IPL 2025: சிங்க நடை போடும் கில்.. தொடர்ந்து முதலிடத்தில் குஜராத் அணி..5வது தோல்வியை தழுவிய கொல்கத்தா

கொல்கத்தா: ஐபிஎல் 2025 ஆம் ஆண்டு சீசனில் 39 வது லீக் ஆட்டத்தில் குஜராத் அணியும் கொல்கத்தா அணியும் ஈடன் கார்டன் மைதானத்தில் பல பரிட்சை நடத்தியது. புள்ளி பட்டியலில் முதலிடத்தில் உள்ள அணியும் ஏழாவது இடத்தில் உள்ள கொல்கத்தா அணியும் மோதியதால் இந்த போட்டி மிகவும் முக்கியத்துவம் வாய்ந்ததாக கருதப்பட்டது.

இந்த சூழலில் டாஸ் வென்ற கொல்கத்தா அணி கேப்டன் ரஹானே முதலில் பந்துவீச்சை தேர்வு செய்தார். இந்த இடத்தில் களமிறங்கிய குஜராத் அணியில் வழக்கம் போல் சாய் சுதர்சன் அதிரடியை காட்டி ரன்களை சேர்த்தார். மறுபுறம் சுப்மன் கில், பொறுப்பான ஆட்டத்தை வெளிப்படுத்தினார்.

இந்த ஜோடியை பிரிக்க முடியாமல் குஜராத் அணி வீரர்கள் தடுமாறினர். 12.2 ஓவர்கள் பேட்டிங் செய்த இந்த ஜோடி முதல் விக்கெட்டுக்கு 114 ரன்கள் சேர்த்தது. 36 பந்துகளில் 52 ரன்கள் சேர்த்த சாய் சுதர்ஷன் 6 பவுண்டரி, ஒரு சிக்சர் என ஆரஞ்சு நிற தொப்பியை கைப்பற்றினார்.
இதனை அடுத்து பட்லர் கில்லுடன் ஜோடி சேர்ந்த அதிரடி காட்டினார்.

பட்லர் எட்டு பவுண்டரிகள் விளாச 23 பந்துகளில் 41 ரன்கள் எடுத்து கடைசி வரை ஆட்டமிழக்காமல் இருந்தார். மறுபுறம் தன்னுடைய ரன் குவிக்கும் வேகத்தை கில் அதிகப்படுத்தினார். மூன்று சிக்சர் ,10 பவுண்டரி என 55 பந்துகளில் 90 ரன்கள் சேர்த்து பெவிலியன் திரும்பினார். ராகுல் தே வாத்தியா டக் அவுட்டாக, தமிழக வீரர் ஷாரூக்கான் ஐந்து பந்துகளில் 11 ரன்கள் சேர்த்தார்.

இதன் மூலம் குஜராத் அணி 20 ஓவர் முடிவில் மூன்று விக்கெட் இழப்பிற்கு 198 ரன்கள் எடுத்திருந்தது. பெரிதும் எதிர்பார்க்கப்பட்ட வருண் சக்கரவர்த்தி நான்கு ஓவர்களில் 33 ரன்கள் மட்டுமே விட்டுக் கொடுத்து விக்கெட் எதுவும் கைப்பற்றவில்லை. இதேபோன்று சுனில் நரைன், நான்கு ஓவரில் 36 ரன்கள் விட்டுக்கொடுத்து விக்கெட் ஏதும் எடுக்கவில்லை. வைபவ் அரோரா ஒரு விக்கெட்டையும், ஹர்சித் ராணா ஒரு விக்கெட்டையும், ரஸில் ஒரு விக்கெட்டையும் கைப்பற்றி இருந்தனர்.

இதை அடுத்து 199 ரன்கள் எடுத்தால் வெற்றி என்ற இலக்குடன் கே கே ஆர் அணி களம் இறங்கியது தொடக்க வீரராக விளையாடிய குர்பாஷ் ஒரு ரன்னில் ஆட்டம் இழந்து ரசிகர்களுக்கு ஏமாற்றம் அளித்தார். இதைப் போன்று சுணில் நரைன் 17 ரன்களில் பெவிலியன் திரும்ப வெங்கடேஷ் ஐயர் 19 பந்துகளில் 14 ரன்கள் தான் எடுத்தார்.

அதிரடி வீரர் ரிங்கு சிங் 14 பந்துகளில் 17 ரன்கள் எடுத்து பெவிலியன் திரும்பினார். ஒரு கட்டத்தில் விக்கெட்டுகள் சரிந்தாலும் மறுபுறம் பொறுப்பான ஆட்டத்தை வெளிப்படுத்திய ரகானே 36 பந்துகளில் அரை சதம் அடித்த நிலையில் தனது விக்கெட்டை பறிகொடுத்தார். ரகானேவின் இன்னிங்ஸில் 5 பவுண்டரியும்,ஒரு சிக்ஸரும் அடங்கும்.

அன்று ரஸில் மூன்று பவுண்டரி, ஒரு சிக்சர் என 15 பந்துகளில் 21 ரன்கள் சேர்க்க, இறுதியில் ரகுவான்சி 13 பந்துகளில் 27 ரன்கள் சேர்த்தார். மற்ற வீரர்கள் அனைவரும் சொற்ப ரன்களில் ஆட்டம் இழக்க கொல்கத்தா அணி 20 ஓவர் முடிவில் எட்டு விக்கெட் இழப்பிற்கு 159 ரன்கள் எடுத்தது.குஜராத் பந்துவீச்சு தரப்பில் ரசித் கான், பிரசித் கிருஷ்ணா ஆகியோர் தலா இரண்டு விக்கெட்டுகளை வீழ்த்தினர்.இதன் மூலம் குஜராத் அணி 12 புள்ளிகள் பெற்று தொடர்ந்து முதலிடத்தில் இருக்கிறது. கொல்கத்தா அணியை பொறுத்தவரை எட்டு போட்டியில் விளையாடி மூன்று வெற்றி ஐந்து தோல்வி என ஆறு புள்ளிகளுடன் ஏழாவது இடத்தில் உள்ளது.