முதல் போட்டியில் தடுமாறினார்.. அடுத்த போட்டியில் வேற மாதிரி மாறிட்டார்.. தோனியை புகழ்ந்த சச்சின்!

96 பந்துகளில் 51 ரன்கள்

முதல் ஒருநாள் போட்டியில் ஆஸ்திரேலிய அணி நிர்ணயித்த 289 ரன்கள் இலக்கை நோக்கி ஆடிய இந்திய அணி 4 ரன்களுக்கு 3 விக்கெட்கள் இழந்து தவித்த போது பேட்டிங் செய்ய வந்தார் தோனி. அப்போது விக்கெட் விழாமல் ஆட வேண்டும் என்ற கட்டாயம் இருந்தது. அந்த போட்டியில் 96 பந்துகளில் 51 ரன்கள் எடுத்து ஆட்டமிழந்தார் தோனி.

இரண்டாம் போட்டியிலும் அரைசதம்

இரண்டாம் போட்டியில் 299 ரன்கள் இலக்கை நோக்கி ஆடிய இந்திய அணியில் கோலி 104 ரன்கள் அடிக்க, தோனி கடைசி வரை நின்று 54 பந்துகளில் 55 ரன்கள் அடித்து அணியை வெற்றி பெற வைத்தார்.

மாறினார் தோனி

முதல் போட்டியுடன் ஒப்பிடுகையில் இரண்டாம் போட்டியில் தோனியின் பேட்டிங்கில் பெரிய வித்தியாசம் இருந்ததாக குறிப்பிட்டுள்ளார் சச்சின். முதல் போட்டியில் தோனி தன் இயல்பில் இல்லை. தான் நினைத்த இடத்தில் பந்தை அடிக்க முடியாமல் திணறினார். ஆனால், இரண்டாம் போட்டியில் தோனி முதல் பந்தில் இருந்தே வேறு ஒரு வீரர் போல இருந்ததாக கூறினார் சச்சின்.

கட்டுப்படுத்தும் ஆற்றல்

மேலும், தோனி பேட்டிங்கில் ஒரு பக்கம் நின்று கொண்டு போட்டியை கட்டுப்படுத்தும் ஆற்றல் கொண்டவர் எனவும் புகழ்ந்தார் சச்சின். தோனி கடந்த ஆண்டு பேட்டிங்கில் தடுமாறி வந்த நிலையில், 2019ஆம் ஆண்டின் துவக்கத்தில் இருந்து ஆடிய இரண்டு போட்டிகளிலும் அரைசதம் அடித்து நல்ல பார்மில் இருக்கிறார்.