IND vs AUS 3வது ஒருநாள் போட்டி எப்போது துவங்கும்? எந்த சேனல், ஸ்ட்ரீமிங் தளத்தில் பார்க்கலாம்?

சிட்னி: ஆஸ்திரேலியாவுக்கு எதிரான ஒருநாள் தொடரை ஏற்கனவே 2-0 என்ற கணக்கில் இழந்துவிட்ட நிலையில், இந்திய அணி தனது கடைசி மற்றும் மூன்றாவது ஒருநாள் போட்டியில் ஆறுதல் வெற்றி பெறும் முனைப்புடன் அக்டோபர் 25 அன்று சிட்னி மைதானத்தில் களம் காண்கிறது. இந்தப் போட்டி எப்போது துவங்கும்? டாஸ் எத்தனை மணிக்கு? எந்த சேனல், மொபைல் தளத்தில் பார்ப்பது? இந்த தொடரில் முதல் இரண்டு போட்டிகளில் நடந்தது என்ன? உள்ளிட்ட தகவல்களை காணலாம்.

மூன்று போட்டிகள் கொண்ட இந்த ஒருநாள் தொடரில், பெர்த் மற்றும் அடிலெய்டு ஆகிய இடங்களில் நடைபெற்ற முதல் இரண்டு போட்டிகளிலும் ஆஸ்திரேலிய அணி வெற்றி பெற்று தொடரைக் கைப்பற்றியுள்ளது. அடிலெய்டு ஓவல் மைதானத்தில் நடந்த இரண்டாவது போட்டியில், இந்திய அணியின் பேட்டிங் மற்றும் பந்துவீச்சு இரண்டுமே எதிர்பார்த்த அளவுக்கு சிறப்பாக அமையவில்லை. இதுவே தோல்விக்கு முக்கிய காரணமாக அமைந்தது.

கடந்த போட்டியில் நடந்தது என்ன?

அடிலெய்டு போட்டியில் ஆஸ்திரேலிய அணியின் பந்துவீச்சாளர்களான ஆடம் ஜாம்பா 4 விக்கெட்களையும், சேவியர் பார்ட்லெட் 3 விக்கெட்களையும் மற்றும் மிட்செல் ஸ்டார்க் 2 விக்கெட்களையும் வீழ்த்தினர். அவர்களின் சிறப்பான பந்துவீச்சால், இந்திய அணி 50 ஓவர்களில் 9 விக்கெட் இழப்பிற்கு 264 ரன்கள் மட்டுமே எடுத்தது. இந்திய அணியில் முன்னாள் கேப்டன் ரோஹித் சர்மா 73 ரன்கள், ஸ்ரேயாஸ் ஐயர் 61 ரன்கள் மற்றும் அக்சர் படேல் 44 ரன்கள் எடுத்து ஓரளவிற்குப் பங்களித்தனர்.

பின்னர் ஆடிய ஆஸ்திரேலிய அணிக்கு ஆரம்பத்தில் அதிர்ச்சி காத்திருந்தது. இந்தியப் பந்துவீச்சாளர்கள் விக்கெட்டுகளை வீழ்த்தினாலும், இந்திய ஃபீல்டர்கள் பல கேட்ச்களை தவறவிட்டது அணிக்குப் பெரும் பின்னடைவாக அமைந்தது. இதனைப் பயன்படுத்திக் கொண்ட மேத்யூ ஷார்ட் 74 ரன்கள் எடுத்தும், கூப்பர் கானோலி 61* ரன்கள் எடுத்தும் ஆஸ்திரேலிய அணியை வெற்றிப் பாதைக்கு அழைத்துச் சென்று, தொடரில் 2-0 என்ற கணக்கில் முன்னிலை பெறச் செய்தனர்.

போட்டி எப்போது, எங்கே?

இந்தியா மற்றும் ஆஸ்திரேலியா அணிகளுக்கு இடையேயான மூன்றாவது மற்றும் கடைசி ஒருநாள் போட்டி, சிட்னியில் உள்ள புகழ்பெற்ற சிட்னி கிரிக்கெட் மைதானத்தில் (SCG) அக்டோபர் 25, சனிக்கிழமை அன்று நடைபெறுகிறது.

போட்டி தொடங்கும் நேரம்: இந்திய நேரப்படி காலை 9:00 மணி.
டாஸ் நேரம்: இந்திய நேரப்படி காலை 8:30 மணி.

போட்டியை நேரலையில் காண்பது எப்படி?

தொலைக்காட்சி: இந்த போட்டியானது ஸ்டார் ஸ்போர்ட்ஸ் நெட்வொர்க் தொலைக்காட்சியில் நேரடியாக ஒளிபரப்பு செய்யப்படும்.

ஆன்லைன் (Live Streaming): ஜியோ ஹாட்ஸ்டார் (Jio Hotstar) செயலி மற்றும் இணையதளத்தில் போட்டியின் நேரலையை ரசிகர்கள் கண்டு களிக்கலாம்.

இரு அணிகளின் முழு விவரம்:

இந்திய அணி: சுப்மன் கில் (கேப்டன்), ரோஹித் சர்மா, விராட் கோலி, ஸ்ரேயாஸ் ஐயர், அக்சர் படேல், கே.எல். ராகுல், நிதிஷ் குமார் ரெட்டி, வாஷிங்டன் சுந்தர், குல்தீப் யாதவ், ஹர்ஷித் ராணா, முகமது சிராஜ், அர்ஷ்தீப் சிங், பிரசித் கிருஷ்ணா, துருவ் ஜூரல், யஷஸ்வி ஜெய்ஸ்வால்.

ஆஸ்திரேலிய அணி: மிட்செல் மார்ஷ் (கேப்டன்), சேவியர் பார்ட்லெட், கூப்பர் கானோலி, பென் ட்வார்ஷூயிஸ், நாதன் எல்லிஸ், ஜோஷ் ஹேசில்வுட், டிராவிஸ் ஹெட், மேத்யூ குஹ்னெமன், மார்னஸ் லபுஷேன், மிட்செல் ஓவன், ஜோஷ் பிலிப், மேத்யூ ரென்ஷா, மேத்யூ ஷார்ட், மிட்செல் ஸ்டார்க், ஆடம் ஜாம்பா, அலெக்ஸ் கேரி, ஜோஷ் இங்லிஸ்.