ரோகித், சூர்யகுமாருக்கு மட்டும் வேறு நியாயமா? இந்திய அணியை வெளுத்து வாங்கிய முகமது கையிப்

பெல்ஃபாஸ்ட்: அயர்லாந்துக்கு எதிரான டி20 தொடரை இந்திய அணி 0-2 என்ற கணக்கில் இழந்ததைத் தொடர்ந்து, 15 வயதான வைபவ் சூர்யவன்ஷிக்கு பிளேயிங் லெவனில் வாய்ப்பு வழங்காதது குறித்து முகமது கைஃப் கடுமையாக விமர்சித்துள்ளார். இந்திய அணிக்கு முதல்முறையாக அழைக்கப்பட்ட இளம் வீரரான வைபவ் சூர்யவன்ஷி தனது வரலாற்றுச் சிறப்புமிக்க அறிமுகப் போட்டிக்காகக் காத்திருக்கும் நிலையில், இந்திய அணி நிர்வாகம் சஞ்சு சாம்சன் மற்றும் அபிஷேக் சர்மா கூட்டணியையே தொடக்க வீரர்களாகத் தொடர்ந்து களமிறக்கியது.

அபிஷேக் சர்மா மற்றும் சஞ்சு சாம்சன் ஜோடிக்குத் தொடர்ந்து வாய்ப்பளிக்கப்படும் என்றும், வைபவ் சூர்யவன்ஷி தனது வாய்ப்பிற்காகப் பொறுமையாகக் காத்திருக்க வேண்டும் என்றும் தொடரின் தொடக்கத்திலேயே அணி நிர்வாகம் தெரிவித்திருந்தது. இடது கை மற்றும் வலது கை ஆட்டக்காரர்களான இந்த ஜோடி, 2026 டி20 உலகக் கோப்பையை வென்ற இந்திய அணியில் இடம் பெற்றிருந்ததுடன், 2024 முதல் அவ்வப்போது தொடக்க வீரர்களாகக் களமிறங்கி வருகின்றனர்.

ரோகித், சூர்யகுமாருக்கு மட்டும் வேறு நியாயமா?

இருப்பினும், அயர்லாந்துக்கு எதிரான இரண்டு போட்டிகளிலும், கடினமான சூழ்நிலைகளில் இந்தத் தொடக்கக் கூட்டணி சோபிக்கத் தவறியதால், இவர்களின் எதிர்காலம் குறித்த சந்தேகங்களை எழுப்பியுள்ளது.உலகக் கோப்பை வென்ற அணியைச் சேர்ந்த வீரர்களுக்கு நீண்ட காலம் வாய்ப்பளிக்கப்படும் என்ற சலுகை சாம்சன் மற்றும் சர்மாவுக்குப் பொருந்தும் எனில், சமீபகாலமாக ரோஹித் சர்மா மற்றும் சூர்யகுமார் யாதவ் ஆகியோருக்கு ஏன் இதே போன்ற வாய்ப்புகள் வழங்கப்படவில்லை என்று முகமது கைஃப் கேள்வி எழுப்பியுள்ளார்.

WTC புள்ளிப்பட்டியலில் இந்தியாவுக்கு அடிச்ச லக்! வெஸ்ட் இண்டீஸ் வரலாற்று வெற்றி! சரிந்த இலங்கை

"சிறந்த பிளேயிங் லெவன் என்று பார்த்தால், அதில் வைபவ் சூர்யவன்ஷிக்கு நிச்சயம் இடம் கிடைத்திருக்க வேண்டும். இது உலகக் கோப்பை வென்ற அணி என்பதால், அதே பிளேயிங் லெவனுடன் விளையாடுவோம் என்றும், வைபவ் காத்திருக்க வேண்டும் என்றும் ஒரு காரணம் சொல்லப்பட்டது. ஆனால், அந்த வாதத்தில் நீங்கள் தீர்க்கமாக இருக்க வேண்டும் அல்லவா?" என்று முகமது கைஃப் தனது யூடியூப் சேனலில் கேள்வி எழுப்பியுள்ளார்.

இந்திய அணியின் மோசமான முடிவு

"சாம்பியன்ஸ் டிராபியை வென்ற பிறகு ரோஹித் சர்மா கேப்டன் பதவியிலிருந்து நீக்கப்பட்டபோது, எதிர்காலத்தைக் கருத்தில் கொண்டு இளம் கேப்டனை உருவாக்க விரும்புவதாகக் கூறப்பட்டது. அதேபோல், உலகக் கோப்பையை வென்ற பிறகு சூர்யகுமார் யாதவும் டி20 அணியின் திட்டங்களிலிருந்து முற்றிலும் நீக்கப்பட்டார். அப்போதும் எதிர்காலத்தைக் கருத்தில்கொண்டே இந்த முடிவு எடுக்கப்பட்டதாகத் தெரிவிக்கப்பட்டது.

நீங்கள் உண்மையிலேயே எதிர்காலத்தை நோக்கிப் பயணிக்கிறீர்கள் என்றால், உங்களிடம் ஒரு 15 வயது வீரர் இருக்கிறார், அவரை விடச் சிறந்த எதிர்காலத்தை யாரால் கொண்டு வர முடியும்? நீங்கள் உலகக் கோப்பை வென்ற அணியையே தொடர விரும்பினால், ரோஹித் சர்மா மற்றும் சூர்யகுமார் யாதவையும் அணியில் தொடரச் செய்திருக்க வேண்டும்" என்று கூறினார். சாம்பியன்ஸ் டிராபிக்குப் பிறகு இந்திய ஒருநாள் அணியின் கேப்டனாக ரோஹித் சர்மாவுக்குப் பதிலாக ஷுப்மன் கில் நியமிக்கப்பட்டார். அதே சமயம் 2026 டி20 உலகக் கோப்பை வெற்றிக்குப் பிறகு சூர்யகுமார் யாதவ் டி20 திட்டங்களில் இருந்து முற்றிலும் நீக்கப்பட்டார் என்பது குறிப்பிடத்தக்கது.

IND vs IRE: இந்திய அணி தோல்விக்கு பல காரணம் இருக்கு.. ஆனால் நீங்க இவரை தான் நீக்குவிங்க-ஆகாஷ் சோப்ரா

இங்கிலாந்துக்கு எதிரான டி20 தொடரில் களம் காணும் இந்திய அணி

அயர்லாந்துக்கு எதிரான தொடர் தோல்வியைத் தொடர்ந்து, ஜூலை 1 முதல் இங்கிலாந்தில் தொடங்கவுள்ள ஐந்து போட்டிகள் கொண்ட டி20 தொடர் இந்திய அணிக்கு பெரும் சவாலாக அமையப்போகிறது. ஜூலை 1, புதன்கிழமை அன்று ரிவர்சைடு மைதானத்தில் நடைபெறவுள்ள முதல் போட்டிக்கு முன்னதாக, வைபவ் சூர்யவன்ஷி மீது மீண்டும் கவனம் திரும்பியுள்ளது. இந்தியா 'ஏ' அணிக்காக முத்தரப்புத் தொடரின் இறுதிப்போட்டியில் அவர் விளையாடிய விதம் மற்றும் 2026 ஐபிஎல் தொடரில் அவர் வெளிப்படுத்திய சிறப்பான ஆட்டம் ஆகியவை அவருக்கு சாதகமான அம்சங்களாக விளங்குகின்றன.