13 ஓவரில் டெல்லி 150 ரன்கள்.. ஒரே ஸ்பெல்லில் தலைகீழ் மாற்றிய நரைன்.. இறுதியில் மீண்டும் ட்விஸ்ட்

அதிரடி தொடக்கம்

நடப்பு சீசனில் பெரும்பாலும் முதல் ஓவரிலேயே விக்கெட்டை எடுக்கும் கொல்கத்தா அணியின் உமேஷ் யாதவ்க்கு , சிம்ம சொப்பனமாக விளங்கினார் பிரித்வி ஷா. முதல் பந்திலேயே பவுண்டரி என அதிரடியை காட்ட தொடங்கினார் ஷா. மறுமுனையில் வார்னரும் ஒரே ஓவரில் 2 பவுண்டரி விரட்டினார். இதனையடுத்து கம்மின்ஸை பந்துவீச ஸ்ரேயாஸ் அழைத்தார்.

4 ஓவரில் 50

சக நாட்டு வீரரான பாட் கம்மின்ஸையும் டேவிட் வார்னர் விட்டு வைக்கவில்லை. 2 பவுண்டரி, ஒரு சிக்சர் என விரட்ட, அந்த ஓவரில் 16 ரன்கள் சென்றது. இதன் மூலம் 4 ஓவர் முடிவிலேயே டெல்லி அணி 50 ரன்களை எட்டியது. தொடர்ந்து அதிரடி காட்டிய பிரித்வி ஷா 29 பந்துகளில் 51 ரன்கள் விளாசி ஆட்டமிழந்தார். அதன் பின்னர் களமிறங்கிய கேப்டன் ரிஷப் பண்டும் தனது அதிரடியை காட்டினார்.

13 ஓவரில் 150

இதனால் டெல்லி அணி 10வது ஓவரிலேயே 100 ரன்களை எட்டியது. இதன் பின்னர் வார்னர் 45 பந்துகளில் 61 ரன்களும், ரிஷப் பண்ட் 14 பந்துகளில் 27 ரன்களும் விளாச அடுத்த 3.2 ஓவரில் எடல்லி அணி மேலும் 50 ரன்களை சேர்த்தது. 13 ஓவரில் 150 ரன்கள் என்றால் டெல்லி அணி 240 அடித்துவிடும் என ரசிகர்கள் எதிர்பார்த்தனர்.

இறுதியில் ட்விஸ்ட்

ஆனால் சுனில் நரைன் கட்டுக்கோப்பாக பந்துவீசி ரன்களை கட்டுப்படுத்தியதோடு அடுத்தடுத்து 2 விக்கெட்டுகளை வீழ்த்தினார். இதனால் டெல்லி அணியின் ஸ்கோர் கடுமையாக சரிந்தது. எனினும் கடைசியில் ஜோடி சேர்ந்த அக்சர் பட்டேல், சர்துல் தாக்கூர் அதிரடியை காட்டி மீண்டும் ட்விஸ்ட் வைத்தனர். இதனால் கடைசி 3 ஓவரில் 48 ரன்கள் சேர்த்தது. இதனால் 20 ஓவர் முடிவில் டெல்லி அணி 5 விக்கெட் இழப்பிற்கு 215 ரன்கள் எடுத்துள்ளது.