IPL 2026: மும்பை இந்தியன்ஸ் அணியிலிருந்து விலகும் ஹர்திக் பாண்டியா.. காரணம் என்ன?

மும்பை: மும்பை இந்தியன்ஸ் அணியின் கேப்டன் ஹர்திக் பாண்டியா, ராயல் சேலஞ்சர்ஸ் பெங்களூருவுக்கு எதிரான வரவிருக்கும் ஐபிஎல் 2026 போட்டியில் பங்கேற்க மாட்டார். உடல்நலக் குறைவு காரணமாக லக்னோ சூப்பர் ஜெயன்ட்ஸுக்கு எதிரான கடந்த ஆட்டத்தில் விளையாடாத ஹர்திக், அடுத்த போட்டிக்காக அணியுடன் ராய்ப்பூர் பயணிக்கவில்லை. மே 10 ஞாயிற்றுக்கிழமை அன்று, ராய்ப்பூரில் உள்ள மும்பை அணி தனது 11வது போட்டியில் பெங்களூருவை எதிர்கொள்கிறது.

மும்பை இந்தியன்ஸ் வீரர்கள் மும்பை விமான நிலையத்தின் டெர்மினல் 1-இல் கூடினர். ஆனால் ஹர்திக் பாண்டியா அவர்களுடன் இல்லை. ராய்ப்பூருக்கு அவர் அணியுடன் பயணிக்கவில்லை என்பது உறுதியாகியுள்ளது. போட்டிக்கு முன் அவர் அணியுடன் இணைவது குறித்து இதுவரை எந்தத் தகவலும் இல்லை.

கடந்த மே 4 அன்று லக்னோ சூப்பர் ஜெயன்ட்ஸுக்கு எதிரான போட்டியிலும் ஹர்திக் பாண்டியா உடல்நலக் குறைவால் பங்கேற்கவில்லை. அவருக்குப் பதிலாக சூர்யகுமார் யாதவ் கேப்டன் பொறுப்பை ஏற்றார். "ஹர்திக் பாண்டியாவுக்கு முதுகுப் பிடிப்பு ஏற்பட்டுள்ளதால், சூர்யகுமார் யாதவ் கேப்டனாகச் செயல்படுவார்" என அணி நிர்வாகம் தெரிவித்தது.

ஐபிஎல் 2025 மெகா ஏலத்திற்கு முன்னதாக, ஹர்திக் பாண்டியா 16.35 கோடி ரூபாய்க்கு மும்பை இந்தியன்ஸ் அணியால் தக்கவைக்கப்பட்டார். தற்போது அவரது உடல்நலக் குறைபாடு அணிக்கு பின்னடைவாக உள்ளது.ஐபிஎல் 2026 சீசனின் எட்டு போட்டிகளில் கேப்டனாக செயல்பட்ட ஹர்திக் பாண்டியா, பேட்ஸ்மேனாகவும் பந்துவீச்சாளராகவும் சோபிக்கவில்லை. அவர் 146 ரன்கள் மட்டுமே எடுத்துள்ளார். அவரது சராசரி 20.86, ஸ்ட்ரைக் ரேட் 136.44 ஆக உள்ளது.

16 பவுண்டரிகள், 4 சிக்ஸர்கள் அடித்துள்ளார். பந்துவீச்சில் எட்டு இன்னிங்ஸ்களில் நான்கு விக்கெட்டுகளை மட்டும் எடுத்து, 11.90 எகானமி விகிதத்தைப் பதிவு செய்துள்ளார்.ராயல் சேலஞ்சர்ஸ் பெங்களூருவுக்கு எதிரான போட்டி மும்பை இந்தியன்ஸ்க்கு வெற்றி பெற வேண்டியது அவசியம். இப்போட்டியில் அல்லது மீதமுள்ள நான்கு போட்டிகளில் தோல்வியடைந்தால், பிளேஆஃப் சுற்று வாய்ப்பை மும்பை அணி இழக்கும். இதுவரை 10 போட்டிகளில் 6 புள்ளிகளுடன் உள்ள மும்பை, அடுத்த நான்கு போட்டிகளிலும் வென்றால் மட்டுமே பிளேஆஃப் சுற்றில் நீடிக்க முடியும்.