IPL 2026: 1989 நாட்களுக்கு பிறகு ரஹானேவுக்கு நேர்ந்த சோகம்.. முடிவுக்கு வருகிறதா கிரிக்கெட் வாழ்க்கை

மும்பை: ஐபிஎல் 2026 சீசனில் குஜராத் அணிக்கு எதிராக கொல்கத்தா நைட் ரைடர்ஸ் கேப்டன் அஜிங்க்யா ரஹானே, கோல்டன் டக் அவுட் ஆனார். இதன் மூலம் 1989 நாட்களுக்குப் பிறகு ஐபிஎல் கிரிக்கெட்டில் 0 ரன்களில் அவர் வெளியேறியது இதுவே முதல் முறை. டாஸ் வென்று முதலில் பேட் செய்த கொல்கத்தா அணிக்காக ரஹானே தொடக்க ஆட்டக்காரராகக் களமிறங்கினார்.

முதல் ஓவரின் நான்காவது பந்திலேயே ரஹானே ஆட்டமிழந்தார். குஜராத் அணியின் முகமது சிராஜ் வீசிய பந்தில், ரஹானே ககிசோ ரபாடாவிடம் கேட்ச் கொடுத்து ரன் ஏதும் எடுக்காமல் பெவிலியன் திரும்பினார். ரஹானே கடைசியாக நவம்பர் 5, 2020 அன்று ஐபிஎல் போட்டியில் டக் அவுட் ஆனார். அன்று டெல்லி கேபிடல்ஸ் அணிக்காக மும்பை இந்தியன்ஸ்க்கு எதிராக விளையாடினார்.

அந்தப் போட்டியில் மும்பை இந்தியன்ஸ் பந்து வீச்சாளர் ட்ரென்ட் போல்ட் பந்தில் மூன்று பந்துகளில் ரன் ஏதும் எடுக்காமல் வெளியேறினார். 1989 நாட்களுக்குப் பிறகு அவர் மீண்டும் 0 ரன்களில் அவுட்டானது குறிப்பிடத்தக்கது.

ஐபிஎல் வரலாற்றில் 5000 ரன்களுக்கு மேல் குவித்துள்ள அஜிங்க்யா ரஹானேவுக்கு, இது 14வது டக் அவுட்டாகும். அவரது முதல் டக் அவுட் 2008 ஏப்ரல் 27 அன்று நவி மும்பையில், மும்பை இந்தியன்ஸ் அணிக்காக விளையாடிய போது, டெக்கான் சார்ஜர்ஸ் அணிக்கு எதிராகப் பதிவானது.

ஐபிஎல் 2026 சீசனின் முதல் போட்டியில் மும்பை இந்தியன்ஸ் அணிக்கு எதிராக ரஹானே 67 ரன்கள் எடுத்து அசத்தினார். தொடர்ந்து சன்ரைசர்ஸ் ஹைதராபாத் அணிக்கு எதிராக 8 ரன்களும், பஞ்சாப் கிங்ஸ் அணிக்கு எதிராக மழை குறுக்கிட்ட போது 6 பந்துகளில் 8* ரன்களும் எடுத்தார். அதன் பிறகு அவரது பேட்டிங் அவ்வளவாகச் சிறப்பாக அமையவில்லை.

ஏப்ரல் 9 அன்று லக்னோ சூப்பர் ஜெயன்ட்ஸ் அணிக்கு எதிராக தொடக்க ஆட்டக்காரராகக் களமிறங்கிய ரஹானே, 24 பந்துகளில் 4 பவுண்டரிகள் மற்றும் 2 சிக்ஸர்களுடன் 41 ரன்கள் சேர்த்தார். ஏப்ரல் 14 அன்று சென்னை சூப்பர் கிங்ஸ் அணிக்கு எதிரான ஐந்தாவது போட்டியில், கொல்கத்தா 193 ரன்கள் இலக்கை துரத்திச் சென்றபோது, அவர் மூன்றாம் வீரராகக் களமிறங்கி 22 பந்துகளில் 28 ரன்கள் எடுத்தார்.

நடப்பு தொடரில் ரஹானேவுக்கு ஒரு ரோலர் கோஸ்டர் சீசனாகவே அமைந்துள்ள நிலையில், குஜராத் டைட்டன்ஸ் அணிக்கு எதிரான இந்த கோல்டன் டக் அவுட், கேகேஆர் ரசிகர்கள் மத்தியில் சற்று ஏமாற்றத்தை ஏற்படுத்தியுள்ளது. நடப்பு சீசனில் கேகேஆர் அணி தொடர்ந்து தடுமாறும் நிலையில், கேப்டனை மாற்ற வேண்டும் என்று கிரிக்கெட் வல்லுனர்கள் தெரிவித்துள்ளனர்.