தொடர்ந்து 7 தொடர்களை வென்று இந்தியா புதிய சாதனை

ஓராண்டில் ஏழாவது தொடர் வெற்றி

இதன் மூலம், தொடர்ந்து, ஏழு ஒருதினப் போட்டித் தொடர்களில் வென்று புதிய சாதனையை இந்தியா படைத்துள்ளது கடந்த ஆண்டு துவக்கத்தில் ஆஸ்திரேலியா அணியிடம் இந்தியா 4-1 என்ற கணக்கில் ஒருதினப் போட்டித் தொடரை இழந்தது. அதன்பிறகு நடந்த அனைத்து தொடர்களிலும் ஜெயம் நமக்கே. உள்நாட்டில், 2015ல் தென்னாப்பிரிக்காவிடம் 3-2 என்று இந்தியா தோல்வியடைந்தது. அதன்பிறகு, தொடரை இழந்ததில்லை.

ஓராண்டில் நியூசியுடன் இரண்டாவது வெற்றி

கடந்த ஆண்டில் துவங்கி இதுவரை 6 ஒருதினப் போட்டித் தொடர்களில் இந்தியா தொடர்ந்து வெற்றி பெற்றுள்ளது. ஜிம்பாப்வே அணிக்கு எதிராக 3-0 என்ற கணக்கிலும், அதைத் தொடர்ந்து நியூசிலாந்து அணியை 3-2 என்ற கணக்கிலும் இந்தியா வென்றது. அதன் பிறகு, இங்கிலாந்து அணியை 2-1 என்றும், வெஸ்ட் இன்டீஸ் அணியை 3-1 என்றும் இந்தியா வென்றது. இலங்கை 5-0 என ஒயிட்வாஷ் செய்த அணி, உள்நாட்டில் நடந்த தொடரில் ஆஸ்திரேலியாவை 4-1 என்று வென்றது.

உள்நாட்டிலும் வெற்றி தொடர்கிறது

அதன் தொடர்ச்சியாக, தற்போது நியூசிலாந்து கிரிக்கெட் அணியை 2-1 என வென்று, தொடர்ந்து ஏழு தொடர் வெற்றிகளைப் பெற்றுள்ள சாதனையை இந்தியா புரிந்துள்ளது. இதற்கு முன், 2006 - 07 மற்றும் 2007 - 2009ல் தொடர்ந்து 6 தொடர்களில் தொடர்ச்சியாக வென்றதே சாதனையாக இருந்தது. உள்நாட்டில் கடந்த ஆண்டு நியூசிலாந்து அணியை 3-2 என வென்றது. அதன் பிறகு இங்கிலாந்து 2-1 என்ற கணக்கிலும், ஆஸ்திரேலியாவை 4-1 என்றும் இந்தியா வென்றது.

நியூசிக்கு எதிராக உள்நாட்டில் தோற்றதில்லை

தற்போது 2-1 என்று நியூசிலாந்தை மீண்டும் வென்றது. உள்நாட்டில் நியூசிலாந்து எதிராக நடந்த 6 தொடர்களில் இந்திய அணி வென்றுள்ளது. அடுத்தாக, இலங்கை கிரிக்கெட் அணி இந்தியா வர உள்ளது. டிசம்பர் 10, 13, 17ல் மூன்று ஒருதினப் போட்டித் தொடரில் பங்கேற்க உள்ளது. இந்தியாவின் வெற்றிப் பயணம் தொடரும் என எதிர்பார்க்கலாம்.