IPL 2026 தொடருக்கு முன் தோனி ஓய்வு பெற போகிறாரா? சிஎஸ்கே தலைமை செயல் அதிகாரி முக்கிய அறிவிப்பு

சென்னை: ஐபிஎல் 2026ஆம் ஆண்டு சீசன் வரும் மார்ச் மாதம் மூன்றாவது வாரத்தில் தொடங்கும் என எதிர்பார்க்கப்படுகிறது. கடந்த 2 சீசன்களாக சிஎஸ்கே அணி பிளே ஆப் சுற்றுக்கு கூட தகுதி பெற முடியாமல் போய் உள்ளது. இந்த சூழலில் 44 வயதான தோனி, வரும் சீசனில் விளையாடுவாரா என்ற தகவல் இன்னும் வெளியாகவில்லை.

மேலும் சில ஊடகங்கள், தோனி ஓய்வு முடிவை அறிவித்துவிடுவார் என்று செய்திகள் வெளியிட்டது. இந்த சூழலில் சென்னை சூப்பர் கிங்ஸ் அணியின் ரசிகர்களுக்கு மகிழ்ச்சி அளிக்கும் வகையில், அணியின் தலைமைச் செயல் அதிகாரி காசி விஸ்வநாதன் முக்கியமான தகவலை உறுதிப்படுத்தியுள்ளார்.

அணியின் நட்சத்திர வீரரும் முன்னாள் கேப்டனுமான எம்.எஸ். தோனி, வரவிருக்கும் 2026 ஐபிஎல் சீசனிலும் சென்னை சூப்பர் கிங்ஸ் அணிக்காக விளையாடுவார் என்று அவர் தெரிவித்துள்ளார். இதன் மூலம் தோனியின் ஓய்வு குறித்த அனைத்து யூகங்களுக்கும் முற்றுப்புள்ளி வைக்கப்பட்டுள்ளது.

தோனி, டி20 லீக் தொடங்கப்பட்ட காலத்திலிருந்தே சென்னை சூப்பர் கிங்ஸ் அணியின் ஒருங்கிணைந்த பகுதியாக இருந்து வருகிறார். அவரது தலைமையில் சிஎஸ்கே ஐந்து ஐபிஎல் பட்டங்களை வென்றுள்ளது, இது போட்டி வரலாற்றில் எந்த அணியும் வென்ற அதிகபட்ச பட்டங்களில் ஒன்றாகும்.

தோனி அடுத்த ஐபிஎல் சீசனில் விளையாடுவாரா என்று செய்தியாளர்கள் கேட்டபோது, காசி விஸ்வநாதன் உறுதியாக, "அவர் விளையாடுவார், அவர் விளையாடுவார்" என்று கூறினார். இந்த அறிவிப்பு சிஎஸ்கே ரசிகர்கள் மத்தியில் உற்சாக அலையை ஏற்படுத்தியுள்ளது.

கடந்த ஐபிஎல் 2024 சீசனுக்கு முன்னர், ருதுராஜ் கெய்க்வாட்டிடம் கேப்டன் பதவியை ஒப்படைத்து தோனி விலகினார். இருப்பினும், கெய்க்வாட் காயம் காரணமாக விலகியதால், தோனி கடந்த சீசனில் மீண்டும் தலைமைப் பொறுப்பை ஏற்று வழிநடத்தினார். அந்த சீசனில் சென்னை அணி 14 போட்டிகளில் நான்கு வெற்றிகளை மட்டுமே பெற்று, 10 அணிகள் கொண்ட புள்ளிப் பட்டியலில் கடைசி இடத்தைப் பிடித்து, வரலாற்றிலேயே மிக மோசமான சீசனை சந்தித்தது.

தொடர்ந்து இரண்டாவது முறையாக பிளேஆஃப் சுற்றுக்குத் தகுதி பெறத் தவறியதும் குறிப்பிடத்தக்கது. வரும் சீசனில், அணியில் முக்கிய மாற்றங்கள் செய்யப்பட்டுள்ளன. அணியின் தலைசிறந்த வீரர்களில் ஒருவரான ரவீந்திர ஜடேஜா, சாம் கரனுடன் இணைந்து ராஜஸ்தான் ராயல்ஸ் அணிக்கு மாற்றம் செய்யப்பட்டுள்ளார். இது சிஎஸ்கே அணியில் ஒரு பெரிய இழப்பாக பார்க்கப்படுகிறது.

தோனியின் ஓய்வுக்குப் பிந்தைய காலகட்டத்திற்காக சென்னை அணி இப்போதே தயாராகத் தொடங்கியுள்ளது. இதன் ஒரு பகுதியாக, ஐபிஎல்-லின் முதல் சீசன் வெற்றியாளர்களான ராஜஸ்தான் ராயல்ஸ் அணியிலிருந்து விக்கெட் கீப்பர்-பேட்ஸ்மேன் சஞ்சு சாம்சனை சிஎஸ்கே அணி வாங்கியுள்ளது.

அபுதாபியில் நடைபெற்ற ஐபிஎல் 2026 ஏலத்தில், சென்னை சூப்பர் கிங்ஸ் 9 புதிய வீரர்களை ஒப்பந்தம் செய்தது. இதில் ராகுல் சாஹர், அகீல் ஹுசைன், மாட் ஹென்றி, மேத்யூ ஷார்ட், சர்பராஸ் கான், சாக் ஃபல்கெஸ், அமன் கான், கார்த்திக் சர்மான் மற்றும் பிரசாந்த் வீர் ஆகியோர் அடங்குவர்.

கார்த்திக் சர்மா மற்றும் பிரசாந்த் வீர் ஆகிய இரு சர்வதேசப் போட்டிகளில் அறிமுகமாகாத வீரர்களை ஒப்பந்தம் செய்ய சிஎஸ்கே தாராளமாக செலவிட்டது. இவ்விருவருக்கும் தலா ₹14.2 கோடி தொகையைச் செலுத்தியது. தற்போது தோனி, சாம்சன், உர்வில் படேல் மற்றும் கார்த்திக் சர்மான் என நான்கு விக்கெட் கீப்பர்கள் அணியில் உள்ளனர்.

சிஎஸ்கே தலைமைப் பயிற்சியாளர் ஸ்டீபன் ஃபிளெமிங், அபுதாபியில் நடந்த ஐபிஎல் 2026 ஏலத்திற்குப் பிறகு, "ஏதோ ஒரு கட்டத்தில், எம்எஸ் தோனி விலகுவார் என்பதை நாங்கள் கருத்தில் கொண்டோம். சஞ்சு ஒரு சர்வதேசத் தரத்திலான வீரர், அவர் அந்த இடத்தை சிறப்பாக நிரப்புகிறார்," என்று கூறினார்.