மகளிர் உலகக் கோப்பை அரையிறுதி.. டாஸ் வென்ற ஆஸ்திரேலியா பேட்டிங் தேர்வு.. இந்தியா முதலில் பவுலிங்

நவி மும்பை: பெரும் எதிர்பார்ப்புகளுக்கு மத்தியில், ஐசிசி மகளிர் உலகக் கோப்பை 2025-ன் இரண்டாவது அரையிறுதிப் போட்டியில், இந்திய அணிக்கு எதிராக டாஸ் வென்ற ஆஸ்திரேலிய அணி முதலில் பேட்டிங் செய்ய முடிவெடுத்துள்ளது. நவி மும்பையில் உள்ள டாக்டர் டி.ஒய். பாட்டீல் ஸ்போர்ட்ஸ் அகாடமி மைதானத்தில் நடைபெறும் இந்த வாழ்வா-சாவா போட்டியில், இந்திய அணி முதலில் பந்துவீசுகிறது.

டாஸ் வென்ற ஆஸ்திரேலிய கேப்டன் அலிசா ஹீலி பேசுகையில்:

"நாங்கள் முதலில் பேட்டிங் செய்யப் போகிறோம். இங்குள்ள சூழல் பேட்டிங்கிற்குச் சாதகமாக உள்ளது. போர்டில் ரன்களைக் குவிக்க இது ஒரு நல்ல வாய்ப்பு. காயம் காரணமாகப் பத்து நாட்கள் ஓய்வெடுத்து, மீண்டும் அணிக்குத் திரும்பியது மகிழ்ச்சி அளிக்கிறது. இது ஒரு அரையிறுதிப் போட்டி; யார் சிறப்பாக விளையாடுகிறார்களோ அவர்களுக்கே வெற்றி கிடைக்கும். அணியில் ஒரே ஒரு மாற்றம்: ஜார்ஜியா வேர்ஹாம் அவர்களுக்குப் பதிலாக சோஃபி மோலினக்ஸ் களமிறங்குகிறார்."

இந்திய கேப்டன் ஹர்மன்ப்ரீத் கவுர் கூறுகையில்:

"நாங்களும் முதலில் பேட்டிங் செய்யவே விரும்பினோம். இப்போது, ஆரம்பத்திலேயே விக்கெட்டுகளை வீழ்த்தினால் அது எங்களுக்குச் சாதகமாக அமையும். இந்த மைதானம் எங்களுக்கு நன்கு பழக்கமானது. இங்கு பல பயிற்சி முகாம்களில் பங்கேற்றுள்ளோம், கடைசி இரண்டு போட்டிகளையும் இங்கேயே விளையாடினோம். ஆஸ்திரேலியாவுடன் விளையாடும் போதெல்லாம், நாங்கள் அச்சமின்றி விளையாட வேண்டும் என்ற மனநிலையுடன்தான் களமிறங்குவோம். துரதிர்ஷ்டவசமாக, காயம் காரணமாக பிரதிகா ராவல் இந்தப் போட்டியில் விளையாடவில்லை."

இந்தியா மகளிர் (பிளேயிங் 11):

ஷஃபாலி வர்மா, ஸ்மிருதி மந்தனா, அமன்ஜோத் கவுர், ஜெமிமா ரோட்ரிக்ஸ், ஹர்மன்ப்ரீத் கவுர் (கேப்டன்), தீப்தி ஷர்மா, ரிச்சா கோஷ் (விக்கெட் கீப்பர்), ராதா யாதவ், கிராந்தி கௌட், ஸ்ரீ சரணி, ரேணுகா சிங் தாக்கூர்.

ஆஸ்திரேலியா மகளிர் (பிளேயிங் 11):

ஃபோப் லிட்ச்ஃபீல்ட், அலிசா ஹீலி (விக்கெட் கீப்பர்/கேப்டன்), எலிஸ் பெர்ரி, பெத் மூனி, அனபெல் சதர்லேண்ட், ஆஷ்லே கார்ட்னர், தஹ்லியா மெக்ராத், சோஃபி மோலினக்ஸ், அலனா கிங், கிம் கார்த், மேகன் ஷட்.

பிட்ச் அறிக்கை:

மேற்கிந்தியத் தீவுகளின் முன்னாள் வீரர் இயன் பிஷப்பின் பிட்ச் பற்றி, "மேகமூட்டமான வானிலை காரணமாக, பந்து ஸ்விங் ஆக வாய்ப்புள்ளது. பந்தில் சில பக்கவாட்டு அசைவுகள் இருக்கும். தொடரின் ஆரம்பத்தில் காணப்பட்ட பளபளப்பு ஆடுகளத்தில் இல்லை என்றாலும், இங்கு அதிக ரன்கள் குவிக்கப்படும் என எதிர்பார்க்கிறேன்" என்று தெரிவித்துள்ளார்.