ஹர்பஜன் சிங் ஓய்வு.. ட்விட்டரில் வெளியிட்ட உருக்கமான பதிவு.. அடுத்தகட்ட நடவடிக்கை என்ன தெரியுமா?

ஹர்பஜன் புள்ளிவிவரம்

இந்திய கிரிக்கெட் அணிக்காக கடந்த 1998ம் ஆண்டு அறிமுகமான ஹர்பஜன் சிங், இதுவரை 417 டெஸ்ட் விக்கெட்கள், ஒருநாள் போட்டிகளில் 269 விக்கெட்கள் மற்றும் டி20 போட்டிகளில் 25 விக்கெட்களை கைப்பற்றி அசத்தியுள்ளார். எனினும் இவருக்கு கடந்த 2015ம் ஆண்டு முதல் இந்திய அணியில் விளையாட ஒரு வாய்ப்பு கூட கிடைக்காமல் உள்ளது. ஐபிஎல் தொடரில் மட்டுமே பங்கேற்று வருகிறார்.

வாய்ப்பு இல்லை

கொல்கத்தா நைட் ரைடர்ஸ் அணியின் முன்னணி வீரராக இருந்தபோதும், தற்போது அவருக்கு வாய்ப்புகள் குறைந்துவிட்டன. கடந்த ஐபிஎல் சீசனில் முதல் பகுதியில் விளையாடிய ஹர்பஜன், 2வது பகுதியில் வாய்ப்பு கிடைக்காமல் இருந்தார். அவரின் ஃபார்ம் போய்விட்டதாக கூறி இளம் வீரர்களுக்கு வாய்ப்புகள் அதிகரித்து வருகிறது.

ஹர்பஜனின் முடிவு

இந்நிலையில் அனைத்துவிதமான கிரிக்கெட்டில் இருந்தும் ஹர்பஜன் சிங் ஓய்வை அறிவித்துள்ளார். இதுகுறித்து தனது ட்விட்டர் பக்கத்தில் பதிவிட்டுள்ள அவர், அனைத்து நல்ல விஷயங்களும் ஒருநாள் முடிவு என்பது வரும். அந்தவகையில் எனக்கும் கிரிக்கெட் போட்டிகள் எனது வாழ்வில் மறக்கமுடியாதது. கடந்த 23 ஆண்டு பயணத்தை மிகவும் அழகாகவும், மறக்கமுடியாத நினைவுகளை கொடுத்த அனைவருக்கும் நன்றி எனக்கூறியுள்ளார்.

அடுத்தகட்ட முடிவு

இதன் மூலம் வரும் ஐபிஎல் மெகா ஏலத்தில் அவர் பங்கேற்க போவதில்லை என்றும் தகவல் வெளியாகியுள்ளது. 41 வயதாகும் ஹர்பஜன் அடுத்ததாக பயிற்சியாளர் அவதாரம் எடுக்கவிருப்பதாக தெரிகிறது. கொல்கத்தா அணியின் பவுலிங் ஆலோசகராக அவர் செயல்பட அதிக வாய்ப்புகள் உள்ளது. மெகா ஏலத்தின் போது வீரர்களை தேர்வு செய்ய அவரின் பணியை தான் பயன்படுத்தவிருக்கின்றனர்.