ஆர்சிபி அணியை வாங்கும் 'காந்தாரா' தயாரிப்பாளர்கள்?.. பங்குகளை வாங்க ஹொம்பாலே பிலிம்ஸ் தீவிரம்

பெங்களூர்: ஐபிஎல் கிரிக்கெட் உலகில் ஒரு முக்கியத் திருப்பமாக, 'கே.ஜி.எஃப்.', 'காந்தாரா' மற்றும் 'சலார்' போன்ற பிரம்மாண்ட வெற்றிப் படங்களைத் தயாரித்த ஹொம்பாலே பிலிம்ஸ் (Hombale Films) நிறுவனம், ராயல் சேலஞ்சர்ஸ் பெங்களூரு (RCB) அணியின் பங்குகளை வாங்குவதில் ஆர்வம் காட்டி வருவதாகத் தகவல்கள் வெளியாகியுள்ளன. இது கன்னட திரையுலகம் மற்றும் கர்நாடக கிரிக்கெட் ரசிகர்கள் மத்தியில் பெரும் எதிர்பார்ப்பை ஏற்படுத்தியுள்ளது.

ஆர்சிபி அணியின் தற்போதைய உரிமையாளரான டியாஜியோ இந்தியா (Diageo India), 2026 ஐபிஎல் தொடருக்கு முன்னதாக அணியை விற்க முடிவு செய்துள்ளதாகச் சில காலமாகவே செய்திகள் வெளிவந்த வண்ணம் உள்ளன. இந்தச் சூழலில், பல முன்னணி நிறுவனங்கள் ஆர்சிபி அணியை வாங்க ஆர்வம் காட்டி வருகின்றன. அந்தப் போட்டியில் தற்போது ஹொம்பாலே பிலிம்ஸ் நிறுவனமும் இணைந்துள்ளது.

ஹொம்பாலே பிலிம்ஸ் நிறுவனத்திற்கும் ஆர்சிபி அணிக்கும் ஏற்கெனவே ஒரு நல்லுறவு உள்ளது. கடந்த ஏப்ரல் 2023 முதல், ஆர்சிபி அணியின் அதிகாரப்பூர்வ டிஜிட்டல் பார்ட்னராக ஹொம்பாலே பிலிம்ஸ் செயல்பட்டு வருகிறது. இந்த காலகட்டத்தில், அணிக்கு பல்வேறு விளம்பரப் படங்கள், சினிமா பாணியிலான மேட்ச் டீசர்கள் மற்றும் ரசிகர்களைக் கவரும் வகையிலான பல பிரச்சாரங்களை ஹொம்பாலே வெற்றிகரமாக உருவாக்கியுள்ளது.

இந்த வணிக உறவின் அடுத்தகட்டமாக, அணியின் உரிமையில் பங்குதாரராக மாறுவதற்கு ஹொம்பாலே நிறுவனம் விரும்புவதாகக் கூறப்படுகிறது. இது தொடர்பாக டியாஜியோ நிறுவனத்துடன் முதற்கட்டப் பேச்சுவார்த்தைகள் நடைபெற்றதாகவும் நம்பத்தகுந்த வட்டாரங்கள் தெரிவிக்கின்றன. இருப்பினும், இரு தரப்பிலிருந்தும் இதுவரை அதிகாரப்பூர்வ அறிவிப்பு எதுவும் வெளியிடப்படவில்லை.

கடந்த 18 சீசன்களாகக் கோப்பைக்காகக் காத்திருந்த ஆர்சிபி அணி, 2025-ஆம் ஆண்டு ஐபிஎல் தொடரில் தனது முதல் கோப்பையை வென்று சாதனை படைத்தது. ரஜத் படிதார் தலைமையிலான அணி, இறுதிப் போட்டியில் பஞ்சாப் கிங்ஸ் அணியை வீழ்த்தி சாம்பியன் பட்டம் வென்றது. இந்த வெற்றியின் மூலம், அணியின் சந்தை மதிப்பு சுமார் 2 பில்லியன் அமெரிக்க டாலர்களாக (சுமார் ரூ. 17,000 கோடி) ராக்கெட் வேகத்தில் உயர்ந்தது. இந்த மதிப்பு உயர்வு, முதலீட்டாளர்களின் கவனத்தை ஆர்சிபி பக்கம் ஈர்த்துள்ளது.

போட்டியில் உள்ள மற்ற நிறுவனங்கள்

விஜய் கிரகந்தூர் தலைமையிலான ஹொம்பாலே பிலிம்ஸ் நிறுவனம் மட்டுமல்லாமல், வேறு பல பெரிய நிறுவனங்களும் ஆர்சிபி அணியை வாங்கும் போட்டியில் இருப்பதாகத் தெரிகிறது. செரோதா (Zerodha) இணை நிறுவனர் நிஹில் காமத், அதானி குழுமம், ஜே.எஸ்.டபிள்யூ (JSW) குழுமம், சீரம் இன்ஸ்டிடியூட் தலைவர் ஆதார் பூனாவாலா மற்றும் தேவயானி இன்டர்நேஷனல் போன்ற பெரும்புள்ளிகளும் இந்தப் போட்டியில் இருப்பதாகக் கூறப்படுகிறது.

இந்த ஒப்பந்தம் வெற்றிகரமாக முடிந்தால், அது ஆர்சிபி அணிக்கு பல வழிகளில் சாதகமாக அமையும் என எதிர்பார்க்கப்படுகிறது. கர்நாடகாவின் முன்னணி திரைப்படத் தயாரிப்பு நிறுவனம், மாநிலத்தின் கிரிக்கெட் அணியுடன் இணைவது உள்ளூர் ரசிகர்களிடையே அணியின் செல்வாக்கை மேலும் அதிகரிக்கும். கர்நாடகாவின் ஆழமான கிரிக்கெட் கலாச்சாரமும், கன்னட திரையுலகின் சக்தியும் இணையும்போது, அது இரு தரப்பினருக்கும் ஒரு புதிய உத்வேகத்தையும், வணிக ரீதியான வளர்ச்சியையும் கொடுக்கும் என்று கணிக்கப்படுகிறது.

2026 ஐபிஎல் தொடருக்கான மெகா ஏலத்திற்கு முன்னதாக, கோப்பையை வென்ற தங்களது முக்கிய வீரர்களான விராட் கோலி, ரஜத் படிதார், தேவ்தத் படிக்கல், ஃபில் சால்ட், ஹேசில்வுட் உள்ளிட்ட பலரை ஆர்சிபி அணி தக்க வைத்துள்ளது குறிப்பிடத்தக்கது. புதிய முதலீட்டாளர்களின் வருகை, அணியை மேலும் வலுப்படுத்த உதவும் என ரசிகர்கள் ஆவலுடன் எதிர்பார்த்துக் காத்திருக்கின்றனர்.