டோணி vs கோஹ்லி.. யாருடைய கேப்டன்ஷிப் பெஸ்ட்? சென்னை-பெங்களூர் இன்று பலப்பரிட்சை!

By Veera Kumar

Updated: Wednesday, April 22, 2015, 13:54 [IST]

பெங்களூரு: ஐபிஎல் தொடரில் இன்று இரவு 8 மணிக்கு தொடங்கும் போட்டியில் பெங்களூரு ராயல் சேலஞ்சர்ஸ் அணியும், சென்னை சூப்பர் கிங்சும் பலப் பரிட்சை நடத்த உள்ளன.

ஆஸ்திரேலிய முன்னணி பந்து வீச்சாளரும், உலக கோப்பை தொடர் நாயகனுமான மிட்சேல் ஸ்டார்க், பெங்களூர் அணிக்கு திரும்பியுள்ளதால் அந்த அணி உற்சாகமாக உள்ளது.

கெய்ல், டி வில்லியர்ஸ், கோஹ்லி என பேட்டிங் ஜாம்பவான்களால் நிரம்பிய பெங்களூரு அணிக்கு, பவுலிங் பிரச்சினையாக இருந்து வந்தது. அந்த குறையை தீர்க்க ஸ்டார்க் உதவுவார் என்ற உற்சாகம் மல்லையா அணியில் பீறிட்டு அடிக்கிறது. முட்டி வலியால் அவதிப்பட்ட ஸ்டார்க், குணமடைந்து இன்று சென்னைக்கு எதிராக களமிறங்குகிறாராம்.

இது பனங்காட்டு நரி

ஆனால், வலுவான பேட்டிங் வரிசையை கொண்டுள்ள சென்னை சூப்பர் கிங்ஸ், இந்த பூச்சாண்டிக்கெல்லாம் அஞ்சுவதாக தெரியவில்லை. வழக்கம்போல பட்டையை கிளப்ப பிரெண்டன் மெக்கல்லமும், ஸ்மித்தும், ரெய்னா, டோணி, பிராவோ ஆகியோரும் பேட்டுடன் தயாராக உள்ளனர். ஆஷிஷ் நெஹ்ராவின் அபார பந்து வீச்சும், அஸ்வினின் சுழலும், கெய்ல் புயலை கட்டுப்படுத்தும் என நம்பலாம்.

டோணியா, கோஹ்லியா

இன்றைய போட்டி பல வகைகளில் முக்கியத்துவம் வாய்ந்தது. இரு அணிகளிலுமே, தனிப்பட்ட முறையில் மிகவும் திறமையான வீரர்கள் உள்ளனர்.

கெய்லா அல்லது நெஹ்ராவா, மெக்கல்லம், ஸ்மித்தா அல்லது மிட்சேல் ஸ்டார்க்கா, டோணியா, டிவில்லியர்சா என இரு தரப்பிலும் உள்ள ஜாம்பவான்கள் மீதுதான் அனைவர் கண்களும் உள்ளன. இதைவிட ஒருபடி மேல் போய், இந்திய ஒருநாள் மற்றும் டி20 கிரிக்கெட் அணி கேப்டன் டோணியா அல்லது டெஸ்ட் கேப்டன் கோஹ்லியா என்றும் ரசிகர்கள் கோஷமிட்டு வருகின்றனர்.

எங்கு, எப்போது?

பெங்களூரு சின்னசாமி ஸ்டேடியத்தில் இரவு, 8 மணிக்கு போட்டி தொடங்குகிறது.

எப்படி பார்க்கலாம்?

சோனி கிக்ஸ் சேனலில் தமிழ் மற்றும் தெலுங்கிலும், சோனி ஆத் சேனலில் வங்காளத்திலும், சோனி மேக்ஸ் சேனலில் ஹிந்தியிலும், சோனி சிக்ஸ் சேனலில் ஆங்கிலத்திலும் வர்ணனையுடன் நேரடி ஒளிபரப்பு செய்யப்படும்.