IPL 2026- கையை தாக்கிய பந்து.. பேட்டிங்கிலிருந்து பாதியிலேயே வெளியேறிய சாய் சுதர்சன்

கொல்கத்தா: ஐபிஎல் 2026 தொடரில் கொல்கத்தா நைட் ரைடர்ஸுக்கு எதிராக குஜராத் டைட்டன்ஸ் அணியின் தொடக்க வீரர் சாய் சுதர்சன், காயம் காரணமாகக் களத்திலிருந்து வெளியேறினார். கொல்கத்தா ஈடன் கார்டனில் நடைபெற்ற போட்டியில், 248 ரன்கள் இலக்கை துரத்தி விளையாடியபோது, கார்த்திக் தியாகி வீசிய பந்து அவரது இடது கை முழங்கையைத் தாக்கியதால், அவர் வலியால் துடித்தார்.

இப்போட்டியில், டாஸ் வென்ற குஜராத் கேப்டன் ஷுப்மன் கில் பந்துவீச்சைத் தேர்வு செய்தார்.முதலில் பேட்டிங் செய்த கொல்கத்தா நைட் ரைடர்ஸ் அணி, பின் ஆலன், அங்கிரிஷ் ரகவன்ஷி மற்றும் கேமரூன் கிரீன் ஆகியோரின் அதிரடி ஆட்டத்தால் 2 விக்கெட் இழப்பிற்கு பிரம்மாண்டமான 247 ரன்கள் குவித்தது.

பின் ஆலனுடன் இணைந்து இன்னிங்ஸைத் தொடங்கிய அஜிங்க்யா ரஹானே 14 பந்துகளில் 14 ரன்கள் எடுத்த நிலையில் முகமது சிராஜிடம் விக்கெட்டை இழந்தார். முன்னதாக, இருவரும் 44 ரன்கள் சேர்த்திருந்தனர்.இருமுறை கேட்ச் தவறவிடப்பட்ட பின் ஆலன், வெறும் 21 பந்துகளில் அரைசதம் அடித்தார். 38 பந்துகளில் 10 சிக்ஸர்களுடன் 93 ரன்கள் விளாசிய ஆலனை சாய் கிஷோர் வீழ்த்தினார்.

ஆலன் வெளியேறிய பிறகு, அங்கிரிஷ் ரகவன்ஷி (44 பந்துகளில் ஆட்டமிழக்காமல் 82 ரன்கள்) மற்றும் கேமரூன் கிரீன் (28 பந்துகளில் ஆட்டமிழக்காமல் 52 ரன்கள்) இருவரும் அவுட்டாகாமல் களத்தில் இருந்தனர்.பின்னர், 248 ரன்கள் இலக்குடன் களமிறங்கிய குஜராத் டைட்டன்ஸ் அணிக்கு சாய் சுதர்சனும் ஷுப்மன் கில்லும் இணைந்து முதல் 3 ஓவர்களில் 42 ரன்கள் எடுத்து வலுவான தொடக்கம் அளித்தனர். ஆனால், முழங்கையில் காயம் ஏற்பட்டதால், இடது கை ஆட்டக்காரரான சாய் சுதர்சன் வெளியேற வேண்டியதாயிற்று.

சாய் சுதர்சன் 13 பந்துகளில் 23 ரன்கள் எடுத்திருந்தார். அவருக்குப் பதிலாக நிஷாந்த் சிந்து களமிறங்கினார். அவர் வெறும் 1 ரன்னில் ஆட்டமிழந்தார். எனினும் கேப்டன் சுப்மன் கில் மற்றும் ஜாஸ் பட்லர் ஆகியோர் அதிரடியாக விளையாடி ரன்களை சேர்த்தனர்.