இந்தியா - வங்கதேசம் செமி பைனல்.. 2026 மகளிர் ஆசிய கோப்பை அரையிறுதி எத்தனை மணிக்கு தொடங்கும்?

துபாய்: 2026 மகளிர் ஆசிய கோப்பை டி20 கிரிக்கெட் தொடரின் முதல் அரையிறுதி ஆட்டம் இன்று (செப்டம்பர் 10) துபாயில் நடைபெறுகிறது. இதில் ஹர்மன்பிரீத் கவுர் தலைமையிலான இந்திய மகளிர் அணி, நிகர் சுல்தானா தலைமையிலான வங்கதேச மகளிர் அணியை எதிர்கொள்கிறது. வரலாற்றில் 10-வது முறையாக இறுதிப்போட்டிக்கு முன்னேறும் முனைப்பில் இந்திய அணி களமிறங்குகிறது.

2026 மகளிர் ஆசிய கோப்பை தொடரில் இந்திய அணி விளையாடிய 3 குரூப் போட்டிகளிலும் வெற்றி பெற்று தோல்வியே சந்திக்காமல் கம்பீரமாக அரையிறுதிக்கு முன்னேறியுள்ளது. ஸ்மிருதி மந்தனா, ஷபாலி வர்மா ஆகியோர் பேட்டிங்கிலும், தீப்தி சர்மா, ஸ்ரீ சரணி, பிரேமா ராவத் ஆகியோர் சுழற்பந்து வீச்சிலும் எதிரணிகளை மிரட்டி வருகின்றனர். மறுபுறம், ஐக்கிய அரபு அமீரகத்தை 34 ரன்கள் வித்தியாசத்தில் வீழ்த்தி அரையிறுதிக்கு வந்துள்ளது வங்கதேச அணி. அந்த அணி ஆல்-ரவுண்டர் நகிதா அக்தர் மற்றும் கேப்டன் நிகர் சுல்தானாவை நம்பி உள்ளது.

சர்வதேச மகளிர் டி20 கிரிக்கெட்டில் இந்தியா - வங்கதேச அணிகள் இதுவரை 24 முறை நேருக்கு நேர் மோதியுள்ளன. இதில் இந்திய அணி 21 போட்டிகளிலும், வங்கதேசம் வெறும் 3 போட்டிகளிலும் வெற்றி பெற்றுள்ளன. இந்திய அணி இதுவரை ஆசிய கோப்பையை 7 முறை வென்றுள்ளது. எனினும், கடந்த 2018 ஆசிய கோப்பை இறுதிப்போட்டியில் வங்கதேசம் வெற்றி பெற்று இருப்பதால், இந்திய அணி எச்சரிக்கையுடன் விளையாட வேண்டியுள்ளது. வங்கதேசத்திற்கு எதிராக அதிகபட்சமாக ஹர்மன்பிரீத் கவுர் 496 ரன்கள் குவித்துள்ளார். அவர் இந்தப் போட்டியிலும் பெரிய இன்னிங்க்ஸ் ஆடுவார் என்ற எதிர்பார்ப்பு உள்ளது.

அமெரிக்க ஓபன்.. அல்காரஸுக்கு அதிர்ச்சி.. ரைபாகினா நம்பர் 1 இடம்.. அரையிறுதிக்கு கோகோ காஃப் தகுதி

போட்டி நேரம் மற்றும் நேரலை விவரம்

துபாய் சர்வதேச மைதானத்தில் நடைபெறும் இந்த ஆட்டம் இந்திய நேரப்படி இன்று இரவு 8:00 மணிக்கு தொடங்குகிறது. டாஸ் இரவு 7:30 மணிக்கு போடப்படும். இந்த அரையிறுதிப் போட்டியை இந்தியாவில் சோனி ஸ்போர்ட்ஸ் நெட்வொர்க் தொலைக்காட்சியில் நேரடியாக காணலாம். ஆன்லைனில் சோனி லைவ் செயலி மற்றும் இணையதளத்தில் நேரலையாகப் பார்க்கலாம்.