“வைபவ் சூர்யவன்ஷி 2 சிக்ஸ் அடிப்பார் அப்புறம்..”.. 15 வயது வீரரை குறி வைத்த சஞ்சு சாம்சன் ரசிகர்கள்

நாட்டிங்ஹாம்: நாட்டிங்ஹாமில் நடைபெற்ற இங்கிலாந்துக்கு எதிரான மூன்றாவது டி20 போட்டியில் இந்திய அணி 125 ரன்கள் வித்தியாசத்தில் படுதோல்வி அடைந்தது. இந்த இமாலயத் தோல்விக்கு மத்தியில், இளம் வீரர் வைபவ் சூர்யவன்ஷியின் பொறுப்பற்ற பேட்டிங் மீதும் விமர்சனங்கள் எழுந்துள்ளன. 15 வயது வீரர் இரண்டு போட்டிகளே ஆடி இருக்கும் நிலையில், அவர் மீது விமர்சனம் எழக் காரணமே சஞ்சு சாம்சனை அநியாயமான முறையில் அணியில் இருந்து நீக்கியது தான்.

இந்தப் போட்டியில் இங்கிலாந்து நிர்ணயித்த 202 ரன்கள் என்ற கடினமான இலக்கை நோக்கி ஆடிய இந்திய அணி, வெறும் 76 ரன்களுக்கு ஆல்-அவுட் ஆகி பரிதாபமாகத் தோற்றது. மான்செஸ்டரில் நடைபெற்ற தனது அறிமுகப் போட்டியில் 10 பந்துகளில் 2 சிக்ஸர்களுடன் 14 ரன்கள் எடுத்து ஆட்டமிழந்த வைபவ் சூர்யவன்ஷி, இந்த போட்டியிலும் அதே போன்ற ஒரு தவறான ஆட்டத்தையே வெளிப்படுத்தினார்.

இந்தப் போட்டியில் ஜோஃப்ரா ஆர்ச்சர் வீசிய பந்தில் 2 சிக்ஸர்களைப் பறக்கவிட்ட சூர்யவன்ஷி, வெறும் 5 பந்துகளில் 13 ரன்கள் மட்டுமே எடுத்து ஜோஸ் பட்லரிடம் கேட்ச் கொடுத்து தனது விக்கெட்டை எளிதாக இழந்தார். பெரிய ஷாட்களை அடித்தவுடன் உடனடியாகத் தனது விக்கெட்டை வாரி வழங்கும் வைபவ் சூர்யவன்ஷியின் இந்த ஆட்டத்தை சஞ்சு சாம்சனுடன் ஒப்பிட்டு சில ரசிகர்கள் அதிருப்தியை வெளிப்படுத்தி உள்ளனர்.

மோசமான ஃபார்ம் காரணமாக 3 போட்டிகளுக்குப் பிறகு சஞ்சு சாம்சன் அணியிலிருந்து நீக்கப்பட்ட நிலையில், தற்போது விளையாடிய 2 போட்டிகளிலும் சொதப்பிய வைபவ் சூர்யவன்ஷிக்கும் அதே போன்ற விமர்சனங்களும் அழுத்தங்களும் அதிகரிக்கத் தொடங்கி உள்ளன.

வைபவ் சூர்யவன்ஷியைத் தவிர அபிஷேக் சர்மா 10 ரன்களிலும், இஷான் கிஷன் 13 ரன்களிலும், கேப்டன் ஸ்ரேயாஸ் ஐயர் 5 ரன்களிலும் ஆட்டமிழந்தனர். இந்திய அணியில் எந்தவொரு பேட்ஸ்மேனும் 20 ரன்களைக் கூட தாண்டவில்லை. இங்கிலாந்து பந்துவீச்சாளர் ஜோஷ் டங் 4 விக்கெட்டுகளை வீழ்த்தி இந்தியாவை நிலைகுலையச் செய்தார்.

IND vs ENG: இந்திய டி20 வரலாற்றிலேயே இப்படி நடந்ததில்லை.. பெரும் அவமானத்தை சந்தித்த ஸ்ரேயாஸ் அணி

தொடர்ச்சியாக 5 டி20 போட்டிகளில் வெற்றியைப் பெற முடியாமல் தடுமாறும் இந்திய அணிக்கு, இளம் வீரர்களின் இந்தத் பொறுப்பற்ற ஆட்டம் பெரும் கவலையை ஏற்படுத்தியுள்ளது. 5 போட்டிகள் கொண்ட இத்தொடரில் இங்கிலாந்து அணி 2-0 என முன்னிலை பெற்றுள்ள நிலையில், இந்திய அணியின் கம்பீர் மற்றும் ஸ்ரேயாஸ் கூட்டணிக்குத் தங்களது வியூகங்களை மாற்றியமைக்க வேண்டிய நெருக்கடி ஏற்பட்டுள்ளது.