ஐபிஎல் வரலாற்றிலேயே இல்லாத அவமானம்.. டெல்லி கேபிடல்ஸ் பரிதாபம்.. 6 ஓவரில் 6 விக்கெட் எடுத்த ஆர்சிபி

டெல்லி: 2026 ஐபிஎல் தொடரில் டெல்லி அருண் ஜெட்லி மைதானத்தில் நடைபெற்ற 39-வது லீக் போட்டியில், ராயல் சேலஞ்சர்ஸ் பெங்களூரு அணிக்கு எதிராக டெல்லி கேபிடல்ஸ் அணி சந்தித்த பின்னடைவு ஒட்டுமொத்த கிரிக்கெட் உலகையே அதிர்ச்சியில் ஆழ்த்தியுள்ளது. இதுவரை ஐபிஎல் வரலாற்றில் நடக்காத ஒரு மோசமான சாதனையை டெல்லி அணி தன் சொந்த மண்ணிலேயே பதிவு செய்துள்ளது.

இந்தப் போட்டியில் டாஸ் வென்ற ராயல் சேலஞ்சர்ஸ் பெங்களூரு அணி முதலில் பந்துவீச்சை தேர்வு செய்தது. ஆட்டம் தொடங்கிய முதல் ஓவரிலேயே டெல்லி கேப்பிடல்ஸ் அணியின் சரிவு ஆரம்பமானது. புவனேஷ்வர் குமார் வீசிய முதல் ஓவரின் 2-வது பந்திலேயே சாஹில் பராக் ரன் ஏதும் எடுக்காமல் ஆட்டமிழந்தார். அடுத்த ஓவரிலேயே கே.எல்.ராகுல் 1 ரன்னில் வெளியேற, அதே ஓவரில் சமீர் ரிஸ்வியும் டக்-அவுட் முறையில் வெளியேறி அதிர்ச்சியளித்தார்.

டெல்லி அணி பவர்பிளே முடிவில் 6 விக்கெட்டுகளை இழந்து வெறும் 13 ரன்கள் மட்டுமே எடுத்திருந்தது. ஐபிஎல் வரலாற்றிலேயே பவர்பிளே ஓவர்களில் எடுக்கப்பட்ட மிகக்குறைந்த ஸ்கோர் இதுவாகும். இதற்கு முன்னதாக பல அணிகள் தடுமாறியிருந்தாலும், இந்த அளவுக்கு மோசமான நிலையை எட்டியதில்லை. குறிப்பாக, டெல்லி அணியின் முதல் 6 பேட்டர்கள் இணைந்து எடுத்த மொத்த ரன்களின் எண்ணிக்கை வெறும் 7 மட்டுமே. இது 2011-ல் கொச்சி டஸ்கர்ஸ் அணிக்கு எதிராக டெக்கான் சார்ஜர்ஸ் அணி செய்த சாதனையைத் தொடர்ந்து 2-வது மிகக்குறைந்த ஸ்கோராகப் பதிவாகியுள்ளது.

இந்தப் போட்டியில் பெங்களூரு அணியின் பந்துவீச்சாளர்கள் புவனேஷ்வர் குமார் மற்றும் ஜோஷ் ஹேசில்வுட் ஆகியோர் அனல் பறக்கும் பந்துவீச்சை வெளிப்படுத்தினர். ஐபிஎல் வரலாற்றில் ஒரே இன்னிங்ஸில் பவர்பிளேக்குள்ளேயே இரண்டு பந்துவீச்சாளர்கள் தலா 3 விக்கெட்டுகளை வீழ்த்துவது இதுவே முதல் முறையாகும். புவனேஷ்வர் குமார் 3 ஓவர்களில் 5 ரன்கள் மட்டுமே கொடுத்து 3 விக்கெட்டுகளைச் சாய்த்தார். ஹேசில்வுட் 3 ஓவர்களில் 8 ரன்கள் கொடுத்து 3 விக்கெட்டுகளை வீழ்த்தினார்.

டெல்லி அணியின் முக்கிய வீரர்களான நிதிஷ் ராணா 1 ரன்னிலும், டிரிஸ்டன் ஸ்டப்ஸ் 5 ரன்னிலும் வெளியேறினர். கேப்டன் அக்சர் படேல் ரன் ஏதும் எடுக்காமல் பெவிலியன் திரும்பியது ரசிகர்களை வேதனையில் ஆழ்த்தியது. ஒரு கட்டத்தில் 7 ரன்களுக்கே 5 விக்கெட்டுகளை இழந்து தவித்த டெல்லி அணியை, அபிஷேக் போரல் மற்றும் டேவிட் மில்லர் ஜோடி ஓரளவுக்குச் சரிவிலிருந்து மீட்கப் போராடியது. 7 ஓவர்கள் முடிவில் டெல்லி அணி 25 ரன்களுக்கு 6 விக்கெட்டுகளை இழந்து பரிதாப நிலையில் இருந்தது.