IPL 2026: சுப்மன் கில் மிரட்டல் சதம்.. பைனலுக்கு குஜராத் தகுதி.. ஆர்சிபியுடன் மோதல்.. ராயல்ஸ் தோல்வி

சந்திகார்: ஐபிஎல் 2026 தொடரின் இரண்டாவது தகுதிச் சுற்றில் ராஜஸ்தான் ராயல்ஸ் அணியை வீழ்த்தி குஜராத் டைட்டன்ஸ் அணி இறுதிப் போட்டிக்கு முன்னேறியுள்ளது. 215 ரன்கள் என்ற இலக்கை, கேப்டன் ஷுப்மன் கில்லின் அதிரடி சதம் (109 ரன்கள்) மற்றும் சாய் சுதர்சனின் 96 ரன்கள் உதவியுடன், 8 பந்துகள் மீதமிருக்க 7 விக்கெட் வித்தியாசத்தில் குஜராத் அபார வெற்றி பெற்றது.

வரும் ஞாயிற்றுக்கிழமை நடைபெறும் இறுதிப் போட்டியில் அவர்கள் ராயல் சேலஞ்சர்ஸ் பெங்களூருவை எதிர்கொள்வார்கள். டாஸ் வென்று பேட்டிங் செய்ய முடிவெடுத்த ராஜஸ்தான் ராயல்ஸுக்கு ஆரம்பம் தடுமாற்றமாக இருந்தது. முகமது சிராஜ் முதல் ஓவரிலேயே யஷஸ்வி ஜெய்ஸ்வாலை ஒரு ரன்னில் வெளியேற்ற, ககிசோ ரபாடா இரண்டாவது ஓவரில் துருவ் ஜூரேலை (6 பந்துகளில் 7 ரன்கள்) அவுட்டாக்கினார்.

இதனால் ராஜஸ்தான் தடுமாறியது. ரவீந்திர ஜடேஜா மற்றும் வைபவ் சூர்யவன்ஷி இணைந்து இன்னிங்ஸை நிலைநிறுத்தினர்.19 பந்துகளில் 34 ரன்கள் எடுத்திருந்த ஜடேஜா காயம் காரணமாக ஓய்வறைக்கு திரும்பினார். அவருக்குப் பதிலாக வந்த கேப்டன் ரியான் பராக், 6 பந்துகளில் 11 ரன்கள் எடுத்து ஹோல்டர் பந்தில் ஆட்டமிழந்தார்.

IPL 2026: 153 கிமீ. வேகத்தில் பந்துவீசிய ரபாடா.. சிக்சர் பறக்கவிட்டு வைபவ் சூர்யவன்ஷி மிரட்டல்

ஹோல்டர் தசுன் ஷனாகாவை (3 ரன்கள்) வெளியேற்ற, பிரசாத் கிருஷ்ணா ஜோஃப்ரா ஆர்ச்சரையும் (4 பந்துகளில் 7 ரன்கள்) வீழ்த்தினார். சிகிச்சை பெற்ற ஜடேஜா மீண்டும் களமிறங்கினார்.ஜடேஜா, சூர்யவன்ஷியுடன் இணைந்து ஸ்கோரை உயர்த்தினர். 46 ரன்னில் கேட்ச் தவறவிடப்பட்ட சூர்யவன்ஷி, 47 பந்துகளில் 96 ரன்கள் குவித்து ரபாடா பந்தில் வெளியேறினார். டோனவன் ஃபெரைரா (11 பந்துகளில் 38 ரன்கள்) மற்றும் ஜடேஜா (35 பந்துகளில் 45 ரன்கள்) அதிரடி காட்ட, ராஜஸ்தான் ராயல்ஸ் அணி 20 ஓவர்களில் 6 விக்கெட்டுகளை இழந்து 214 ரன்கள் குவித்தது.

215 ரன்கள் இலக்குடன் களமிறங்கிய குஜராத் டைட்டன்ஸுக்கு சாய் சுதர்சன் மற்றும் ஷுப்மன் கில் அதிரடி தொடக்கம் அளித்தனர். விரைவாக அரைசதங்களைப் பதிவு செய்த இந்த ஜோடி, முதல் விக்கெட்டுக்கு 167 ரன்கள் சேர்த்தது. இருப்பினும், சுதர்சன் 96 ரன்களில் ஹிட்-விக்கெட் முறையில் துரதிர்ஷ்டவசமாக ஆட்டமிழந்தார். முதல் தகுதிச் சுற்றிலும் இதேபோல் அவர் ஆட்டமிழந்தது குறிப்பிடத்தக்கது.

IPL 2026: மீண்டும் மீண்டுமா? சாய் சுதர்சனுக்கு தேஜாவு.. ஒரே மாதிரி அவுட்டாகி சர்ச்சை

மறுமுனையில் கேப்டன் ஷுப்மன் கில் தனது அதிரடியைத் தொடர்ந்தார். 53 பந்துகளில் 109 ரன்கள் குவித்து அபாரமாக சதம் அடித்த அவர், ஆர்ச்சர் பந்தில் ஆட்டமிழந்தார். குஜராத் டைட்டன்ஸ் அணி, இலக்கை 8 பந்துகள் மீதமிருக்கவே எட்டி, 7 விக்கெட் வித்தியாசத்தில் மகத்தான வெற்றியைப் பதிவு செய்தது.