IND vs PAK: இந்திய மகளிர் அணிக்கு பின்னடைவு.. முக்கிய வீராங்கனை காயம்.. டாஸ் வென்ற பாகிஸ்தான்

கொழும்பு: 2025 ஐசிசி மகளிர் ஒருநாள் உலகக் கோப்பைத் தொடரின் மிகவும் எதிர்பார்க்கப்பட்ட, இந்தியா - பாகிஸ்தான் போட்டி இன்று தொடங்கியது. இலங்கையின் கொழும்பு நகரில் உள்ள ஆர். பிரேமதாசா மைதானத்தில் நடைபெறும் இந்தப் போட்டியில், டாஸ் வென்ற பாகிஸ்தான் அணியின் கேப்டன் பாத்திமா சனா, முதலில் பந்துவீச்சைத் தேர்வு செய்துள்ளார். இதையடுத்து, ஹர்மன்பிரீத் கவுர் தலைமையிலான இந்திய அணி முதலில் பேட்டிங் செய்ய களமிறங்குகிறது. இந்திய அணியில் முக்கிய வீராங்கனை காயம் அடைந்து நீக்கப்பட்டார்.

டாஸ் வென்ற பிறகு பேசிய பாகிஸ்தான் கேப்டன் பாத்திமா சனா, "நாங்கள் முதலில் பந்துவீசப் போகிறோம். ஆடுகளத்தில் ஈரப்பதம் இருக்கலாம் என்று தெரிகிறது. அது பந்துவீச்சுக்குச் சாதகமாக இருக்கும். 250 ரன்களுக்குள் எந்த இலக்கையும் எங்களால் வெற்றிகரமாகத் துரத்த முடியும். எங்கள் அணியின் நம்பிக்கை சிறப்பாக உள்ளது" என்று குறிப்பிட்டார். கொழும்பு மைதானத்தில் மாலையில் பனிப்பொழிவு இருக்கும் என்பதால், சேஸிங் செய்வது எளிதாக இருக்கும் என்ற கணக்கிலும் பாகிஸ்தான் இந்த முடிவை எடுத்துள்ளது.

இந்திய அணியில் எதிர்பாராத மாற்றம்!

டாஸ் இழந்தது குறித்துப் பேசிய இந்திய கேப்டன் ஹர்மன்பிரீத் கவுர், "நாங்கள் உலகக் கோப்பைக்கு முன்பு இங்கு ஒரு நல்ல தொடரில் விளையாடியுள்ளோம். அதனால், இங்குள்ள சூழல் எங்களுக்குப் பரிச்சயமானது. அணியில் ஒரு துரதிர்ஷ்டவசமான மாற்றம் உள்ளது. அமன்ஜோத் கவுருக்கு உடல்நிலை சரியில்லாததால், அவருக்குப் பதிலாக அனுபவ வீராங்கனை ரேணுகா சிங் தாக்கூர் அணியில் இணைந்துள்ளார்" என்றார்.

ஆடுகளம் மற்றும் வானிலை அறிக்கை

கொழும்பு மைதானத்தின் ஆடுகள அறிக்கைப்படி, வெப்பநிலை 31 டிகிரியாக இருந்தாலும், அதிக ஈரப்பதம் காரணமாக வெப்பம் அதிகமாக உணரப்படும். மைதானத்தின் ஒரு பக்க பவுண்டரி எல்லை 56 மீட்டர் எனச் சிறியதாகவும், காற்றின் எதிர்த்திசையில் உள்ள மற்றொரு பவுண்டரி 63 மீட்டர் ஆகவும் உள்ளது. நேராக அடிக்கப்படும் பவுண்டரி 70 மீட்டர் தூரத்தில் அமைந்துள்ளது. இது சுழற்பந்து வீச்சாளர்களுக்குச் சவாலாக இருக்கும் எனக் கணிக்கப்பட்டுள்ளது. தற்போதைய நிலவரப்படி வானிலை தெளிவாக இருந்தாலும், கொழும்புவில் எப்போது வேண்டுமானாலும் மழை வரலாம் என்பதால், போட்டியின் மீது ஒருவித பதற்றம் நிலவுகிறது.

இரு அணிகளின் பிளேயிங் XI:

இந்திய மகளிர் அணி:

பிரதிகா ராவல், ஸ்மிருதி மந்தனா, ஹர்லீன் தியோல், ஹர்மன்பிரீத் கவுர் (கேப்டன்), ஜெமிமா ரோட்ரிக்ஸ், தீப்தி சர்மா, ரிச்சா கோஷ் (விக்கெட் கீப்பர்), சினே ராணா, ரேணுகா சிங் தாக்கூர், கிராந்தி கௌட், ஸ்ரீ சரணி.

பாகிஸ்தான் மகளிர் அணி:

முனீபா அலி, சதாஃப் ஷமாஸ், சித்ரா அமீன், ரமீன் ஷமீம், அலியா ரியாஸ், சித்ரா நவாஸ் (விக்கெட் கீப்பர்), பாத்திமா சனா (கேப்டன்), நடாலியா பர்வைஸ், டயானா பெய்க், நஷ்ரா சந்து, சாடியா இக்பால்.