IPL 2026: 18 ஆண்டுகால ஜெயசூர்யாவின் சாதனையை முறியடித்த கூப்பர் கோனோலி.. புதிய சாதனை!

தர்மசாலா:நடப்பு ஐபிஎல் 2026 சீசனில், பஞ்சாப் கிங்ஸ் அணிக்காக சிறப்பான ஆட்டத்தை வெளிப்படுத்தி வரும் கூப்பர் கானோலி, தனது முதல் ஐபிஎல் சீசனிலேயே அதிக சிக்ஸர்கள் அடித்து புதிய சாதனை படைத்துள்ளார். அவர் இதுவரை 32 சிக்ஸர்களை விளாசி, 2008-ஆம் ஆண்டில் சனத் ஜெயசூர்யா அடித்த 31 சிக்ஸர்கள் என்ற சாதனையை முறியடித்துள்ளார்.

ஐபிஎல் 2026 ஏலத்தில் பஞ்சாப் கிங்ஸ் அணியால் ₹3 கோடிக்கு வாங்கப்பட்ட 22 வயது ஆஸ்திரேலிய ஆல்-ரவுண்டர் கானோலி, பெர்தைச் சேர்ந்த இடது கை பேட்ஸ்மேனாவார். ஸ்ரேயாஸ் ஐயர் தலைமையிலான அணியில் இதுவரை 13 போட்டிகளிலும் விளையாடியுள்ள அவர், 12 இன்னிங்ஸ்களில் 473 ரன்களுடன் 32 சிக்ஸர்கள், 39 பவுண்டரிகளை அடித்துள்ளார்.

கானோலியின் இந்த 32 சிக்ஸர்கள், ஐபிஎல் வரலாற்றில் தனது முதல் சீசனிலேயே அதிக சிக்ஸர்கள் அடித்த சனத் ஜெயசூர்யாவின் 18 வருட சாதனையை முறியடித்துள்ளது. சர்வகால சிறந்த கிரிக்கெட் வீரர்களில் ஒருவரான ஜெயசூர்யா, 2008-ஆம் ஆண்டு தொடக்க ஐபிஎல் சீசனில் மும்பை இந்தியன்ஸ் அணிக்காக 14 ஆட்டங்களில் 31 சிக்ஸர்களை விளாசி இருந்தார்.

தனது முதல் ஐபிஎல் சீசனில் அதிக சிக்ஸர்கள் விளாசிய பேட்ஸ்மேன்கள் பட்டியலில், கானோலி, ஜெயசூர்யாவைத் தொடர்ந்து, ஜேக் ஃபிரேசர்-மெக்கர்க் மற்றும் ஃபின் ஆலன் ஆகியோர் முறையே மூன்று மற்றும் நான்காம் இடத்தைப் பிடித்துள்ளனர். 2024-ல் டெல்லி கேபிடல்ஸ் அணிக்காக ஃபிரேசர்-மெக்கர்க் 28 சிக்ஸர்களையும், நடப்பு 2026 சீசனில் கொல்கத்தா நைட் ரைடர்ஸ் அணிக்காக ஃபின் ஆலன் இதுவரை 27 சிக்ஸர்களையும் அடித்துள்ளனர்.

கடந்த மே 17 அன்று தர்மசாலாவில் உள்ள இமாச்சலப் பிரதேச கிரிக்கெட் சங்க மைதானத்தில் ராயல் சேலஞ்சர்ஸ் பெங்களூரு அணிக்கு எதிராக, பஞ்சாப் கிங்ஸ் அணிக்காக கூப்பர் கானோலி 22 பந்துகளில் 37 ரன்கள் குவித்து அசத்தினார். ஆரம்ப விக்கெட்டுகள் வீழ்ந்த நிலையில், பிரியன்ஷ் ஆர்யா (0), பிரப்சிம்ரன் சிங் (2), கேப்டன் ஷ்ரேயாஸ் ஐயர் (1) போன்றோர் ஆட்டமிழந்த பிறகு, கானோலி தனது இன்னிங்ஸில் 3 பவுண்டரிகள் மற்றும் 3 சிக்ஸர்களை அடித்து அணியை மீட்டார்.

ஐபிஎல் வரலாற்றில் டாப் 5 மோசமான எக்னாமி ரேட் வைத்திருக்கும் பவுலர்கள்.. சிஎஸ்கே வீரர் முதலிடம்

மேலும், ஐபிஎல் வரலாற்றிலேயே சதம் அடித்த இளம் வெளிநாட்டு பேட்ஸ்மேன் என்ற பெருமையும் கூப்பர் கானோலி படைத்துள்ளார். ஐபிஎல் தொடரின் ஒரே சீசனில் அதிக சிக்ஸர்கள் அடித்த ஒட்டுமொத்த சாதனையை ராயல் சேலஞ்சர்ஸ் பெங்களூரு அணிக்காக கிறிஸ் கெயில் படைத்துள்ளார். அவர் 2012 சீசனில் 15 போட்டிகளில் 59 சிக்ஸர்களை விளாசி இருந்தார். இந்த பட்டியலில் அவருக்கு அடுத்தபடியாக ஆந்த்ரே ரஸ்ஸல் உள்ளார். ரஸ்ஸல் 2019 சீசனில் தினேஷ் கார்த்திக் தலைமையிலான கொல்கத்தா நைட் ரைடர்ஸ் அணிக்காக 14 ஆட்டங்களில் 52 சிக்ஸர்களை அடித்தது குறிப்பிடத்தக்கது.