2026 U19 உலகக் கோப்பை இந்திய அணி.. இளம் சிஎஸ்கே வீரருக்கு கேப்டன் பதவி.. வைபவ் சூர்யவன்ஷியும் உண்டு

மும்பை: 2026-ம் ஆண்டு நடைபெறவுள்ள ஐசிசி 19 வயதுக்கு உட்பட்டோருக்கான (U19) ஆடவர் உலகக் கோப்பை கிரிக்கெட் தொடருக்கான இந்திய அணியை பிசிசிஐ-யின் ஜூனியர் தேர்வுக் குழு அதிகாரப்பூர்வமாக அறிவித்துள்ளது. சென்னை சூப்பர் கிங்ஸ் அணியின் துவக்க வீரரும், மும்பையைச் சேர்ந்தவருமான இளம் வீரர் ஆயுஷ் மத்ரே இந்திய அணியின் கேப்டனாக நியமிக்கப்பட்டுள்ளார். கிரிக்கெட் உலகில் பெரும் எதிர்பார்ப்பை ஏற்படுத்தியுள்ள இளம் வீரர் வைபவ் சூர்யவன்ஷியும் அணியில் இடம் பிடித்துள்ளார்.

ஐசிசி ஜூனியர் உலகக் கோப்பைத் தொடரானது ஜிம்பாப்வே மற்றும் நமீபியா ஆகிய நாடுகளில் நடைபெறவுள்ளது. இந்தத் தொடர் 2026 ஜனவரி 15-ம் தேதி தொடங்கி பிப்ரவரி 6-ம் தேதி வரை நடைபெறும். மொத்தம் 16 அணிகள் பங்கேற்கும் இந்தத் தொடரில், அணிகள் நான்கு பிரிவுகளாகப் பிரிக்கப்பட்டு லீக் சுற்றுப் போட்டிகள் நடைபெறும். அதைத் தொடர்ந்து சூப்பர் சிக்ஸ், அரையிறுதி மற்றும் இறுதிப் போட்டிகள் ஹராரேவில் நடைபெறும்.

இந்திய அணியின் பிரிவு மற்றும் அட்டவணை:

உலகக் கோப்பை வரலாற்றில் 5 முறை சாம்பியன் பட்டம் வென்ற மிகவும் வெற்றிகரமான அணியான இந்தியா, இம்முறை 'பி' பிரிவில் இடம் பெற்றுள்ளது. இந்திய அணியுடன் நியூசிலாந்து, அமெரிக்கா மற்றும் வங்கதேசம் ஆகிய அணிகள் அதே பிரிவில் உள்ளன.

இந்திய அணியின் லீக் சுற்று ஆட்டங்கள் அனைத்தும் ஜிம்பாப்வேயின் புலவாயோவில் உள்ள குயின்ஸ் ஸ்போர்ட்ஸ் கிளப் மைதானத்தில் நடைபெறவுள்ளன.

ஜனவரி 15: இந்தியா vs அமெரிக்கா
ஜனவரி 17: இந்தியா vs வங்கதேசம்
ஜனவரி 24: இந்தியா vs நியூசிலாந்து

வைபவ் சூர்யவன்ஷி மீது திரும்பிய பார்வை:

இந்த அணியில் பீகாரைச் சேர்ந்த 14 வயதான இடதுகை பேட்ஸ்மேன் வைபவ் சூர்யவன்ஷி இடம் பிடித்திருப்பது கிரிக்கெட் ரசிகர்களிடையே பெரும் உற்சாகத்தை ஏற்படுத்தியுள்ளது. மிக இளம் வயதிலேயே ரஞ்சி கோப்பையில் அறிமுகமானது மட்டுமின்றி, 2025 ஐபிஎல் ஏலத்தில் ராஜஸ்தான் ராயல்ஸ் அணியால் வாங்கப்பட்டு, அதிவேக சதம் அடித்த அவர், அதன் பின்னர் தான் பங்கேற்ற அனைத்து தொடர்களிலும் அதிரடியாக ரன் குவித்துள்ளார்.

கேப்டன் மற்றும் துணை கேப்டனுக்கு காயம் - முக்கிய அப்டேட்:

உலகக் கோப்பை தொடருக்கு முன்னதாக, இந்திய யு-19 அணி தென்னாப்பிரிக்காவுக்குச் சென்று 3 ஒருநாள் போட்டிகள் கொண்ட தொடரில் விளையாட உள்ளது. இது உலகக் கோப்பைக்கான முன்னோட்டமாக அமையும். எனினும், அணியின் கேப்டனாக அறிவிக்கப்பட்டுள்ள ஆயுஷ் மத்ரே மற்றும் துணை கேப்டன் விஹான் மல்ஹோத்ரா ஆகியோர் தற்போது மணிக்கட்டு காயத்தால் அவதிப்பட்டு வருகின்றனர்.

இதனால், இவர்கள் இருவரும் தென்னாப்பிரிக்காவுக்கு எதிரான பயிற்சித் தொடரில் பங்கேற்க மாட்டார்கள் என்று பிசிசிஐ தெரிவித்துள்ளது. பெங்களூருவில் உள்ள தேசிய கிரிக்கெட் அகாடமியில் (NCA) சிகிச்சை பெற்று வரும் இவர்கள், உலகக் கோப்பை தொடங்கும் போது அணியுடன் இணைவார்கள்.

உலகக் கோப்பைக்கான முழு இந்திய அணி விவரம்:

ஆயுஷ் மத்ரே (கேப்டன்)
விஹான் மல்ஹோத்ரா (துணை கேப்டன்)
வைபவ் சூர்யவன்ஷி
ஆரோன் ஜார்ஜ்
வேதாந்த் திரிவேதி
அபிஞான் குண்டு (விக்கெட் கீப்பர்)
ஹர்வன்ஷ் சிங் (விக்கெட் கீப்பர்)
ஆர்.எஸ். அம்ரிஷ்
கனிஷ்க் சவுகான்
கிலன் ஏ படேல்
முகமது எனான்
ஹெனில் படேல்
டி. தீபேஷ்
கிஷன் குமார் சிங்
உத்தவ் மோகன்

வரலாற்றுச் சாதனை படைக்குமா இந்தியா?

19 வயதுக்கு உட்பட்டோருக்கான உலகக் கோப்பையில் இந்தியா இதுவரை 2000, 2008, 2012, 2018 மற்றும் 2022 ஆகிய ஆண்டுகளில் கோப்பையை வென்றுள்ளது. 5 முறை சாம்பியனான இந்தியா, இளம் ரத்தங்களுடன் 6-வது முறையாக கோப்பையை வெல்லும் முனைப்பில் ஜிம்பாப்வே பயணிக்கிறது.