IPL 2026: CSK அணியில் கலீல் அஹமதுக்கு மாற்று வீரராக யாரை தேர்வு செய்யலாம்.. 4 பேருக்கு வாய்ப்பு?

சென்னை: ஐபிஎல் 2026 தொடரில் சிஎஸ்கே அணிக்கு இடது கை வேகப்பந்து வீச்சாளர் கலீல் அகமது இல்லாதது பெரும் பின்னடைவை ஏற்படுத்தியுள்ளது. காயம் காரணமாக அவர் தொடரில் இருந்து விலகியுள்ளார். நடப்பு சீசனின் ஐந்து போட்டிகளிலும் ஆடிய கலீல், ஏப்ரல் 14 அன்று கொல்கத்தா நைட் ரைடர்ஸ் அணிக்கு எதிரான ஆட்டத்தில் பாதியில் விலகினார்.

சிஎஸ்கே அணி ஹாட்ரிக் தோல்விக்கு பிறகு தற்போது தான் தொடர்ந்து 2 வெற்றிகளை பெற்றது. இந்த சூழலில் கலீல் அகமது காயம் காரணமாக விலகி இருப்பது சிஎஸ்கே அணிக்கு பெரும் சிக்கலை தந்துள்ளது. தற்போது சிஎஸ்கே அணியில் ராம் கோஷ் மற்றும் முகேண் சவுத்ரி ஆகியோர் உள்ளனர். இதே போன்று கலீல் அகமதுவுக்கு மாற்று வீரர்களாக நான்கு பேர் பரிசீலனையில் உள்ளனர்.

சேதன் சக்காரியா: இடது கை வேகப்பந்து வீச்சாளரான இவர், கலீல் அகமதுக்கு ஒத்த மாற்று ஆவார். ஐபிஎல் 2026 ஏலத்தில் ரூ. 75 லட்சம் அடிப்படை விலையுடன் விற்கப்படாமல் போனாலும், 2025 சையத் முஷ்டாக் அலி கோப்பையில் ஏழு போட்டிகளில் 12 விக்கெட்டுகளைக் கைப்பற்றினார். புதிய பந்தில் பந்தை ஸ்விங் செய்யும் திறனைப் பெற்ற இவர் ஒரு வலுவான தேர்வாகிறார்.

ஆகஷ் மத்வால்: ஐபிஎல்-ல் திறனை நிரூபித்த ஆகஷ் மத்வால், 17 இன்னிங்ஸ்களில் 23 விக்கெட்டுகளை எடுத்துள்ளார். கடைசி ஓவரில் அபாயகரமான யார்க்கர்களுக்குப் பெயர் பெற்றவர். ஐபிஎல் 2026 புள்ளிவிவரங்கள் சுமாராக இருந்தாலும் (4 போட்டிகளில் 4 விக்கெட்கள்), சிஎஸ்கேவுக்கு எதிராக 3/29, மற்றும் 2023 எலிமினேட்டரில் 5/5 என்ற சாதனை அவரது போட்டி வெல்லும் திறனை நிரூபிக்கின்றன.

சிமரஜீத் சிங்: சிஎஸ்கேவுக்குப் பழக்கமான முகம் சிமரஜீத் சிங். அதிவேக பந்துவீச்சையும், அணியுடனான முன் அனுபவத்தையும் கொண்ட இவர், 2026 ஏலத்தில் விற்கப்படாமல் போனாலும், ஐபிஎல் வட்டத்திலேயே இருந்தார். இந்த சீசனுக்கு முன் ஹர்ஷித் ராணாவுக்கு மாற்றாக கேகேஆர் அணியில் தேர்வுப் போட்டிகளில் பங்கேற்றார். 2022 முதல் 2024 வரை சிஎஸ்கேவுடன் இருந்ததால், அணியின் சூழல் அவருக்குச் சாதகமாக அமையலாம்.

கமலேஷ் நாகர்கோடி: இந்திய ஆல்ரவுண்டர் கமலேஷ் நாகர்கோடி, 2025-ல் சிஎஸ்கே அணியில் இடம்பெற்றிருந்தார், ஆனால் இந்த ஆண்டு ஏலத்தில் விற்கப்படவில்லை. தனது வேகம் மற்றும் பேட்டிங் பங்களிப்பு மூலம் அணியின் பலத்தை கூட்டுகிறார். இருப்பினும், கடந்த கால காயங்கள் அவரது தொடர்ச்சியான பங்களிப்பைப் பாதித்துள்ளன.