IPL 2026: சிஎஸ்கே வீரர்கள் தோல்விக்கு பொறுப்பேற்க வேண்டும்.. இந்த ஷாட் எல்லாம் தேவையா?

கவுஹாத்தி: ஐபிஎல் 2026 போட்டியில் சென்னை சூப்பர் கிங்ஸ் அணியின் பேட்டிங் அணுகுமுறை குறித்து முன்னாள் இந்திய வீரர் ஆகாஷ் சோப்ரா கடும் விமர்சனத்தை முன்வைத்துள்ளார். முதல் பந்தில் சிக்ஸர் அடித்த பின்னரும், ஷிவம் துபே உடனடியாக ஒரு பெரிய ஷாட் அடிக்க முயன்றது கேள்விக்குரியது என்றும் அவர் சுட்டிக்காட்டினார்.

குவாஹாத்தியில் நடைபெற்ற இந்த ஆட்டத்தில், டாஸ் வென்ற ரியான் பராக் சிஎஸ்கேவை முதலில் பேட் செய்ய அழைத்தார். சிஎஸ்கே அணி 127 ரன்களுக்கு அனைத்து விக்கெட்டுகளையும் இழந்தது. பின்னர் ஆர்ஆர் அணி, எட்டு விக்கெட்டுகள் மற்றும் 47 பந்துகள் மீதமிருக்க, இலக்கை எட்டி அபார வெற்றி பெற்றது.

தனது யூடியூப் சேனல் வீடியோவில், ஆகாஷ் சோப்ரா, பந்துவீச்சாளர்களுக்கு சாதகமான சூழலில் சிஎஸ்கேயின் டாப்-ஆர்டர் சரிவைக் குறிப்பிட்டார். அணி தடுமாறிக்கொண்டிருந்த நிலையில், ஷிவம் துபேவின் ஆக்ரோஷமான அணுகுமுறை குறித்து அவர் கேள்வி எழுப்பினார்.

"ருதுராஜ் கெய்க்வாட் மற்றும் சஞ்சு சாம்சன் என 2 பேரும் ஓப்பனிங் செய்ய முடிவெடுத்துள்ளனர். அவர்கள் அதைச் செய்தார்கள், ஆனால் டாஸ் தோற்றதால் நிலைமை மோசமானது. பிட்ச்சில் பந்துவீச்சாளர்களுக்கு உதவியது, ஜோஃப்ரா ஆர்ச்சர் மற்றும் நான்ட்ரெ பர்கர் மிகச் சிறப்பாகத் தொடங்கினர், மேலும் நீங்கள் பவர்-பிளேயில் நான்கு விக்கெட்டுகளை இழந்தீர்கள். பவர்-பிளேயில் நான்கு விக்கெட்டுகளை எந்த அணி இழந்தாலும், அதிலிருந்து மீண்டு வருவது ஏறக்குறைய சாத்தியமற்றது," என்று சோப்ரா குறிப்பிட்டார்.

அவர் தொடர்ந்து பேசுகையில், "200-220 ரன்கள் எளிதாக துரத்தப்படும் போட்டி பற்றிப் பேசுகிறோம், அங்கே நீங்கள் 127 ரன்கள் மட்டுமே எடுத்தீர்கள். விக்கெட்டுகள் தொடர்ந்து விழுந்து கொண்டே இருந்தன, அங்கே ஒரு கேள்வி இருக்கும்," என்றார்.

துபேவின் ஆட்டம் குறித்து பேசிய அவர், "ஷிவம் துபே, நீங்கள் கொஞ்சம் பொறுப்பேற்க வேண்டும். முதல் பந்தில் சிக்ஸர் அடித்தீர்கள். மீண்டும் அடிக்க என்ன அவசியம்? நீங்கள் இன்னும் கொஞ்சம் கவனமாக விளையாட வேண்டும். சென்னை, ஒரு பேட்டிங் யூனிட்டாக, மிகவும் சுமாராக இருந்தது. ஷாட் தேர்வு, அதீத ஆக்ரோஷமான அணுகுமுறை," என்றும் அவர் கடுமையாக விமர்சித்தார்.

7.2 ஓவர்களில் 51 ரன்களுக்கு 5 விக்கெட்டுகளை இழந்து சிஎஸ்கே திணறியபோது, ஷிவம் துபே (களமிறங்கினார். அவர் எதிர்கொண்ட முதல் பந்திலேயே ரவீந்திர ஜடேஜாவுக்கு எதிராக ஒரு சிக்ஸர் அடித்தார். ஆனால் மூன்று பந்துகள் கழித்து, அதே இடதுகை சுழற்பந்து வீச்சாளரிடம் தனது விக்கெட்டை நேராக லாங்-ஆஃப் ஃபீல்டரிடம் இழந்தார்.

சிஎஸ்கேயின் ஐபிஎல் 2026 சீசன் குறித்து பேசிய ஆகாஷ் சோப்ரா, "நீங்கள் தீவிர மாற்றங்களைச் செய்யும்போது, நிலைத்தன்மை குறைவு" என்று வலியுறுத்தினார். இளம் வீரர்களைச் சார்ந்து அணி அமைக்கப்பட்டதால், நிலைத்தன்மை அற்றதாகவே இருக்கும் என்றும் அவர் கருதினார்.

"நீங்கள் இளம் வீரர்களை நோக்கிச் சென்றபோது, பணி எளிதாக இருக்காது என்ற உணர்வு இருந்தது. எனவே, நீங்கள் தீவிர மாற்றங்களைச் செய்யும்போது, நிலைத்தன்மை இருக்காது. ஏற்கனவே பல பிரச்சனைகள் இருந்தன, அதன் மேல் காயங்கள் பிரச்சனையும் சேர்ந்தது," என்று சோப்ரா கூறினார்.

"நாதன் எல்லிஸ், தோனி மற்றும் டெவால்ட் பிரெவிஸ் ஆகியோர் காயமடைந்துள்ளனர். காயமடைந்த பிரெவிஸ் ஆர்ஆர் அணிக்கு எதிரான போட்டியில் இடம்பெறவில்லை. நீங்கள் ஒரு காயமடைந்த வீரருக்கு எடுத்த மாற்று வீரரும் காயப்பட்டவர். நாதன் எல்லிஸுக்குப் பதிலாக காயமடைந்த ஸ்பென்சர் ஜான்சனை நீங்கள் எடுத்துள்ளீர்கள்," என்று சோப்ரா விமர்சித்தார்.

சிஎஸ்கேயின் ஏல உத்தி குறித்தும் முன்னாள் வர்ணனையாளர் கேள்வி எழுப்பினார். டெவால்ட் பிரெவிஸைத் தவிர, மேத்யூ ஷார்ட்டை மட்டுமே வெளிநாட்டு பேட்ஸ்மேனாகத் தேர்வு செய்தது ஏன் என்று அவர் விமர்சித்தார்.

ஏல உத்தி குறித்து சோப்ரா, "இது எனக்கு இன்னும் புரியவில்லை. சென்னை, நீங்கள் என்ன செய்கிறீர்கள்? என்ன சிந்தனை செயல்முறை? டெவால்ட் பிரெவிஸைத் தவிர ஒரே ஒரு வெளிநாட்டு பேட்டிங் வாய்ப்பு மட்டுமே வைத்துள்ளீர்கள். உங்கள் ஏலத்தை சரியாகச் செய்தீர்களா?"

"இவ்வளவு இளம் வீரர்களைச் சேர்க்கும்போது, ஒரு கட்டத்தில் மாற்றங்கள் செய்ய வேண்டியிருக்கும் என்று உங்களுக்குத் தெரியும், ஆனால் நீங்கள் மேத்யூ ஷார்ட்டை மட்டுமே வைத்திருக்கிறீர்கள்," என்றும் அவர் தனது விமர்சனத்தை முன்வைத்தார்.

இந்திய ஆடுகளங்களில் மேத்யூ ஷார்ட் ஒரு பேட்ஸ்மேனாகவோ அல்லது பந்துவீச்சாளராகவோ சிறப்பாகச் செயல்பட வாய்ப்பில்லை என்று ஆகாஷ் சோப்ரா கருத்துத் தெரிவித்தார். ஐபிஎல் 2026ல் சிஎஸ்கே சிறப்பாகச் செயல்பட ருதுராஜ் கெய்க்வாட், சஞ்சு சாம்சன் மற்றும் ஷிவம் துபே ஆகியோர் இன்னும் கொஞ்சம் பொறுப்பேற்க வேண்டும் என்றும் அவர் வலியுறுத்தினார்.