IPL 2026: 7 போட்டிகளில் விளையாடி கேகேஆர் முதல் வெற்றி.. இனியும் பிளே ஆப் சுற்றுக்கு செல்ல முடியுமா?

மும்பை: ஐபிஎல் 2026 பிளேஆஃப் சுற்றுக்கு KKR அணி முன்னேற வேண்டுமானால், எஞ்சியிருக்கும் தங்கள் ஏழு லீக் போட்டிகள் அனைத்திலும் கட்டாயம் வெல்ல வேண்டும். இது ஒரு சவாலான இலக்காக இருந்தாலும், ராஜஸ்தானுக்கு எதிரான வெற்றி அவர்களுக்கு நம்பிக்கையை அளித்துள்ளது.

கொல்கத்தாவின் ஈடன் கார்டன்ஸ் மைதானத்தில் ராஜஸ்தான் ராயல்ஸ்-க்கு எதிராக நடைபெற்ற போட்டியில், ரிங்கு சிங் ஆட்டமிழக்காமல் 53 ரன்கள் குவித்தார். இதன் மூலம் கொல்கத்தா நைட் ரைடர்ஸ் அணிக்கு முதல் வெற்றியைப் பெற்றது. 155 ரன்கள் இலக்கை KKR அணி 19.4 ஓவர்களில் கடந்தது.

ராஜஸ்தானுக்கு எதிரான கடைசி ஓவரில் KKR அணிக்கு 9 ரன்கள் தேவைப்பட்டது. பிரிஜேஷ் சர்மாவின் ஓவரில் முதல் இரண்டு பந்துகளிலும் அடுத்தடுத்து பவுண்டரிகள் அடித்து ரிங்கு சிங் ஸ்கோரை சமன் செய்தார். பின்னர் நான்காவது பந்தில் ஒரு சிக்ஸர் அடித்து தனது அரைசதத்தை நிறைவு செய்ததோடு, அவர் அணிக்கு வெற்றியையும் உறுதி செய்தார்.

ராஜஸ்தான் ராயல்ஸ் அணிக்கு எதிரான இந்த வெற்றி, KKR அணியை மும்பை இந்தியன்ஸ் அணியை பின்னுக்குத்தள்ளி ஐபிஎல் 2026 புள்ளிகள் பட்டியலில் 9வது இடத்திற்கு முன்னேற்றியது. அத்துடன், பிளேஆஃப் சுற்றுக்குத் தகுதிபெறும் அவர்களின் கனவையும் உயிர்ப்புடன் வைத்துள்ளது.

இதுவரை விளையாடிய ஏழு போட்டிகளில் 3 புள்ளிகளுடன் இருக்கும் KKR, மீதமுள்ள ஏழு போட்டிகள் அனைத்திலும் வென்றால், லீக் சுற்று முடிவில் 17 புள்ளிகளைப் பெறும். இந்த 17 புள்ளிகள், பிளேஆஃப் சுற்றுக்குத் தகுதிபெற முதல் நான்கு இடங்களுக்குள் முடிப்பதற்கு போதுமானதாக இருக்கும்.

ராஜஸ்தானுக்கு எதிரான போட்டியில் KKR தோற்றிருந்தால், அதிகபட்சமாக 15 புள்ளிகளுடன் சீசனை முடித்திருப்பார்கள். கடந்த 2025 ஐபிஎல் தொடரில், டெல்லி கேப்பிடல்ஸ் அணி 14 போட்டிகளிலிருந்து 15 புள்ளிகளைப் பெற்றும், முதல் நான்கு இடங்களுக்குள் வர முடியாமல் போனது குறிப்பிடத்தகுந்தது.

ஐபிஎல் 2026 தொடரில் கொல்கத்தா நைட் ரைடர்ஸ் அணியின் பயணம் சவால்கள் நிறைந்ததாகவே உள்ளது. இதுவரை நடந்தப் போட்டிகளின் முடிவுகள் குறித்து தற்போது காணலாம்.மார்ச் 29 அன்று மும்பை இந்தியன்ஸிடம் 6 விக்கெட் வித்தியாசத்திலும் (மும்பை), ஏப்ரல் 2 அன்று சன்ரைசர்ஸ் ஹைதராபாத்திடம் 65 ரன்கள் வித்தியாசத்திலும் (கொல்கத்தா) KKR அணி தோல்வியைச் சந்தித்தது. ஏப்ரல் 6 அன்று பஞ்சாப் கிங்ஸ் உடனான போட்டி (கொல்கத்தா) முடிவில்லாமல் போனது.

தொடர்ந்து, ஏப்ரல் 9 அன்று லக்னோ சூப்பர் ஜெயன்ட்ஸிடம் 3 விக்கெட் வித்தியாசத்திலும் (கொல்கத்தா), ஏப்ரல் 14 அன்று சென்னை சூப்பர் கிங்ஸிடம் 32 ரன்கள் வித்தியாசத்திலும் (சென்னை), ஏப்ரல் 17 அன்று குஜராத் டைட்டன்ஸிடம் 5 விக்கெட் வித்தியாசத்திலும் (அகமதாபாத்) KKR அணி தோல்விகளை சந்தித்தது.இறுதியாக, ஏப்ரல் 19 அன்று கொல்கத்தாவில் நடந்த முக்கியமான போட்டியில் ராஜஸ்தான் ராயல்ஸை 4 விக்கெட் வித்தியாசத்தில் தோற்கடித்து, இந்த சீசனின் முதல் வெற்றியைப் பதிவு செய்தது.

பிளேஆஃப் கனவை உயிர்ப்புடன் வைத்திருக்க வேண்டிய கட்டாயத்தில் உள்ள KKR அணியின் மீதமுள்ள ஏழு லீக் போட்டிகளின் அட்டவணை விவரம்: ஏப்ரல் 26, ஞாயிறு அன்று லக்னோவில் லக்னோ சூப்பர் ஜெயன்ட்ஸையும், மே 3, ஞாயிறு அன்று ஹைதராபாத்தில் சன்ரைசர்ஸ் ஹைதராபாத்தையும் எதிர்கொள்கிறது.

மே 8, வெள்ளியன்று டெல்லியில் டெல்லி கேப்பிடல்ஸ் அணியுடனும் மே 13, புதன்கிழமையன்று ராய்ப்பூரில் ராயல் சேலஞ்சர்ஸ் பெங்களூருவுடனும் KKR மோதுகிறது.KKR அணி தனது கடைசி மூன்று லீக் போட்டிகளை ஈடன் கார்டன்ஸ், கொல்கத்தாவில் விளையாடுகிறது: மே 16 அன்று குஜராத் டைட்டன்ஸ் , மே 20 அன்று மும்பை இந்தியன்ஸ். மற்றும் மே 24 அன்று டெல்லி கேப்பிடல்ஸ் அணிகளுடன் மோதுகிறது.