இந்தியா - தென்னாப்பிரிக்கா 3வது ஒருநாள் போட்டி.. "டாஸ்" வென்றால் என்ன செய்யணும்? மழையால் பாதிப்பா?

விசாகப்பட்டினம்: இந்தியா மற்றும் தென்னாப்பிரிக்கா அணிகள் மோதும் 3 போட்டிகள் கொண்ட ஒருநாள் தொடரின் வெற்றியாளரைத் தீர்மானிக்கும் மூன்றாவது மற்றும் கடைசிப் போட்டி இன்று (சனிக்கிழமை) விசாகப்பட்டினத்தில் நடைபெறவுள்ளது. தொடர் 1-1 என்ற கணக்கில் சமனில் உள்ளதால், கோப்பையை வெல்லப்போவது யார் என்ற எதிர்பார்ப்பு ரசிகர்கள் மத்தியில் உச்சக்கட்டத்தை எட்டியுள்ளது.

ஏற்கனவே டெஸ்ட் தொடரை தென்னாப்பிரிக்காவிடம் இழந்த இந்திய அணி, ஒருநாள் தொடரையாவது கைப்பற்றி ஆறுதல் தேடுமா? அல்லது தென்னாப்பிரிக்கா இரட்டை வெற்றியை ருசிக்குமா? என்பதைத் தீர்மானிக்கும் போட்டியாக இது மாறி உள்ளது.

பிட்ச் ரிப்போர்ட் (Pitch Report):

விசாகப்பட்டினத்தில் உள்ள டாக்டர் ஒய்.எஸ். ராஜசேகர ரெட்டி ஏசிஏ-விடிசிஏ (ACA-VDCA) கிரிக்கெட் மைதானம், ராய்ப்பூர் மைதானத்தைப் போலவே பேட்டிங்கிற்குச் சாதகமாக இருக்கும் என்று எதிர்பார்க்கப்படுகிறது. முந்தைய இரண்டு போட்டிகளிலும் 300 ரன்களுக்கு மேல் குவிக்கப்பட்டது போல, இன்றும் ஒரு அதிக ரன் குவிப்பை எதிர்பார்க்கலாம். பேட்ஸ்மேன்கள் ஆரம்பத்திலிருந்தே ஆதிக்கம் செலுத்த முடியும்.

இந்தத் தொடர் முழுவதுமே பந்துவீச்சாளர்களுக்குப் பெரும் தலைவலியாக இருப்பது பனிப்பொழிவு தான். விசாகப்பட்டினத்திலும் முன்னிரவில் பனிப்பொழிவு அதிகமாக இருக்கும் என்று கணிக்கப்பட்டுள்ளது.

டாஸ் முக்கியம்

இன்றைய போட்டியில் 'டாஸ்' வெற்றி - தோல்வியைத் தீர்மானிக்கும் மிக முக்கிய காரணியாக இருக்கும். பனிப்பொழிவு காரணமாக, இரண்டாவது இன்னிங்ஸில் பந்துவீசுவது மிகவும் கடினமாக இருக்கும். பந்து கைநழுவும் என்பதால் சுழற்பந்து வீச்சாளர்கள் மற்றும் வேகப்பந்து வீச்சாளர்கள் லைன் மற்றும் லெந்த்தை பராமரிக்கத் திணறுவார்கள்.

குறிப்பாக, 34 முதல் 50 ஓவர்கள் வரை ஒரே பந்தை பயன்படுத்த வேண்டும் என்ற புதிய விதி, பனிப்பொழிவுடன் சேரும்போது சேஸிங் செய்யும் அணிக்குச் சாதகமாக மாறிவிடுகிறது. எனவே, டாஸ் வெல்லும் கேப்டன் கண்ணை மூடிக்கொண்டு பந்துவீச்சைத் தேர்வு செய்வதுதான் புத்திசாலித்தனம். சேஸிங் செய்யும் அணிக்கு வெற்றி வாய்ப்பு அதிகம்.

வரலாறு மாறுமா?

தென்னாப்பிரிக்கா அணிக்கு இது ஒரு முக்கியமான வாய்ப்பு. 1986-87-ம் ஆண்டு பாகிஸ்தான் அணிக்குப் பிறகு, இந்திய மண்ணில் ஒரே சுற்றுப்பயணத்தில் டெஸ்ட் மற்றும் ஒருநாள் தொடர் இரண்டையும் வென்ற அணி என்ற சாதனையை இதுவரை எந்த அணியும் படைக்கவில்லை. இன்று வெற்றி பெற்றால், தென்னாப்பிரிக்கா அந்த 38 ஆண்டுகால வரலாற்றை மாற்றியமைக்கும்.

வானிலை நிலவரம் (Weather Report):

விசாகப்பட்டினத்தில் இன்று மழை பெய்ய வாய்ப்பில்லை என்று 'அக்குவெதர்' (AccuWeather) தெரிவித்துள்ளது. பகல் நேரத்தில் 27 டிகிரி செல்சியஸ் முதல் 28 டிகிரி செல்சியஸ் வரை வெப்பநிலை இருக்கும். மாலை நேரத்தில் குளிர் அதிகரித்து 11 டிகிரி செல்சியஸ் வரை குறைய வாய்ப்புள்ளது.

வானம் மேகமூட்டத்துடன் காணப்படும். ஆனால் மழை குறுக்கிடாது என்பதால் முழுமையான ஆட்டத்தை ரசிகர்கள் கண்டு களிக்கலாம். பேட்டிங்கில் ரோஹித், கோலி, ருதுராஜ், ராகுல் என இந்தியா பலமாக இருந்தாலும், பந்துவீச்சில் கடைசி ஓவர்களில் ரன்களைக் கட்டுப்படுத்த வேண்டிய கட்டாயத்தில் உள்ளது. மறுபுறம் தென்னாப்பிரிக்கா சேஸிங்கில் அபாயகரமான அணியாக உள்ளது.

அணிகள் விவரம்:

இந்தியா: ரோஹித் சர்மா, யஷஸ்வி ஜெய்ஸ்வால், விராட் கோலி, ரிஷப் பண்ட், கே.எல்.ராகுல் (கேப்டன்), வாஷிங்டன் சுந்தர்/நித்திஷ் குமார் ரெட்டி, ரவீந்திர ஜடேஜா, குல்தீப் யாதவ், ஹர்ஷித் ராணா, அர்ஷ்தீப் சிங், பிரசித் கிருஷ்ணா.

தென்னாப்பிரிக்கா: எய்டன் மார்க்ரம், குயின்டன் டி காக், டெம்பா பவுமா (கேப்டன்), மேத்யூ பிரீட்ஸ்கே, டேவிட் பிரேவிஸ், மார்கோ யான்சன், கார்பின் போஷ், கேசவ் மகாராஜ், நாண்ட்ரே பர்கர்/ஜெரால்ட் கோட்ஸி, லுங்கி இங்கிடி.