IND vs AUS: இந்திய ஒருநாள், டி20 அணி அறிவிப்பு.. சுப்மன் கில்லுக்கு ஜாக்பாட்.. முழு வீரர்கள் விவரம்

மும்பை: ஆஸ்திரேலியாவில் சுற்றுப்பயணம் மேற்கொள்ள உள்ள இந்திய கிரிக்கெட் அணிக்கான வீரர்கள் பட்டியல் அதிகாரப்பூர்வமாக அறிவிக்கப்பட்டுள்ளது. சுப்மன் கில் ஒருநாள் அணியின் கேப்டனாக நியமிக்கப்பட்டு இருக்கிறார். ஒருநாள் அணியின் துணை கேப்டனாக ஆச்சரியம் அளிக்கும் வகையில் ஒரு வீரர் நியமிக்கப்பட்டு இருக்கிறார். ரோஹித் சர்மா, விராட் கோலி நிலை என்ன என்றும் கூறப்பட்டுள்ளது.

இந்த ஆஸ்திரேலிய சுற்றுப்பயணத்தில் மூன்று ஒருநாள் போட்டிகள் மற்றும் ஐந்து டி20 போட்டிகள் நடைபெற உள்ளன. அக்டோபர் 4, 2025 அன்று கூடிய இந்திய கிரிக்கெட் கட்டுப்பாட்டு வாரியத்தின் (பிசிசிஐ) மூத்த ஆடவர் தேர்வுக் குழு, இந்த அணிகளைத் தேர்வு செய்து அறிவித்துள்ளது.

எதிர்பார்க்கப்பட்டது போலவே, இந்திய ஒருநாள் அணிக்கு இளம் வீரர் சுப்மன் கில் கேப்டனாக நியமிக்கப்பட்டுள்ளார். டெஸ்ட் கேப்டனாகப் பொறுப்பேற்ற குறுகிய காலத்திலேயே, ஒருநாள் அணியையும் வழிநடத்தும் மிகப்பெரிய பொறுப்பு அவருக்கு வழங்கப்பட்டுள்ளது. அதே சமயம், டி20 அணிக்கு சூர்யகுமார் யாதவ் கேப்டனாகத் தொடர்கிறார்.

Indian Team Squad for Australia Tour Announced Shubman Gill is ODI Captain Suryakumar Yadav Continues as T20 Captain

இந்திய ஒருநாள் அணி:

சுப்மன் கில் தலைமையில் அறிவிக்கப்பட்டுள்ள ஒருநாள் அணியில், மூத்த வீரர்களான ரோஹித் சர்மா மற்றும் விராட் கோலி ஆகியோர் இடம்பிடித்துள்ளனர். இது இளம் கேப்டனுக்குக் களத்தில் பெரும் பலமாக அமையும் என்று எதிர்பார்க்கப்படுகிறது. ஆச்சரியம் அளிக்கும் வகையில் ஸ்ரேயாஸ் ஐயர் ஒருநாள் அணியின் துணை கேப்டனாக நியமிக்கப்பட்டுள்ளார்.

விக்கெட் கீப்பர்களாக கே.எல். ராகுல் மற்றும் துருவ் ஜுரல் ஆகிய இருவர் தேர்வு செய்யப்பட்டுள்ளனர். சமீபத்திய தொடர்களில் சிறப்பாகச் செயல்பட்ட இளம் ஆல்-ரவுண்டர் நிதிஷ் குமார் ரெட்டிக்கு ஒருநாள் அணியிலும் வாய்ப்பு வழங்கப்பட்டுள்ளது. அக்சர் படேல் மற்றும் வாஷிங்டன் சுந்தர் ஆகியோர் சுழற்பந்துவீச்சு ஆல்-ரவுண்டர்களாக அணியை பலப்படுத்துகின்றனர். வேகப்பந்துவீச்சுப் பிரிவில் முகமது சிராஜ், அர்ஷ்தீப் சிங், பிரசித் கிருஷ்ணா ஆகியோருடன், ஐபிஎல் தொடரில் கவனம் ஈர்த்த ஹர்ஷித் ராணாவுக்கும் வாய்ப்பளிக்கப்பட்டுள்ளது.

இந்திய ஒருநாள் அணி வீரர்கள் விவரம்:

சுப்மன் கில் (கேப்டன்), ரோஹித் சர்மா, விராட் கோலி, ஸ்ரேயாஸ் ஐயர் (துணை கேப்டன்), அக்சர் படேல், கே.எல். ராகுல் (விக்கெட் கீப்பர்), நிதிஷ் குமார் ரெட்டி, வாஷிங்டன் சுந்தர், குல்தீப் யாதவ், ஹர்ஷித் ராணா, முகமது சிராஜ், அர்ஷ்தீப் சிங், பிரசித் கிருஷ்ணா, துருவ் ஜுரல் (விக்கெட் கீப்பர்), யஷஸ்வி ஜெய்ஸ்வால்.

இந்திய டி20 அணி:

சூர்யகுமார் யாதவ் தலைமையிலான டி20 அணியில், அதிரடிக்கு முக்கியத்துவம் கொடுக்கப்பட்டுள்ளது. சுப்மன் கில் துணை கேப்டனாக நியமிக்கப்பட்டுள்ளார். தொடக்க வீரராக அபிஷேக் சர்மா, மிடில் ஆர்டரில் திலக் வர்மா, ஃபினிஷராக ரிங்கு சிங் என ஒரு வலுவான பேட்டிங் படை உருவாக்கப்பட்டுள்ளது.

வேகப்பந்துவீச்சின் நம்பிக்கை நட்சத்திரம் ஜஸ்பிரித் பும்ரா டி20 அணியில் தொடர்கிறார். அவருடன் அர்ஷ்தீப் சிங் மற்றும் ஹர்ஷித் ராணா வேகப்பந்துவீச்சுப் பொறுப்பை பகிர்ந்து கொள்வார்கள். சுழற்பந்துவீச்சில் அக்சர் படேல், குல்தீப் யாதவ், வாஷிங்டன் சுந்தர் ஆகியோருடன், மிஸ்டரி ஸ்பின்னர் வருண் சக்கரவர்த்திக்கும் மீண்டும் வாய்ப்பு அளிக்கப்பட்டுள்ளது.

இந்திய டி20 அணி வீரர்கள் விவரம்:

சூர்யகுமார் யாதவ் (கேப்டன்), அபிஷேக் சர்மா, சுப்மன் கில் (துணை கேப்டன்), திலக் வர்மா, நிதிஷ் குமார் ரெட்டி, சிவம் துபே, அக்சர் படேல், ஜிதேஷ் சர்மா (விக்கெட் கீப்பர்), வருண் சக்கரவர்த்தி, ஜஸ்பிரித் பும்ரா, அர்ஷ்தீப் சிங், குல்தீப் யாதவ், ஹர்ஷித் ராணா, சஞ்சு சாம்சன் (விக்கெட் கீப்பர்), ரிங்கு சிங், வாஷிங்டன் சுந்தர்.