IND vs PAK: என்ன பெரிய உஸ்மான்.. வருண் சக்கரவர்த்தி தெரியுமா? பாகிஸ்தானுக்கு சவால்.. Stats இதுதான்!

கொழும்பு: 2026 டி20 உலகக்கோப்பைத் தொடரில் இந்தியா - பாகிஸ்தான் மோதும் போட்டி என்றாலே பரபரப்புக்குப் பஞ்சம் இருக்காது. தற்போது சமூக வலைதளங்கள், தொலைக்காட்சிகள் என எங்கு பார்த்தாலும் பாகிஸ்தான் அணியின் புதிய சுழற்பந்து வீச்சாளர் உஸ்மான் தாரிக் பற்றிய பேச்சுதான் ஓயாமல் ஒலித்துக்கொண்டிருக்கிறது.

பந்துவீசும்போது திடீரென நின்று நிதானிக்கும் அவரது வித்தியாசமான பாணி இந்திய பேட்ஸ்மேன்களுக்குச் சிக்கலைக் கொடுக்கும் என்று விவாதிக்கப்பட்டு வருகிறது. ஆனால், பாகிஸ்தான் அணி ஒன்றை மறந்துவிடக்கூடாது. ஆரவாரம் இல்லாமல் அமைதியாகப் பெரும் தாக்கத்தை ஏற்படுத்தக்கூடிய ஒரு மர்ம சுழற்பந்து வீச்சாளர் இந்திய அணியிலும் இருக்கிறார். அவர்தான் வருண் சக்கரவர்த்தி.

அமைதிப் படை

உஸ்மான் தாரிக்கைப் பற்றி ஊடகங்கள் பெரிதுபடுத்தினாலும், களத்தில் அச்சுறுத்தலாக இருக்கப்போவது என்னவோ வருண் சக்கரவர்த்திதான். 2024ஆம் ஆண்டு மீண்டும் இந்திய அணிக்குத் திரும்பியதில் இருந்து, வருண் சக்கரவர்த்தி தனது பழைய ஃபார்மை மீட்டுள்ளார். அவரது வேகம், பந்தின் போக்கு மற்றும் துல்லியம் ஆகியவை பேட்ஸ்மேன்களைத் திணறடித்து வருகின்றன. கொழும்பு ஆடுகளம் சுழற்பந்து வீச்சுக்குச் சாதகமாக இருக்கும் என்பதால், பாகிஸ்தான் பேட்ஸ்மேன்களுக்கு மிகப்பெரிய சவாலாக இருக்கப்போவது வருணின் பந்துவீச்சுதான்.

உலகக்கோப்பையில் மிரட்டல்

நடப்பு உலகக்கோப்பையில் இந்தியா பெற்ற இரண்டு வெற்றிகளிலும் வருண் சக்கரவர்த்தியின் பங்கு அளப்பரியது. அமெரிக்காவுக்கு எதிரான போட்டியில் 4 ஓவர்கள் வீசி 24 ரன்கள் மட்டுமே கொடுத்து ரன் வேகத்தைக் கட்டுப்படுத்தினார். அடுத்து நமீபியாவுக்கு எதிரான போட்டியில் 2 ஓவர்கள் வீசி வெறும் 7 ரன்கள் மட்டுமே கொடுத்து 3 முக்கிய விக்கெட்டுகளை வீழ்த்தி இந்தியாவின் மிகப்பெரிய வெற்றிக்கு வித்திட்டார்.

பாகிஸ்தானுக்கு எதிராக எப்படி?

வருண் சக்கரவர்த்தியின் பந்துவீச்சில் உள்ள ஆபத்தை உணர்ந்துள்ள பாகிஸ்தான் பேட்ஸ்மேன்கள், அவருக்கு எதிராக எப்போதும் நிதானமாகவே விளையாடுவார்கள். 2021 உலகக்கோப்பையில் அவர் விக்கெட் வீழ்த்தவில்லை என்றாலும், 2024க்குப் பிறகு பாகிஸ்தானுக்கு எதிராகச் சிறப்பாகவே செயல்பட்டுள்ளார்.

ஆசியக் கோப்பை போட்டிகளில் பகர் ஜமான், சாஹிப்சதா ஃபர்ஹான் போன்ற முக்கிய விக்கெட்டுகளை வீழ்த்தியுள்ளார். அவரது எகானமி ரேட் மிகவும் குறைவாகவே உள்ளது. எனவே, 2026 டி20 உலகக்கோப்பை போட்டியிலும் பாகிஸ்தான் வீரர்கள் அவருக்கு எதிராகப் பெரிய ஷாட்களை ஆடத் தயங்குவார்கள் என்றே எதிர்பார்க்கப்படுகிறது.

தொடர் விக்கெட் வேட்டை

வருண் சக்கரவர்த்தியின் தற்போதைய ஃபார்ம் பிரமிக்க வைக்கிறது. 2024 டி20 உலகக்கோப்பைக்குப் பிறகு, சர்வதேச டி20 போட்டிகளில் அதிக விக்கெட் வீழ்த்திய சுழற்பந்து வீச்சாளர் இவர்தான். கடந்த 32 போட்டிகளில் 61 விக்கெட்டுகளைக் கைப்பற்றியுள்ளார். இதில் இரண்டு முறை 5 விக்கெட்டுகளை வீழ்த்தியதும் அடங்கும்.

குறிப்பாக, கடந்த 15 இன்னிங்ஸ்களில் தொடர்ந்து விக்கெட் வீழ்த்தி சாதனை படைத்துள்ளார். கேப்டன் சூர்யகுமார் யாதவ் எப்போது பந்தைக் கொடுத்தாலும் விக்கெட் எடுத்துத் தரும் நம்பிக்கையான பந்துவீச்சாளராக வருண் சக்கரவர்த்தி மாறியுள்ளார். உஸ்மான் தாரிக்கை நினைத்து இந்தியா கவலைப்படுவதை விட, வருண் சக்கரவர்த்தியை நினைத்து பாகிஸ்தான் கவலைப்படுவதே சரியாக இருக்கும். இந்திய பேட்ஸ்மேன்களும் உஸ்மான் தாரிக்கை சமாளிக்க தங்களை தயார் செய்து கொண்டுள்ளனர்.