தியா 'ஏ' அணிக்காக அதிகாரப்பூர்வமற்ற ஒருநாள் போட்டிகளில் சில அரை சதங்களை அடித்துள்ளார் என்பதும் குறிப்பிடத்தக்கது.