IPL 2026: சாம்சன் மட்டும் இல்லனா சிஎஸ்கே தோற்று இருக்கும்.. முன்னாள் CSK வீரர் கருத்து

மும்பை: ஐபிஎல் 2026 போட்டியில் மும்பை இந்தியன்ஸுக்கு எதிராக சென்னை சூப்பர் கிங்ஸ் பேட்ஸ்மேன் சஞ்சு சாம்சன் அடித்த அபார சதத்தை முன்னாள் வீரர் அம்பதி ராயுடு பாராட்டினார். மற்ற சிஎஸ்கே பேட்ஸ்மேன்களின் குறைவான பங்களிப்பால் சாம்சனின் இந்த ஆட்டம் மிகவும் முக்கியத்துவம் வாய்ந்தது என்று ராயுடு குறிப்பிட்டார்.

சஞ்சு சாம்சன் 54 பந்துகளில் 101* ரன்களைக் குவித்து, இந்த சீசனின் தனது இரண்டாவது சதத்தைப் பதிவு செய்தார். மும்பையின் வான்கடே மைதானத்தில் வியாழன், நடந்த இப்போட்டியில், முதலில் பேட் செய்த CSK 207-6 ரன்கள் குவிக்க, MI அணி 19 ஓவர்களில் 104 ரன்களுக்கு ஆல் அவுட் ஆனது. இதன் மூலம் CSK 103 ரன்கள் வித்தியாசத்தில் வெற்றி பெற்றது.

சாம்சனின் ஆட்டம் குறித்துப் பேசிய ராயுடு, "அவர் மிகவும் அமைதியாகவும் நிதானமாகவும் இருந்தார். அதிக ரிஸ்க் எடுக்கவில்லை என்றாலும், கிட்டத்தட்ட ஒவ்வொரு பந்தையும் அடித்து ரன்கள் சேர்க்கும் திறன் அவரிடம் இருந்தது. ஆட்டத்தை தனது கட்டுப்பாட்டில் வைத்திருந்தார்."

"இது சிறந்த பேட்டிங் வரிசை இல்லை, அவர்களுக்கு தற்போது தன்னம்பிக்கையும் இல்லை. அவர் நிலைத்துவிட்டால், ஆட்டத்தை ஆழமாக எடுத்துச் செல்ல வேண்டும் என்பதை சாம்சன் அறிந்திருந்தார். அவர் அற்புதமாகச் செயல்பட்டுள்ளார். இவரின் இன்னிங்ஸ் இல்லையென்றால், CSK நிச்சயம் திணறியிருக்கும்" என்றார்.

சாம்சன் 20 ஓவர்களும் களத்தில் நின்று, தனது இன்னிங்ஸில் 10 பவுண்டரிகள் மற்றும் 6 சிக்ஸர்களை விளாசினார். CSK-வில் கேப்டன் ருதுராஜ் கெய்க்வாட் 14 பந்துகளில் 22 ரன்களும், டெவால்ட் ப்ரீவிஸ் 11 பந்துகளில் 21 ரன்களும் எடுத்தனர்.

முன்னாள் நியூசிலாந்து வேகப்பந்து வீச்சாளர் மிட்செல் மெக்லெனகன், பவுண்டரிகளை அடிக்க சாம்சன் தேர்ந்தெடுத்த பாணிக்கு மும்பை இந்தியன்ஸ் அணி மெதுவாகவே எதிர்வினையாற்றியதாக விமர்சித்தார். "அவர் பேட்டைத் திறந்து தெர்ட் மேன் திசையில் பவுண்டரிகளை அடித்த விதத்தைப் பார்க்கும்போது, அந்த கட்டங்களில் அவர் எப்படி விளையாட முயற்சிக்கிறார் என்பதை MI புரிந்துகொள்ள மெதுவாகவே செயல்பட்டது."

"அவர் வேகத்தைப் பயன்படுத்தினார், பந்தை கடுமையாக அடிக்கவில்லை. MI ஒரு வீரரை அங்கு நிறுத்தியதால், அந்தப் பகுதியில் 20-30 ரன்களை இழந்தனர். இது ஒரு சிறந்த வியூகமான பேட்டிங்" என்று பாராட்டினார். MI பந்துவீச்சாளர்களில், அல்லாஹ் கசன்ஃபர் 4 ஓவர்களில் 25 ரன்களுக்கு 2 விக்கெட்டுகளை வீழ்த்தி சிக்கனமாக செயல்பட்டார். ஜஸ்ப்ரித் பும்ரா 4 ஓவர்களில் 31 ரன்களுக்கு ஒரு விக்கெட்டை எடுத்தார். கேப்டன் ஹர்திக் பாண்டியா 2 ஓவர்களில் 38 ரன்களையும், மிட்செல் சான்ட்னர் ஒரு விக்கெட்டுடன் 4 ஓவர்களில் 44 ரன்களையும் வாரி வழங்கினர்.