IPL 2026: நீ படிச்ச ஸ்கூல்ல, நான் ஹெட்மாஸ்டர் பா.. பயிற்சியில் வைபவ் சூர்யவன்ஷியை அவுட்டாக்கிய ஜடேஜா

ஜெய்ப்பூர்: IPL 2026 சீசனுக்கான ராஜஸ்தான் ராயல்ஸ் அணியின் பயிற்சி முகாம் தொடங்கியது. மூத்த வீரர் ரவீந்திர ஜடேஜா மீண்டும் அணியில் இணைந்திருப்பது முக்கிய பேசுபொருளாகியுள்ளது. சென்னை சூப்பர் கிங்ஸ் அணியுடனான டிரேடிங் மூலம் ஜடேஜா ராஜஸ்தான் ராயல்ஸ் அணிக்கு திரும்பியுள்ளார். இந்த மாற்றத்தில், ராயல்ஸ் அணியின் முன்னாள் கேப்டன் சஞ்சு சாம்சன் சென்னைக்கு அனுப்பப்பட்டு, பதிலாக ஜடேஜாவும் சாம் கரணும் ராயல்ஸ் அணியில் இணைந்தனர்.

ராஜஸ்தான் முகாமில் இணைந்த ஜடேஜா, சீசனுக்கான பயிற்சிகளைத் தொடங்கினார். நெட் பயிற்சியின்போது இளம் வீரர் வைபவ் சூர்யவன்ஷிக்கு அவர் பந்துவீசியது கவனத்தை ஈர்த்தது. மூத்த இடதுகை சுழற்பந்து வீச்சாளரான ஜடேஜாவை வைபவ் சூர்யவன்ஷி ஆக்ரோஷமாக எதிர்கொண்டபோது, பலமுறை பந்துகளை சரியாக கணிக்கத் தவறி ஆட்டமிழந்தார்.

இந்த நெட் பயிற்சி வீடியோவை ராஜஸ்தான் ராயல்ஸ் தனது இன்ஸ்டாகிராம் பக்கத்தில் பகிர்ந்துள்ளது. இதனிடையே, முன்னாள் கிரிக்கெட் வீரர் ஆகாஷ் சோப்ரா, ஐபிஎல் 2026 தொடருக்கான ராஜஸ்தான் ராயல்ஸ் அணியை தனது யூடியூப் சேனல் வீடியோவில் ஆய்வு செய்தார். சஞ்சு சாம்சன் இல்லாதபோதிலும், ராயல்ஸ் அணி வலுவான பேட்டிங் வரிசையைக் கொண்டுள்ளதாக அவர் கருத்து தெரிவித்தார்.

சஞ்சு சாம்சன் சென்னை சூப்பர் கிங்ஸ் அணிக்கு சென்ற போதிலும், ராஜஸ்தான் ராயல்ஸ் வலுவான பேட்டிங் திறனைக் கொண்டுள்ளதாக ஆகாஷ் சோப்ரா தனது யூடியூப் வீடியோவில் தெரிவித்தார். "அவர்கள் இன்னும் ஒரு சிறந்த பேட்டிங் வரிசையைக் கொண்டுள்ளனர் என்று நான் உணர்கிறேன். சஞ்சு சாம்சன் இல்லாத நிலையிலும் ஒரு நல்ல பேட்டிங் வரிசையைப் பராமரிக்க முடிந்தால், அது நல்ல செயல்பாடு" என்றார்.

"வைபவ் சூர்யவன்ஷி யசஸ்வி ஜெய்ஸ்வாலுடன் துவக்க ஆட்டக்காரராக களமிறங்கினால், அவர்களிடம் துருவ் ஜூரல், ரியான் பராக், ஷிம்ரான் ஹெட்மயர், டொனோவன் ஃபெரீரா, ரவீந்திர ஜடேஜா மற்றும் சாம் கரன் ஆகியோர் உள்ளனர். எந்தப் பக்கத்தில் இருந்தும் மோசமாகத் தெரியவில்லை. துவக்கத்தில் அதிக அதிரடி தேவைப்பட்டால், லுஆன்-ட்ரே பிரிடோரியஸையும் விளையாடலாம்" என்று ஆகாஷ் சோப்ரா பட்டியலிட்டார்.

"அவர்களிடம் போதுமான திறமைக்கு மேல் உள்ளது. சஞ்சு சாம்சன் விலகிய போதிலும், இவ்வளவு பேட்டிங் திறனும் சக்தியும் இருந்தால், நீங்கள் ஒரு கணக்கிடப்பட வேண்டிய சக்தியாக இருப்பீர்கள். அவர்களிடம் பேட்டிங் பலம் உள்ளது. அதில் எந்த சந்தேகமும் இல்லை" என்று அவர் குறிப்பிட்டார்.ராயல்ஸ் அணியிடம் ஏராளமான வேகப்பந்து வீச்சாளர்கள் உள்ளனர். ஜோஃப்ரா ஆர்ச்சர், நந்த்ரே பர்கர், துஷார் தேஷ்பாண்டே, க்வெனா மாஃபகா, ஆடம் மில்னே, சந்தீப் சர்மா, குல்தீப் சென் மற்றும் யுத்வீர் சிங் சரக் ஆகியோர் அவர்களிடம் உள்ளனர். அவர்களுக்கு ஏராளமான வேகப்பந்து வீச்சு ஆப்சன்கள் உள்ளன" என்று அவர் குறிப்பிட்டார்.