சச்சின் டெண்டுல்கருக்கு பின்.. தோனிக்கு கிடைத்த மரியாதை.. இனி எந்த வீரருக்கும் ஜெர்சி 7 கிடையாது!

மும்பை: சச்சின் டெண்டுல்கரை தொடர்ந்து தோனியின் ஜெர்சி நம்பரான 7-க்கு ஓய்வு கொடுக்கப்படுவதாக பிசிசிஐ அறிவித்துள்ளது. இதனால் இனி எந்த வீரருக்கும் நம்பர் 7 ஜெர்சி எண்ணாக வழங்கப்படாது என்று தெரிய வந்துள்ளது.

இந்திய அணியின் முன்னாள் கேப்டன் மகேந்திர சிங் தோனி. 2007 டி20 உலகக்கோப்பை, 2011 உலகக்கோப்பை, 2013 சாம்பியன்ஸ் டிராபி, டெஸ்ட் தரவரிசையில் நம்பர் 1 என்று தோனி தலைமையில் இந்திய அணி பல்வேறு சாதனைகளையும், மகுடங்களையும் வென்றது. கிட்டத்தட்ட 15 ஆண்டுகளுக்கும் மேலாக இந்திய அணியில் நிரந்தர வீரராக இருந்தவர் தோனி.

ஒருநாள் கிரிக்கெட்டில் 350 போட்டிகள் விளையாடி 10,773 ரன்களையும், 90 டெஸ்ட் போட்டிகளில் 4,876 ரன்களையும், 98 டி20 போட்டிகளில் 1,617 ரன்களையும் விளாசியுள்ளார். இந்திய அணியின் கேப்டன்சி பொறுப்பு மற்றும் பிசிசிஐ நிர்வாகிகள் இரு தரப்பையும் தோனி ஒற்றை ஆளாக கையாண்டது இன்று வரை ஆச்சரியம் தான்.

அதன் காரணமாகவே தோனி இப்போதும் ரசிகர்களால் கொண்டாடப்பட்டு வருகிறார். அதுமட்டுமல்லாமல் விராட் கோலி, ரோகித் சர்மா உள்ளிட்ட வீரர்களை அணிக்குள் நிரந்தர வீரராக மாற்றியதிலும் தோனியின் பங்கு உள்ளது. அதேபோல் சரியான நேரத்தில் கேப்டன் பதவியை ராஜினாமா செய்து சாதாரண வீரராக விளையாடிய பெருமை தோனிக்கு மட்டுமே உள்ளது.

இதனாலேயே தோனியின் ஜெர்சி நம்பரான 7 ரசிகர்களிடையே உணர்வுப்பூர்வ ஒன்றாக அமைந்தது. தோனி ஓய்வுபெற்றாலும் நம்பர் 7 ஜெர்சி இதுவரை எந்த வீரருக்கும் அளிக்கப்படவில்லை. இந்த நிலையில் ஜெர்சி நம்பர் 7-க்கு ஓய்வு கொடுத்து பிசிசிஐ அறிவித்துள்ளது. இதனால் இனி தோனி பயன்படுத்திய நம்பர் 7 ஜெர்சி எந்த வீரருக்கும் அளிக்கப்படாது.

ஏற்கனவே சச்சின் டெண்டுல்கரின் ஜெர்சி நம்பர் 10-க்கு ஓய்வு கொடுத்து பிசிசிஐ அறிவித்தது. அதன்பின் தோனியின் ஜெர்சியான நம்பர் 7-க்கு ஓய்வு கொடுக்கப்பட்டுள்ளது. இது பிசிசிஐ தரப்பில் தோனி அளிக்கப்பட்ட மரியாதையாக ரசிகர்கள் சமூக வலைதளங்களில் கொண்டாடி வருகின்றனர். ஓய்வுக்கு பின் பிசிசிஐ நிகழ்ச்சியில் பங்கேற்காத தோனிக்கு மரியாதை தேடி வருவதாகவும் விவாதித்து வருகின்றனர்.