“சிஎஸ்கே ஜெயித்தாலும், தோற்றாலும் கடைசி இடம் தான் அதனால்”.. GT போட்டிக்கு முன் தோனி ஓபன் டாக்

அகமதாபாத்: 2025 ஐபிஎல் தொடரின் 67-வது லீக் போட்டியில் குஜராத் டைட்டன்ஸ் மற்றும் சென்னை சூப்பர் கிங்ஸ் அணிகள் மோதின. இந்த இரண்டு அணிகளுக்கும் இதுவே இந்த ஆண்டின் கடைசிப் போட்டியாகும். எனவே இந்தப் போட்டிக்கு அதிக எதிர்பார்ப்பு இருந்த நிலையில், சென்னை சூப்பர் கிங்ஸ் அணி டாஸ் வென்று பேட்டிங்கை தேர்வு செய்தது.

குஜராத் டைட்டன்ஸ் அணி புள்ளிப் பட்டியலில் முதலிடத்தில் உள்ளது. சென்னை சூப்பர் கிங்ஸ் புள்ளிப் பட்டியலில் கடைசி இடங்களில் இருந்த நிலையில், இந்தப் போட்டியில் வெற்றி பெற்றால், ராஜஸ்தான் ராயல்ஸ் அணியை முந்தி புள்ளிப் பட்டியலில் ஒன்பதாவது இடத்தைப் பிடிக்க முடியும் என்ற நிலை உள்ளது.

இந்தச் சூழலில் சென்னை சூப்பர் கிங்ஸ் அணி டாஸ் வென்று பேட்டிங் தேர்வு செய்திருக்கிறது. டாஸ் வென்ற பிறகு சென்னை சூப்பர் கிங்ஸ் அணியின் கேப்டன் தோனி பேசுகையில், "நாங்கள் முதலில் பேட்டிங் செய்ய இருக்கிறோம். இந்த ஆடுகளம் நன்றாக இருக்கிறது. இந்தப் போட்டி முழுவதும் ஒரே மாதிரியாக இருக்கும் என்று நினைக்கிறேன். இங்கு வெப்பம் அதிகமாக உள்ளது. எனது உடல் நன்றாகவே உள்ளது. ஒவ்வொரு ஆண்டும் புதிய சவால்கள் ஏற்படுகின்றன. உடலைக் கூடுதலாகப் பராமரிக்க வேண்டியுள்ளது. நான் சர்வதேச கிரிக்கெட்டில் விளையாடியபோது இது என்னை அதிகமாகத் தொந்தரவு செய்யவில்லை."

"இந்தப் போட்டியைப் பொருத்தவரை, இங்கு வெப்பம் அதிகமாக இருக்கும். நாங்கள் இப்போது புள்ளிப் பட்டியலில் கடைசி இடத்தில் இருக்கிறோம். நாங்கள் வென்றாலும் தோற்றாலும் கடைசி இடத்தில் தான் இருக்கப் போகிறோம். எனவே, எங்கள் கிரிக்கெட் ஆட்டத்தை மகிழ்ச்சியுடன் ஆட விரும்புகிறோம். அஸ்வினுக்கு பதிலாக தீபக் ஹூடா அணிக்குத் திரும்பி இருக்கிறார்."

"குஜராத் டைட்டன்ஸ் நல்ல அணி. அவர்கள் சரியான கிரிக்கெட்டை விளையாடுகிறார்கள். நாங்கள் சரியாகப் பந்துவீசவில்லை என்றால், அவர்களின் பேட்ஸ்மேன்கள் எங்களுக்குத் தண்டனை அளிப்பார்கள்," என்றார் தோனி.

அடுத்து குஜராத் டைட்டன்ஸ் அணியின் கேப்டன் சுப்மன் கில் பேசுகையில், "டெஸ்ட் போட்டியின் கேப்டனாக நியமிக்கப்பட்டது மகிழ்ச்சியை அளிக்கிறது. அது சவாலாகவும் இருக்கும். கடைசிப் போட்டியில் எங்கள் அணி 16 அல்லது 17-வது ஓவர் வரை வெற்றி பெறுவது போல இருந்தோம். நாங்கள் இன்று எப்படியும் முதலில் பந்துவீசத்தான் நினைத்தோம். இது பேட்டிங் செய்ய சிறந்த ஆடுகளமாக இருக்கும்; அதிகமாக மாறாது. எங்கள் அணியில் ககிசோ ரபாடாவுக்குப் பதிலாக ஜெரால்டு கோட்ஸி அணியில் இடம் பிடித்திருக்கிறார்," என்றார்.

அணிகள்:

குஜராத் டைட்டன்ஸ் (விளையாடும் லெவன்): சுப்மன் கில் (கேப்டன்), ஜோஸ் பட்லர் (விக்கெட் கீப்பர்), ஷெர்ஃபேன் ரூதர்ஃபோர்ட், ஷாருக் கான், ராகுல் டெவாட்டியா, ரஷீத் கான், ஜெரால்ட் கோட்ஸி, ரவிஸ்ரீனிவாசன் சாய் கிஷோர், முகமது சிராஜ், அர்ஷத் கான், பிரசித் கிருஷ்ணா

குஜராத் டைட்டன்ஸ் இம்பாக்ட் சப்: சாய் சுதர்சன், அனுஜ் ராவத், மஹிபால் லோம்ரோர், வாஷிங்டன் சுந்தர், இஷாந்த் ஷர்மா

சென்னை சூப்பர் கிங்ஸ் (விளையாடும் லெவன்): ஆயுஷ் மத்ரே, டெவோன் கான்வே, உர்வில் படேல், ரவீந்திர ஜடேஜா, டெவால்ட் பிரெவிஸ், சிவம் துபே, தீபக் ஹூடா, எம்.எஸ். தோனி (விக்கெட் கீப்பர்/கேப்டன்), நூர் அஹ்மத், அன்ஷுல் கம்போஜ், கலீல் அஹ்மத்

சென்னை சூப்பர் கிங்ஸ் இம்பாக்ட் சப்: மதீஷா பதிரனா, விஜய் சங்கர், கமலேஷ் நாகர்கோடி, ராமகிருஷ்ணா கோஷ், ரவிச்சந்திரன் அஸ்வின்