IPL 2026: சிஎஸ்கே-வுக்கு ஓசியில் 2 பாயின்ட் அள்ளிக் கொடுத்த அக்சர் பட்டேல்.. தவறான முடிவுகள்

டெல்லி: 2026 ஐபிஎல் லீக் ஆட்டத்தில் சென்னை சூப்பர் கிங்ஸ் அணியிடம் டெல்லி கேபிடல்ஸ் படுதோல்வி அடைந்ததற்கு அந்த அணியின் கேப்டன் அக்சர் பட்டேல் எடுத்த சில தவறான முடிவுகளே காரணம் என விமர்சனம் எழுந்துள்ளன. வெற்றி பெற்றிருக்க வேண்டிய போட்டியைத் தாரை வார்த்தது மட்டுமின்றி, சிஎஸ்கே அணிக்கு 2 புள்ளிகளை அவரே வழங்கி விட்டார் என விமர்சகர்கள் சுட்டிக் காட்டுகின்றனர்.

டெல்லியில் நடந்த இந்தப் போட்டிக்கு மழையின் அச்சுறுத்தல் இருந்த போதிலும், டாஸ் வென்ற அக்சர் பட்டேல் முதலில் பேட்டிங் செய்வதாக எடுத்த முடிவு பலருக்கும் ஆச்சரியத்தை அளித்தது. அந்த ஆடுகளத்தில் சராசரியாக 170 முதல் 180 ரன்கள் எடுத்தால் மட்டுமே வெற்றி வாய்ப்பு இருக்கும். ஆனால் டெல்லி அணி 20 ஓவர்களில் 155 ரன்கள் மட்டுமே எடுத்தது. இது குறித்துப் பேசிய டெல்லி பயிற்சியாளர் ஹேமங் பதானி, ஆடுகளம் பேட்டிங்கிற்குச் சற்று கடினமாக இருந்த போதிலும், போதிய ரன்கள் எடுக்காததே தோல்விக்கு முக்கியக் காரணம் என ஒப்புக் கொண்டார். 155 ரன்கள் என்பது சிஎஸ்கே அணிக்கு ஒரு எளிய இலக்காகவே அமைந்தது.

டெல்லி அணியின் பேட்டிங் வரிசை இந்த சீசன் முழுவதும் ஒரு புரியாத புதிராகவே உள்ளது. கடந்த போட்டியில் சிறப்பாக விளையாடிய இளம் வீரர் அபிஷேக் போரலை அணியில் சேர்க்காமல், தொடர்ந்து சொதப்பி வரும் கருண் நாயரை 3-வது இடத்தில் களம் இறக்கியது அக்சரின் மிகப்பெரிய தவறாகப் பார்க்கப்படுகிறது. கருண் நாயர் ரன் எடுக்க முடியாமல் திணறியதால் ரன் ரேட் வெகுவாகக் குறைந்தது. அதேபோல், சுழற்பந்து வீச்சைத் துவம்சம் செய்யக்கூடிய சமீர் ரிஸ்வியை 'இம்பாக்ட் பிளேயராக' மிகவும் தாமதமாகக் களம் இறக்கியதும் சிஎஸ்கே-வுக்குச் சாதகமாக அமைந்தது. ரிஸ்வி கடைசி நேரத்தில் 40 ரன்கள் குவித்து மானத்தைக் காப்பாற்றினாலும், அவர் முன்னரே வந்திருந்தால் ஸ்கோர் 180-ஐத் தாண்டியிருக்கும்.

இந்திய அணியின் உலகக்கோப்பை வெற்றியில் பங்கேற்ற அனுபவம் கொண்ட அக்சர், ஒரு கேப்டனாக இந்த சீசனில் மிகவும் தடுமாறி வருகிறார். கேப்டன்சி அழுத்தம் காரணமாக அவரது சொந்த ஆட்டமும் பாதிக்கப்பட்டுள்ளது. பந்துவீச்சு மற்றும் பேட்டிங் இரண்டுமே எதிர்பார்த்த அளவுக்கு இல்லை. களத்தில் சரியான நேரத்தில் பந்துவீச்சாளர்களை மாற்றாதது மற்றும் முக்கியமான நேரங்களில் தவறான முடிவுகளை எடுத்தது டெல்லி அணியின் தோல்விக்கு அகரன்காரணமாக அமைந்தது.

IPL 2026: பவர்-பிளேயில் மோசமாக ஆடும் அணி இதுதான்.. டெல்லி கேபிடல்ஸ் அணி தோற்க காரணமே இதுதான்

பிளே ஆப் வாய்ப்பு நழுவி வரும் வேளையில், அக்சர் தனது பிடிவாதமான முடிவுகளை மாற்றிக் கொள்ளாவிட்டால் டெல்லி அணிக்கு இந்த சீசன் ஒரு மிகப்பெரிய ஏமாற்றமாகவே முடியும். சிஎஸ்கே இந்த வெற்றியைப் பயன்படுத்திப் புள்ளிப்பட்டியலில் முன்னேறியுள்ளது. டெல்லி கேபிடல்ஸ் இன்னும் குழப்பத்திலேயே நீடிக்கிறது.