IPL 2026: தோனியின் பிரம்மாண்ட ரெக்கார்டை உடைத்த சஞ்சு சாம்சன்.. 400 சிக்சர்கள் அடித்து அசத்தல்

சென்னை: 2026 ஐபிஎல் தொடரில் சென்னை சேப்பாக்கம் மைதானத்தில் நடந்த டெல்லி கேபிடல்ஸ் அணிக்கு எதிரான போட்டியில், சென்னை சூப்பர் கிங்ஸ் வீரர் சஞ்சு சாம்சன் வரலாற்றுச் சிறப்புமிக்க ஒரு இன்னிங்ஸை ஆடினார். வெறும் 56 பந்துகளில் 115 ரன்கள் குவித்து ஆட்டமிழக்காமல் இருந்த அவர், இதன் மூலம் பல புதிய சாதனைகளை படைத்துள்ளார்.

இந்த சீசனில் தான் விளையாடிய முதல் 3 போட்டிகளில் ஒற்றை இலக்க ரன்களில் ஆட்டமிழந்து விமர்சனத்துக்கு உள்ளான சாம்சன், நேற்று தனது பழைய பார்மிற்கு திரும்பினார். தொடக்க வீரராகக் களமிறங்கிய அவர் 15 பவுண்டரிகள் மற்றும் 4 சிக்சர்களை விளாசினார்.

3 அணிகளுக்காக சதம்

இந்த சதத்தின் மூலம் ஐபிஎல் வரலாற்றில் 3 வெவ்வேறு அணிகளுக்காக சதம் விளாசிய உலகின் 2-வது வீரர் என்ற சாதனையை சஞ்சு சாம்சன் படைத்தார். இதற்கு முன் கே.எல்.ராகுல் (பஞ்சாப், லக்னோ, டெல்லி) மட்டுமே இந்த சாதனையைச் செய்திருந்தார். சாம்சன் ஏற்கனவே டெல்லி (2017) மற்றும் ராஜஸ்தான் (2 சதங்கள்) அணிகளுக்காகச் சதம் அடித்துள்ள நிலையில், தற்போது சென்னை அணிக்காகவும் தனது முதல் சதத்தைப் பதிவு செய்துள்ளார்.

தோனியின் சாதனை முறியடிப்பு

சென்னை சூப்பர் கிங்ஸ் அணியின் விக்கெட் கீப்பராக ஒரு ஐபிஎல் போட்டியில் அதிக ரன்கள் எடுத்த வீரர் என்ற தோனியின் சாதனையை சஞ்சு சாம்சன் முறியடித்தார். கடந்த 2019-ல் பெங்களூரு அணிக்கு எதிராக தோனி எடுத்த 84 ரன்களே சாதனையாக இருந்தது. தற்போது 115 ரன்கள் எடுத்ததன் மூலம், சென்னை அணிக்காக சதம் அடித்த முதல் விக்கெட் கீப்பர் என்ற பெருமையையும் அவர் பெற்றார்.

400 சிக்சர்கள் மைல்கல்

இந்தப் போட்டியில் 4 சிக்சர்களை பறக்கவிட்டதன் மூலம், டி-20 கிரிக்கெட் வரலாற்றில் 400 சிக்சர்களைக் கடந்த 4-வது இந்திய வீரர் என்ற பெருமையை சாம்சன் பெற்றார். ரோஹித் சர்மா (554), விராட் கோலி (440), சூர்யகுமார் யாதவ் (421) ஆகியோருக்கு அடுத்தபடியாக சாம்சன் இந்த மைல்கல்லை எட்டியுள்ளார். குறிப்பாக, ஒரு இன்னிங்ஸில் சராசரியாக 1.26 சிக்சர்கள் அடிக்கும் சாம்சன், இந்த பட்டியலில் உள்ள மற்ற மூத்த வீரர்களை விடச் சிறந்த விகிதத்தைக் கொண்டுள்ளார்.

முக்கியப் புள்ளிவிவரங்கள்:

சென்னை அணிக்காக அதிகபட்ச ரன்கள் எடுத்த வீரர்கள் பட்டியலில் முரளி விஜய் (127), ஷேன் வாட்சன் (117), மைக் ஹசி (116) ஆகியோருக்கு அடுத்தபடியாக சாம்சன் (115) 4-வது இடத்தைப் பிடித்தார். ஆயுஷ் மத்ரே உடன் இணைந்து சாம்சன் அமைத்த 113 ரன்கள் பார்ட்னர்ஷிப், டெல்லி அணிக்கு எதிராக சென்னை அணியின் 2-வது சிறந்த பார்ட்னர்ஷிப் ஆகும்.

CSK vs DC: “எங்க தோல்விக்கு காரணமே இதுதான்..” சிஎஸ்கே-விடம் தோற்றுவிட்டு புலம்பிய கேப்டன் அக்சர்

ஐபிஎல் தொடரில் அதிக சதங்கள் அடித்தவர்கள் பட்டியலில் விராட் கோலி (8), பட்லர் (7), கிறிஸ் கெயில் (6), கே.எல்.ராகுல் (5) ஆகியோருக்கு அடுத்தபடியாக சாம்சன் 4 சதங்களுடன் உள்ளார். தொடர் தோல்விகளால் துவண்டு போயிருந்த சென்னை அணி, சஞ்சு சாம்சனின் இந்த ஆட்டத்தால் 20 ஓவர்களில் 212 ரன்கள் குவித்து அபாரமான ஸ்கோரை எட்டியது. மேலும், டெல்லி அணியை 23 ரன்கள் வித்தியாசத்தில் வீழ்த்தியது.

CSK vs DC: சேப்பாக்கத்தில் ஏமாற்றிய நடராஜன்.. படுமோசமான பவுலிங்.. வெளுத்து வாங்கிய சிஎஸ்கே