இலங்கைக்கு சுற்றுப்பயணம் மேற்கொண்டது இந்திய அணி.. மும்பையிலிருந்து கெத்தாக கிளம்பிய ஸ்டார் வீரர்

இலங்கைக்கு எதிரான இரு போட்டிகள் கொண்ட டெஸ்ட் தொடரில் பங்கேற்பதற்காக இந்திய கிரிக்கெட் அணி மும்பை விமான நிலையத்திலிருந்து புறப்பட்டது. இத்தொடருக்கு முன்னதாக, இந்திய அணி ஆகஸ்ட் 7 முதல் 9 வரை கொழும்பில் நடைபெறும் மூன்று நாட்கள் கொண்ட பயிற்சி ஆட்டத்தில் விளையாடவுள்ளது. இதன் பின்னர், முதலாவது டெஸ்ட் போட்டி ஆகஸ்ட் 15 அன்று காலேவிலும், இரண்டாவது மற்றும் இறுதி டெஸ்ட் போட்டி ஆகஸ்ட் 23 அன்று கொழும்பிலும் தொடங்க திட்டமிடப்பட்டுள்ளது.

இந்தத் தொடர் 2025-27 உலக டெஸ்ட் சாம்பியன்ஷிப் சைக்கிளில் ஒரு பகுதியாகும். இதில் இந்திய அணி தற்போது 48.15 சதவீத புள்ளிகளுடன் ஐந்தாவது இடத்திலும், இலங்கை அணி 41.67 சதவீத புள்ளிகளுடன் ஆறாவது இடத்திலும் உள்ளன.இதற்கு முன்பு, இந்திய அணி கடந்த 2017 ஆம் ஆண்டு விராட் கோலி தலைமையில் இலங்கைக்கு சுற்றுப்பயணம் மேற்கொண்ட போது, 3-0 என்ற கணக்கில் இலங்கையை வீழ்த்தி தொடரை முழுமையாகக் கைப்பற்றியிருந்தது.

இவ்விரு அணிகளுக்கும் இடையிலான கடைசி டெஸ்ட் தொடர் 2022 இல் இந்தியாவில் நடைபெற்றது. அத்தொடரிலும் இந்திய அணி 2-0 என்ற கணக்கில் எளிதாக வெற்றி பெற்றது. ஒட்டுமொத்தமாக, இரு நாடுகளும் இதுவரை 46 டெஸ்ட் போட்டிகளில் நேருக்கு நேர் மோதியுள்ளன. இதில் இந்திய அணி 22 வெற்றிகளுடன் ஆதிக்கம் செலுத்துகிறது. இலங்கை அணி 7 போட்டிகளில் மட்டுமே வெற்றி பெற்றுள்ளதுடன், 17 போட்டிகள் டிராவில் முடிந்துள்ளன.

இலங்கைக்கு எதிரான டெஸ்ட் தொடருக்கு முன்னதாக இந்திய அணிக்கு ஒரு பெரிய பின்னடைவு ஏற்பட்டுள்ளது. கடந்த மாதம் இங்கிலாந்துக்கு எதிரான ஒருநாள் தொடரின் போது இடது முழங்காலில் ஏற்பட்ட காயம் காரணமாக, நட்சத்திர வேகப்பந்து வீச்சாளர் ஜஸ்பிரித் பும்ரா இத்தொடரிலிருந்து விலகியுள்ளார்.

அவருக்கு மாற்றாக, ஜம்மு-காஷ்மீர் மாநிலத்தைச் சேர்ந்த வேகப்பந்து வீச்சாளர் ஆகிப் நபி இந்திய அணியில் சேர்க்கப்பட்டுள்ளார். இதன் மூலம் அவர் தனது முதலாவது சர்வதேச அழைப்பைப் பெற்றுள்ளார். 29 வயதான ஆகிப் நபி, இதுவரை 43 முதல்தர போட்டிகளில் விளையாடி 162 விக்கெட்டுகளை வீழ்த்தியுள்ளார். இதில் 16 முறை ஐந்து விக்கெட்டுகளைக் கைப்பற்றியதும் அடங்கும். மேலும் பேட்டிங்கில் இரண்டு அரைசதங்களுடன் 999 ரன்களையும் அவர் குவித்துள்ளார்.

இலங்கை டெஸ்ட் தொடருக்காக இந்திய அணி விவரம்: ஷுப்மன் கில் (கேப்டன்), கே.எல். ராகுல் (துணை கேப்டன்), யஷஸ்வி ஜெய்ஸ்வால், ரிஷப் பந்த் (விக்கெட் கீப்பர்), சாய் சுதர்சன், துருவ் ஜூரல் (விக்கெட் கீப்பர்), தேவ்தத் படிக்கல், ரவீந்திர ஜடேஜா, சரண்ஷ் ஜெயின், குல்தீப் யாதவ், மானவ் சுதர், முகமது சிராஜ், பிரசித் கிருஷ்ணா, குர்னூர் பிரார் மற்றும் ஆகிப் நபி.